João 19:1-42
19 Entaun, Pilatos haruka soldadu sira atu lori Jesus no baku ho xikote.
2 No soldadu sira bobar ai-tarak hodi halo koroa ida no sira tau iha nia ulun, no sira mós tau hena kór-uvas ba nia;
3 no sira hakbesik ba nia no dehan: “Dame hela ho Ita-Boot, Liurai judeu sira-nian!” No sira mós basa nia oin.
4 No Pilatos sai fali ba liʼur hodi dehan ba sira: “Haree! Haʼu lori sai nia mai liʼur atu nuneʼe imi bele hatene katak haʼu la hetan sala ida iha nia.”
5 Ho ida-neʼe, Jesus sai mai liʼur ho koroa ai-tarak iha nia ulun no hatais hena kór-uvas. No Pilatos dehan ba sira: “Haree! Nia mak neʼe!”
6 Maibé, kuandu ulun-naʼin amlulik sira no guarda sira haree nia, sira hakilar dehan: “Hedi nia! Hedi nia!” Pilatos hatete ba sira: “Imi rasik mak lori nia bá no hedi, tanba haʼu la hetan sala ida iha nia.”
7 Ema judeu sira hatán: “Ami iha ukun-fuan ida, no tuir ukun-fuan neʼe nia tenke mate tanba nia halo nia an nuʼudar Maromak nia oan.”
8 No kuandu Pilatos rona buat neʼebé sira dehan, nia sai taʼuk liután;
9 no nia tama fali ba governadór nia palásiu no husu ba Jesus: “Ó mai husi neʼebé?” Maibé Jesus la hatán buat ida ba nia.
10 Tan neʼe Pilatos dehan: “Ó la hatán buat ida ba haʼu ka? Ó la hatene katak haʼu iha kbiit atu halo ó livre no haʼu mós iha kbiit atu hedi ó?”
11 Jesus dehan ba nia: “Se Ita-Boot la simu kbiit husi leten, Ita la iha kbiit atu halo buat ruma kontra haʼu. Tan neʼe, ema neʼebé entrega haʼu ba Ita-nia liman, nia mak iha sala boot liu fali Ita.”
12 Ho ida-neʼe Pilatos kontinua buka dalan atu husik nia livre. Maibé ema judeu sira hakilar dehan: “Se Ita husik mane neʼe livre, Ita laʼós Liurai Roma* nia belun. Ema naran deʼit neʼebé halo nia an nuʼudar liurai ida, nia koʼalia kontra Liurai Roma nian.”
13 No rona tiha ida-neʼe, Pilatos lori Jesus sai ba liʼur, no Pilatos tuur iha kadeira tesi-lia nian iha fatin neʼebé bolu nuʼudar Fatin Fatuk nian* no iha lia-ebraiku bolu nuʼudar Gabata.
14 Iha tempu neʼe mak loron atu prepara ba Festa Salvasaun nian; no oras neʼe maizumenus tuku sanulu-resin-rua meiudia. Pilatos dehan ba ema judeu sira: “Haree bá! Imi-nia liurai mak neʼe!”
15 Maibé, sira hakilar dehan: “Lori nia bá! Lori nia bá! Hedi nia!” Pilatos hatete ba sira: “Haʼu tenke hedi imi-nia liurai ka?” Ulun-naʼin amlulik sira hatán: “Ami la iha liurai seluk só deʼit Liurai Roma nian.”
16 Neʼe duni, Pilatos fó nia ba sira no sira lori nia bá atu hedi.
Tuirmai sira lori Jesus bá.
17 No Jesus lori nia ai-riin terus nian, no sai hodi bá fatin ida neʼebé bolu nuʼudar Fatin Ulun-Ruin nian, iha lia-ebraiku bolu nuʼudar Gólgota;
18 no sira hedi nia iha neʼebá, no sira mós tau ema naʼin-rua ho nia, ida iha sorin loos no ida iha sorin karuk, no Jesus iha klaran.
19 Pilatos hakerek liafuan iha ai-kabelak ida no tau iha ai-riin terus nian. Liafuan neʼe dehan: “Jesus Nazaré, Liurai judeu sira-nian.”
20 No tanba fatin neʼebé ema hedi Jesus mak besik sidade, entaun ema judeu barak lee liafuan sira-neʼe; no liafuan sira-neʼe hakerek iha lia-ebraiku, latín no gregu.
21 Tan neʼe, ema judeu sira-nia ulun-naʼin amlulik nian hahú dehan ba Pilatos: “Keta hakerek ‘Liurai judeu sira-nian’, maibé hakerek katak mane neʼe dehan: ‘Haʼu mak Liurai judeu sira-nian.’”
