1 Korinto 14:1-40
14 Hakaʼas an atu hadomi malu, no hakaʼas an atu hetan prezente husi Maromak, liuliu prezente atu koʼalia nuʼudar profeta.
2 Basá ema neʼebé koʼalia lia oioin, nia koʼalia laʼós ba ema, maibé ba Maromak. Maski la iha ema ida rona, maibé nia koʼalia segredu santu liuhusi espíritu.
3 Maibé, ema neʼebé koʼalia nuʼudar profeta, nia halo ida-neʼe atu harii, fó laran-manas, no fó kmaan liuhusi ninia koʼalia.
4 Ema neʼebé koʼalia lia oioin harii ninia an rasik, maibé ema neʼebé koʼalia nuʼudar profeta harii kongregasaun.
5 No haʼu hakarak katak imi hotu koʼalia lia oioin, maibé diʼak liu se imi koʼalia nuʼudar profeta. Tuir loloos, koʼalia nuʼudar profeta mak diʼak liu duké koʼalia lia oioin. Tanba loloos, ema neʼebé koʼalia lia oioin sei la harii kongregasaun se nia la tradús.
6 Maibé maun-alin sira, se agora haʼu toʼo ba imi hodi koʼalia lia oioin, oinsá mak ida-neʼe sei ajuda imi? Se haʼu hakarak ajuda imi, haʼu tenke fó sai ba imi segredu ida husi Maromak ka koʼalia ho matenek ka koʼalia nuʼudar profeta ka fó sai hanorin ida.
7 Tuir loloos, buat sira neʼebé laiha moris hanesan flauta ka arpa bele fó sai lian múzika nian. Maibé, se ema huu flauta ka toka arpa hodi hasai lian ida deʼit, oinsá mak ema bele hatene múzika neʼe?
8 Neʼe duni, se trombeta ida la fó sai lian ho momoos, sé mak sei sai prontu atu bá funu?
9 Nuneʼe mós, se imi koʼalia liafuan neʼebé susar atu komprende, entaun oinsá mak ema sei hatene buat neʼebé imi dehan? Tuir loloos, imi sei koʼalia deʼit ba anin.
10 Iha lian barak iha mundu neʼe, no sira hotu iha folin.
11 Entaun se haʼu la komprende buat neʼebé ema koʼalia, haʼu sai hanesan ema estranjeiru ba ema neʼebé koʼalia neʼe, no ema neʼe sai hanesan estranjeiru ba haʼu.
12 No kona-ba imi, tanba imi hakarak tebes atu simu prezente husi espíritu santu, entaun buka bá atu sai nakonu ho prezente sira neʼebé sei harii kongregasaun.
13 Tan neʼe, ema neʼebé koʼalia lian seluk, harohan bá atu nia bele tradús.
14 Se haʼu halo orasaun ho lian ida seluk, haʼu halo orasaun tanba prezente husi espíritu santu, maibé iha haʼu-nia neon haʼu la komprende.
15 Entaun, haʼu sei halo saida? Haʼu sei halo orasaun ho prezente husi espíritu santu, maibé haʼu mós sei halo orasaun ho haʼu-nia neon. Haʼu sei kanta hahiʼi nian ho prezente husi espíritu, maibé haʼu mós sei kanta hahiʼi nian ho haʼu-nia neon.
16 Lae karik, kuandu ó fó hahiʼi ho prezente husi espíritu, oinsá mak ema baibain iha ó-nia leet sei dehan “Amen” ba ó-nia orasaun agradese nian, basá nia la hatene saida mak ó dehan?
17 Maski ó fó-agradese iha dalan neʼebé diʼak, maibé ó la harii ema neʼe.
18 Haʼu fó-agradese ba Maromak tanba haʼu koʼalia lian barak liu fali imi hotu.
19 Maski nuneʼe, iha kongregasaun laran haʼu hakarak hanorin hodi uza deʼit liafuan lima atu nuneʼe ema bele komprende, duké uza liafuan 10.000 iha lian seluk.
20 Maun-alin sira, keta sai hanesan labarik kiʼik kona-ba imi-nia kbiit atu hatene, maibé sai hanesan labarik kiʼik kona-ba hahalok aat; no sai boot ho imi-nia kbiit atu hatene.
