João 20:1-31
20 Iha loron primeiru semana nian, kuandu rai sei nakukun hela, Maria Madalena bá sedu toʼo rate, no nia haree katak fatuk duir sai tiha ona husi rate.
2 Tan neʼe, nia halai hodi bá hasoru Simão Pedro no mós dixípulu ida seluk neʼebé Jesus hadomi, no nia dehan ba sira: “Sira foti tiha ona Naʼi husi rate, no ami la hatene sira tau nia iha neʼebé.”
3 Ho ida-neʼe, Pedro no dixípulu ida seluk sai hodi bá rate.
4 Sira naʼin-rua halai hamutuk, maibé dixípulu ida seluk halai lalais liu fali Pedro no nia toʼo uluk iha rate.
5 No kuandu nia hakruʼuk hodi hateke ba laran, nia haree hena latan hela, maibé nia la tama ba laran.
6 No Simão Pedro mós toʼo tuir nia iha fatin neʼe, no Simão tama ba rate laran no nia haree hena sira neʼebé latan hela.
7 No hena neʼebé kesi nia ulun la latan hamutuk ho hena sira seluk, maibé lulun tiha hodi tau ketak.
8 Tuirmai, dixípulu ida seluk neʼebé toʼo uluk rate mós tama ba laran, no nia haree no fiar.
9 Basá sira seidauk komprende eskritura neʼebé dehan katak nia tenke moris hiʼas husi mate.
10 Entaun dixípulu sira-neʼe fila fali ba sira-nia uma.
11 Maibé, Maria kontinua hamriik iha liʼur besik rate hodi tanis. Tuirmai, nuʼudar nia tanis hela, nia hakruʼuk hodi hateke ba rate laran,
12 no nia haree anju rua ho hatais mutin tuur hela iha fatin neʼebé uluk ema tau Jesus nia mate-isin, ida tuur iha ulun no ida tuur iha ain.
13 No sira dehan ba nia: “Feto, tansá mak ó tanis?” Nia dehan: “Sira foti tiha haʼu-nia Naʼi, no haʼu la hatene sira tau nia iha neʼebé.”
14 Koʼalia tiha buat sira-neʼe, nia fila no haree Jesus hamriik hela, maibé nia la hatene neʼe mak Jesus.
15 Jesus hatete ba nia: “Feto, tansá ó tanis? Ó buka sé?” Maria hanoin katak nia mak ema neʼebé tau matan ba jardín, tan neʼe Maria dehan: “Señór, se Ita mak foti tiha nia karik, fó-hatene mai haʼu, Ita tau nia iha neʼebé, no haʼu bele lori nia bá.”
16 Jesus hatete ba nia: “Maria!” No kuandu fila oin tiha, nia dehan ba Jesus, iha lia-ebraiku: “Raboni!” (katak “Mestre!”)
17 Jesus hatete ba nia: “Keta kaer metin haʼu. Tanba haʼu seidauk saʼe ba Aman. Maibé ó bá hasoru haʼu-nia belun sira no dehan ba sira: ‘Haʼu sei saʼe ba haʼu-nia Aman no imi-nia Aman no haʼu-nia Maromak no imi-nia Maromak.’”
18 Maria Madalena lori liafuan ba dixípulu sira hodi dehan: “Haʼu haree ona Naʼi!” No nia konta ba sira buat neʼebé Naʼi dehan.
19 Iha loron neʼe, katak loron primeiru semana nian, kuandu rai kalan ona, dixípulu sira halibur hamutuk no odamatan hotu xave tanba sira taʼuk ema judeu sira. No iha tempu neʼe Jesus mai no hamriik iha sira-nia klaran no dehan ba sira: “Dame hela ho imi.”
20 Dehan tiha ida-neʼe, nia hatudu ba sira ninia liman rua no nia sorin. Tuirmai, dixípulu sira haksolok tanba haree ona Naʼi.
21 No Jesus dehan tan ba sira: “Dame hela ho imi. Hanesan Aman haruka haʼu mai, haʼu mós sei haruka imi.”
22 Koʼalia tiha ida-neʼe, nia huu ba sira no dehan: “Simu espíritu santu bá.
23 Se imi perdua ema ida nia sala, Maromak perdua ona sira-nia sala; se imi la perdua ema ida nia sala, nia sala iha nafatin.”
24 Maibé Tomé, ida husi sira naʼin sanulu-resin-rua, neʼebé mós bolu nuʼudar Kaduak, nia la hamutuk ho sira kuandu Jesus mai.
25 Tan neʼe, dixípulu sira seluk dehan ba nia: “Ami haree ona Naʼi!” Maibé nia dehan ba sira: “Se haʼu seidauk haree pregu-fatin iha nia liman sira no haʼu seidauk hatama haʼu-nia liman-fuan iha pregu-fatin neʼe no seidauk hatama haʼu-nia liman ba nia sorin, haʼu sei la fiar duni.”
26 No loron ualu liu tiha, ninia dixípulu sira halibur hamutuk fali iha uma laran no Tomé mós hamutuk ho sira. Maski odamatan xave hela, maibé Jesus mai no hamriik iha sira-nia klaran no dehan: “Dame hela ho imi.”
27 Tuirmai Jesus dehan ba Tomé: “Tau ó-nia liman-fuan iha haʼu-nia liman, no haree haʼu-nia liman sira, no hatama ó-nia liman ba haʼu-nia sorin, no keta duvida tan, maibé fiar bá.”
28 Tomé hatán dehan: “Haʼu-nia Naʼi, no haʼu-nia Maromak!”
29 Jesus hatete ba nia: “Tanba ó haree haʼu mak ó fiar ka? Ksolok ba sira neʼebé fiar maski la haree.”
30 Tuir loloos, Jesus mós halo milagre barak tan iha dixípulu sira-nia oin, no buat sira-neʼe la hakerek iha livru neʼe.
31 Maibé kona-ba buat sira neʼebé hakerek ona, ida-neʼe atu imi bele fiar katak Jesus mak Kristu, Maromak nia Oan-Mane, no mós tanba fiar neʼe, imi bele iha moris liuhusi nia naran.