22 Pilatos hatán: “Buat neʼebé haʼu hakerek, haʼu hakerek ona!”
23 No kuandu soldadu sira hedi tiha Jesus, sira foti ninia unuk neʼebé nia uza iha liʼur no fahe ba haat, ida ba soldadu ida. Sira mós foti ninia unuk neʼebé nia uza iha laran. No unuk neʼe la suku hamutuk, maibé ema soru tomak deʼit husi leten toʼo okos.
24 Ho ida-neʼe sira dehan ba malu: “Keta lees fahe unuk neʼe, maibé mai ita dada sorte atu hatene sé mak sei hetan unuk neʼe.” Ida-neʼe mosu hodi kumpre eskritura neʼebé dehan: “Sira fahe haʼu-nia unuk liʼur, no kona-ba haʼu-nia unuk laran sira dada sorte.” No buat neʼebé soldadu sira halo mak tuir duni buat neʼebé eskritura dehan.
25 No Jesus nia inan, no nia inan nia alin, no Maria neʼebé Klopas nia feen, no mós Maria Madalena hamriik besik Jesus nia ai-riin terus nian.
26 Tan neʼe, kuandu Jesus haree ninia inan no mós dixípulu ida neʼebé nia hadomi hamriik besik, nia dehan ba ninia inan: “Feto, haree bá! Ita-nia oan!”
27 Tuirmai, nia dehan ba dixípulu neʼe: “Haree bá! Ó-nia inan!” No hahú husi tempu neʼebá dixípulu neʼe lori nia ba ninia uma rasik.
28 Depois neʼe, Jesus hatene katak toʼo agora nia halo tiha ona buat hotu neʼebé ninia Aman haruka. Tuirmai nia dehan: “Haʼu hamrook.” Nia koʼalia ida-neʼe atu bele kumpre eskritura.
29 Iha neʼebá, iha buli ida neʼebé nakonu ho tua-uvas siin. Tan neʼe sira habokon esponja iha tua-uvas siin no tau iha ai-sanak* no lolo ba nia ibun.
30 No kuandu Jesus koko tiha tua-uvas siin neʼe, nia dehan: “Buat hotu kumpre ona!” no nia hakruʼuk nia ulun no iis kotu.
31 Loron neʼe mak loron Prepara nian, no loron Sábadu neʼe mak loron-boot ida. Tan neʼe, ema judeu sira husu Pilatos atu halo tohar ema sira-neʼe nia ain no hasai tiha sira-nia mate-isin, atu nuneʼe sira-nia mate-isin labele hela nafatin iha ai-riin terus nian iha loron Sábadu.
32 Tan neʼe, soldadu sira mai hodi halo tohar ema naʼin-rua nia ain, sira neʼebé tau iha ai-riin iha Jesus nia sorin-sorin.
33 Maibé kuandu sira toʼo ba Jesus, sira haree nia mate ona, nuneʼe sira la halo tohar nia ain.
34 Maski nuneʼe, soldadu ida sona ninia sorin ho diman, no bee ho raan suli sai kedas.
35 No ema neʼebé haree ida-neʼe mak fó sasin, no ninia sasin mak loos. No ema neʼe hatene katak buat neʼebé nia koʼalia mak loos, atu nuneʼe imi mós bele fiar.
36 Tuir loloos, buat sira-neʼe mosu atu eskritura tuirmai neʼe bele sai loos: “Ninia ruin ida sei la tohar.”
37 No mós, eskritura seluk dehan: “Sira sei hateke ba Ida neʼebé sira sona ho diman.”
38 Liutiha buat sira-neʼe, José husi Arimateia, neʼebé mós Jesus nia dixípulu ida, maibé subasubar deʼit tanba taʼuk ema judeu sira, nia mai hodi husu Pilatos se nia bele foti Jesus nia mate-isin; no Pilatos fó lisensa ba nia. Tan neʼe nia bá no foti Jesus nia mate-isin.
39 No Nicodemos, ema neʼebé mai hasoru Jesus dala primeiru iha kalan, mós mai no lori buat morin rua naran mirra no ai-aloés, maizumenus kilograma tolunulu.
40 Entaun, sira foti Jesus nia mate-isin no falun ho hena diʼak hamutuk ho buat morin sira-neʼe, hodi tuir ema judeu sira-nia toman kona-ba prepara mate-isin atu hakoi.
41 No fatin neʼebé ema hedi Jesus iha jardín ida, no jardín neʼe iha rate foun ida neʼebé seidauk uza atu hakoi ema.
42 No tanba neʼe mak loron Prepara nian ba ema judeu sira, nuneʼe sira tau Jesus iha rate neʼe, basá rate neʼe mak besik liu.