21 Iha Ukun-Fuan hakerek nanis ona: “‘Ho lian estranjeiru nian no ho ibun ema estranjeiru nian haʼu sei koʼalia ba povu neʼe, maski nuneʼe sira lakohi atu rona ba haʼu’, Jeová dehan.”
22 Tan neʼe, koʼalia lia oioin laʼós nuʼudar sinál ba fiar-naʼin, maibé ba sira neʼebé laʼós fiar-naʼin, no koʼalia nuʼudar profeta laʼós ba sira neʼebé la fiar-naʼin, maibé ba fiar-naʼin.
23 Nuneʼe, se ema hotu iha kongregasaun halibur hamutuk iha fatin ida no sira hotu koʼalia lia oioin, maibé ema baibain ka ema neʼebé laʼós fiar-naʼin mai, sira sei dehan katak imi bulak, loos ka lae?
24 Maibé se imi hotu koʼalia nuʼudar profeta no ema neʼebé laʼós fiar-naʼin ka ema baibain mai, imi-nia liafuan sira sei book nia laran no tesi lia ba nia, atu nuneʼe nia haree didiʼak ba ninia an rasik.
25 No nia sei hatene buat neʼebé subar hela iha ninia laran, atu nuneʼe nia sei hakruʼuk an no adora Maromak, no dehan sai: “Maromak iha duni imi-nia leet.”
26 Neʼe duni maun-alin sira, imi presiza halo saida? Kuandu imi halibur hamutuk, ema ida iha salmu, ema seluk iha hanorin ida, ema seluk fali hatudu sai segredu ida, ema seluk koʼalia lia oioin, no ema seluk tan tradús. Halo buat hotu atu hametin malu.
27 No kona-ba koʼalia iha lian seluk, diʼak liu atu ema naʼin-rua ka tolu deʼit mak koʼalia ida-neʼe hodi bele troka malu; no ema seluk tenke tradús.
28 Maibé se la iha ema atu tradús, nia sei nonook deʼit iha kongregasaun laran no koʼalia deʼit ba nia an no ba Maromak.
29 Liután neʼe, diʼak atu profeta naʼin-rua ka tolu mak koʼalia, no sira seluk buka-hatene liafuan sira-neʼe katak sá.
30 Maibé se ema ida simu liafuan husi Maromak nuʼudar nia tuur hela iha neʼebá, diʼak ba ida neʼebé koʼalia uluk atu nonook deʼit.
31 Tanba imi hotu bele koʼalia nuʼudar profeta hodi troka malu, atu nuneʼe imi hotu bele aprende no bele hetan laran-manas.
32 No profeta sira tenke kontrola dalan neʼebé sira uza prezente husi espíritu.
33 Basá Maromak laʼós Maromak runguranga nian, maibé Maromak dame nian.
Hanesan iha santu sira-nia kongregasaun hotu,
34 diʼak atu feto sira kontinua nonook iha kongregasaun laran, tanba la iha lisensa ba sira atu koʼalia, maibé diʼak ba sira atu hakruʼuk an hanesan Ukun-Fuan mós hatete.
35 Entaun, se sira hakarak atu aprende buat ruma, sira tenke husu sira-nia laʼen iha uma, tanba se feto ida koʼalia iha kongregasaun laran neʼe mak buat neʼebé aat tebes.
36 Maromak nia liafuan hahú husi imi ka? No ida-neʼe hatoʼo deʼit ba imi ka?
37 Se ema ruma hanoin katak nia mak profeta ida ka hetan prezente husi espíritu santu, nia tenke simu katak buat neʼebé haʼu hakerek ba imi mak Naʼi nia ukun-fuan.
38 Maibé se ema ruma la komprende, nia sei kontinua hanesan neʼe.
39 Tan neʼe maun-alin sira, hakaʼas an hodi hetan prezente atu koʼalia nuʼudar profeta, maibé keta bandu ema atu koʼalia lia oioin.
40 Maibé halo buat hotu iha dalan neʼebé loloos no momoos.
