Espíritu santu mak Maromak nia forsa neʼebé nia uza atu halaʼo ninia atividade. (Miqueias 3:8; Lucas 1:35) Maromak bele haruka ninia espíritu ba fatin neʼebé deʼit hodi kumpre ninia hakarak.​—Salmo 104:30; 139:7.

 Iha Bíblia, liafuan “espíritu” tradús husi liafuan Ebraiku ruah no liafuan Gregu pneuma. Dala barak liu, liafuan sira-neʼe refere ba Maromak nia forsa ka espíritu santu (Génesis 1:2) Maibé dala ruma iha Bíblia liafuan sira-neʼe mós iha signifikadu seluk:

•   Iis.​—Habakuk 2:​19; Apokalipse 13:15.

•   Anin.​—Génesis 8:1; João 3:8.

•   Kriatura moris hotu iha rai nia forsa moris nian.​—Job 34:14, 15.

•   Hakarak iha ema nia laran neʼebé book nia atu koʼalia ka halo buat ruma.​—Números 14:24.

•   Kriatura espíritu, inklui Maromak no anju sira.​—1 Reis 22:21; João 4:​24.

 Signifikadu sira-neʼe hotu refere ba buat neʼebé ema nia matan labele haree, maibé iha prova katak neʼe iha duni. Nuneʼe mós, Maromak nia espíritu mak “hanesan anin, ita labele haree ho matan, ita labele kaer no iha forsa boot”.​—An Expository Dictionary of New Testament Words, husi William E. Vine.

 Bíblia mós refere ba Maromak nia espíritu santu nuʼudar ninia “liman” ka “liman-fuan”. (Salmo 8:3; 19:1; Lucas 11:20, nota; kompara ho Mateus 12:28.) Hanesan badaen ida uza ninia liman atu halo serbisu, Maromak uza ninia espíritu santu atu halo buat tuirmai:

•   Universu.​—Salmo 33:6; Isaias 66:1, 2.

•   Bíblia.​—2 Pedro 1:20, 21.

•   Milagre neʼebé ninia atan sira halo iha tempu uluk no serbisu haklaken neʼebé sira halo ho laran-manas.​—Lucas 4:18; Apóstolu 1:8; 1 Korinto 12:4-11.

•   Hahalok diʼak husi ema neʼebé halo tuir nia.​—Galásia 5:22, 23.

Espíritu santu la hanesan ho anju ida

 Hodi refere ba Maromak nia espíritu nuʼudar “liman”, “liman-fuan”, ka “iis”, Bíblia hatudu katak espíritu santu laʼós anju ida. (Éxodo 15:8, 10) Hanesan badaen nia liman labele serbisu ketak husi badaen nia isin no neon, nuneʼe mós Maromak nia espíritu santu bele serbisu deʼit tuir dalan neʼebé Maromak haruka. (Lucas 11:13) Bíblia kompara Maromak nia espíritu ho bee, no liga espíritu neʼe ho fiar no koñesimentu. Hodi kompara espíritu santu ho buat sira-neʼe, neʼe hatudu katak espíritu santu la hanesan ho anju sira neʼebé iha hanoin no sentimentu rasik.​—Isaias 44:3; Apóstolu 6:5; 2 Korinto 6:6.

 Bíblia fó sai Maromak Jeová no ninia Oan-Mane, Jesus Kristu nia naran, maibé Bíblia la fó sai katak espíritu santu iha naran rasik. (Isaias 42:8; Lucas 1:31) Bainhira ema Kristaun ida naran Estevão haree vizaun kona-ba lalehan liuhusi milagre ida, nia haree Jesus hamriik hela iha Maromak nia sorin, neʼe katak naʼin-rua deʼit laʼós tolu. Bíblia hatete: “Maibé Estevão, neʼebé nakonu ho espíritu santu, hateke ba lalehan no haree Maromak nia glória no Jesus hamriik iha Maromak nia liman sorin loos.” (Apóstolu 7:55) Espíritu santu mak Maromak nia forsa neʼebé nia uza atu ajuda Estevão haree vizaun neʼe.

 Hanoin neʼebé sala: Espíritu santu mak parte ba Trindade, hanesan temi iha Mateus 28:19, 20.

 Hanoin neʼebé loos: Iha Mateus 28:19, 20 Bíblia temi hamutuk Aman, Oan no espíritu santu. No ema balu dehan katak neʼe hatudu katak iha Trindade. Maibé lee toʼok versíkulu sira-neʼe. Iha ka lae liafuan ruma iha versíkulu neʼe neʼebé dehan katak sira tolu mak ida deʼit ho Maromak no iha kbiit, pozisaun no matenek hanesan ho Maromak? Lae, la iha. Nuneʼe mós ho eskritura seluk neʼebé temi Aman, Oan no espíritu santu.

 Hanoin neʼebé sala: Bíblia temi ema nia hahalok bainhira esplika kona-ba espíritu santu, ida-neʼe fó prova katak espíritu santu mak hanesan ho anju ida.

 Hanoin neʼebé loos: Dala ruma Bíblia temi ema nia hahalok bainhira esplika kona-ba espíritu santu. Porezemplu, Jesus bolu espíritu santu nuʼudar “ajuda-naʼin” (paráclitu) neʼebé sei fó sai prova, dirije, koʼalia, rona, fó glória no simu. (João 16:7-15) Maibé ida-neʼe la prova katak espíritu santu mak hanesan ho anju ida. Bíblia mós temi ema nia hahalok bainhira koʼalia kona-ba matenek, mate no sala. (Provérbios 1:20; Roma 5:17, 21) Porezemplu, Bíblia hatete katak matenek hatudu “hahalok”. Bíblia mós dehan katak sala iha kbiit atu lohi, oho no halo ema kaan buat oioin.​—Mateus 11:19; Lucas 7:35; Roma 7:8, 11.

 Hanoin neʼebé sala: Batizmu hodi espíritu santu nia naran prova katak espíritu santu mak anju ida.

 Hanoin neʼebé loos: Dala ruma Bíblia uza fraze “hodi naran” tanba naran neʼe reprezenta kbiit ka forsa. (Deuteronómio 18:​5, 19-​22; Ester 8:​10) Neʼe hanesan bainhira ema dehan katak sira “hodi nasaun nia naran”, neʼe la dehan katak nasaun mak ema ida. Nuneʼe mós ho ema ida neʼebé hetan batizmu “hodi espíritu santu nia naran”, ema neʼe rekoñese espíritu santu nia kbiit no dalan neʼebé Maromak uza espíritu santu atu kumpre ninia hakarak, maibé neʼe laʼós katak espíritu santu mak anju ida.​—Mateus 28:19.

 Hanoin neʼebé sala: Jesus nia apóstolu sira no dixípulu sira seluk fiar katak espíritu santu mak hanesan ho anju ida.

 Hanoin neʼebé loos: Bíblia la hatete ida-neʼe no mundu nia istória mós la fó sai ida-neʼe. Livru Encyclopædia Britannica esplika katak iha Enkontru iha Konstantinopla tinan 381 EC mak ema fó sai ideia foun neʼe katak espíritu santu mak hanesan ho anju ida. Neʼe akontese tinan 250 depois apóstolu ikus mate tiha.