Sala mak hahalok, sentimentu ka hanoin neʼebé kontra Maromak nia matadalan sira. Neʼe inklui halo hahalok neʼebé aat tuir Maromak nia haree hodi kontra ninia ukun-fuan. (1 João 3:4; 5:17) Bíblia mós dehan katak bainhira ema ida la halo buat neʼebé loos maski nia hatene kona-ba neʼe, nia halo ona sala.​—Tiago 4:17.

 Liafuan orijinál sira iha Bíblia kona-ba sala signifika “la kona”, hanesan bainhira ema ida hana rama-oan, maibé rama-oan neʼe la kona iha fatin neʼebé loos. Porezemplu, soldadu balu iha Izraél antigu matenek tebes tuda fatuk ho tali-baku no sempre “kona loos” buat neʼebé sira tuda. Fraze neʼe bele mós tradús nuʼudar “nunka halo sala” bainhira sira uza tali-baku. (Juís 20:16) Entaun, halo sala katak la kona loos Maromak nia matadalan neʼebé perfeitu.

 Nuʼudar Kriadór, Maromak iha direitu atu fó matadalan ba ema. (Apokalipse 4:11) Ita tenke hatán ba nia kona-ba buat neʼebé ita halo.​—Roma 14:12.

Iha dalan ba ema atu nunka halo sala ka lae?

 Lae. Bíblia hatete katak “ema hotu halo ona sala no labele haleno Maromak nia glória”. (Roma 3:23; 1 Reis 8:46; Eclesiastes 7:20; 1 João 1:8) Tanbasá?

 Maromak kria ema primeiru, Adão no Eva, tuir ninia ilas, no nia kria sira nuʼudar ema perfeitu neʼebé la halo sala. (Génesis 1:27) Maibé sira la sai tan ema perfeitu tanba sira kontra Maromak (Génesis 3:5, 6, 17-19) Bainhira sira iha oan, sira hatutan sala ba sira-nia bei-oan. (Roma 5:12) Liurai David iha Izraél antigu hatete: “Haʼu moris mai ho sala.”

Sala balu sériu liu fali sala seluk ka lae?

 Sin. Porezemplu, Bíblia hatete katak ema iha sidade Sodoma antigu mak “halo sala neʼebé aat tebes” no sira-nia sala “mak todan loos”. (Génesis 13:13; 18:20) Haree toʼok buat tolu neʼebé ajuda ita atu hatene se sala ida mak todan ka lae.

1.   Sala neʼe sériu ka lae. Bíblia fó avizu ba ita atu hasees an husi sala sériu hanesan sala seksuál, adora estátua, naʼok, lanu, hadau ema nia sasán, oho ema, no espiritizmu. (1 Korinto 6:9-11; Apokalipse 21:8) Bíblia esplika katak sala sira-neʼe la hanesan ho sala neʼebé ema halo la ho neon, hanesan sira-nia liafuan no hahalok neʼebé hakanek ema seluk nia laran. (Provérbios 12:18; Éfeso 4:31, 32) Maski nuneʼe, Bíblia anima ita atu hakaʼas an hodi la halo sala, tanba neʼe bele lori ita ba sala sériu neʼebé kontra Maromak nia ukun-fuan sira.​—Mateus 5:27, 28.

2.   Motivu. Ema balu halo sala tanba la hatene Maromak nia hakarak. (Apóstolu 17:30; 1 Timóteo 1:13) Maski neʼe sala duni, maibé Bíblia hatudu katak neʼe la hanesan ho ema neʼebé ho neon halo sala hodi kontra Maromak nia ukun-fuan. (Números 15:30, 31) Ema halo sala ho neon tanba sira-nia “laran neʼebé aat”.​—Jeremias 16:12.

3.   Sala neʼe halo dala hira. Bíblia mós halo diferensa entre sala neʼebé ema halo dala ida no sala neʼebé ema toman atu halo ba tempu kleur. (1 João 3:4-8) Ema neʼebé “halo beibeik sala ho neon” maski nia hatene ona oinsá atu halo hahalok loos, sei hetan kastigu makaʼas husi Maromak.​—Ebreu 10:26, 27.

 Ema neʼebé halo sala sériu bele sente laran-taridu demais tanba sala boot neʼebé nia halo. Porezemplu, Liurai David hakerek: “Haʼu-nia sala sira barak toʼo liu haʼu-nia ulun; sala sira-neʼe todan liu ba haʼu atu lori hanesan naha todan.” (Salmo 38:4) Maibé Bíblia fó esperansa tuirmai neʼe: “Ema aat tenke husik ninia dalan no ema laran-aat tenke husik ninia hanoin aat sira; husik nia fila fali ba Jeová, neʼebé sei hatudu laran-sadiʼa ba nia, fila fali ba ita-nia Maromak, tanba Maromak sei fó perdua ho laran-luak.”​—Isaias 55:7.