Matenek-naʼin sira kona-ba robot halo daudaun mákina sira neʼebé bele ajuda doutór atu halaʼo operasaun hodi koʼa ka halo kuak parte kiʼik deʼit, duké boot. Ema halo mákina sira hanesan neʼe hodi tuir kurita nia liman neʼebé fasil atu book an bá-mai.

 Hanoin toʼok: Kurita bele foti, kaer, no buti buat ruma ho ninia liman ualu neʼebé fasil atu book an, maski iha fatin neʼebé kloot. Kurita nia liman laʼós deʼit fasil atu book an ba diresaun naran deʼit, maibé mós bele halo toos ninia liman parte balu, se presiza.

 Matenek-naʼin sira fiar katak mákina nia liman neʼebé mamar ka fasil atu book an sei ajuda duni doutór sira kuandu halaʼo operasaun. Ho mákina hanesan neʼe, doutór sira bele halo operasaun kiʼik deʼit ba pasiente sira neʼebé loloos presiza operasaun boot.

 Haree toʼok kurita nia liman neʼebé book an

 Matenek-naʼin sira halo ona mákina ida ho liman hanesan neʼe, no doutór sira uza ida-neʼe hodi treinu ka pratika halo operasaun. Mákina nia liman neʼe naruk sentímetru 13,5 no parte ida husi liman neʼe bele hiʼit no kaer orgaun sira iha isin laran nuʼudar liman nia parte seluk halaʼo daudaun operasaun. Tuir doutór Tommaso Ranzani, neʼebé ajuda atu halo mákina neʼe, dehan: “Ami fiar katak lakleur tan ita bele inventa mákina foun neʼebé diʼak liu, no bele halo buat barak liután.”

 Ita hanoin oinsá? Kurita nia liman mosu mesak deʼit? Ka Maromak mak kria?