João 21:1-25
21 Liutiha buat sira-neʼe, Jesus mosu fali ba ninia dixípulu sira besik Tasi Tiberiades; nia mosu ba sira iha dalan hanesan tuirmai neʼe.
2 Simão Pedro, Tomé, neʼebé bolu nuʼudar Kaduak, Natanael husi Kaná iha Galileia, Zebedeu nia oan-mane sira, no mós dixípulu rua seluk halibur hamutuk iha neʼebá.
3 Simão Pedro dehan ba sira: “Haʼu atu bá kaer ikan.” Sira dehan ba nia: “Ami mós bá hotu ho Ita.” Nuneʼe sira bá no saʼe ró, maibé durante kalan neʼe sira la hetan ikan ida.
4 Kuandu rai naroman ona, Jesus hamriik iha tasi-ibun, maibé ninia dixípulu sira la hatene katak neʼe mak Jesus.
5 Tuirmai Jesus dehan ba sira: “Belun sira, imi iha buat ruma atu han ka lae?” Sira hatán ba nia: “La iha.”
6 Nia dehan ba sira: “Soe imi-nia rede iha ró nia sorin loos no imi sei hetan ikan.” Ho ida-neʼe sira soe sira-nia rede, no sira la bele dada sai tanba ikan barak tebes.
7 Tan neʼe dixípulu ida neʼebé Jesus hadomi dehan ba Pedro: “Neʼe mak Naʼi!” Kuandu Pedro rona ida-neʼe, nia tau fali ninia hatais, basá nia isin-tanan, no nia haksoit ba tasi laran.
8 Maibé dixípulu seluk neʼebé nafatin iha ró kiʼik laran mós sai tuir nia hodi dada rede neʼebé nakonu ho ikan, basá sira ladún dook husi rai-maran, maizumenus metru atus ida.
9 Maibé kuandu sira toʼo rai-maran, sira haree ahi-klaak ho ikan iha leten no mós paun.
10 Jesus hatete ba sira: “Lori mai ikan balu neʼebé imi foin kaer.”
11 Nuneʼe, Simão Pedro saʼe ba ró no dada rede ba tasi-ibun, rede neʼe nakonu ho ikan boot hamutuk 153. Maski iha ikan barak maibé rede neʼe la naklees.
12 Jesus hatete ba sira: “Mai, han imi-nia matabixu.” No dixípulu ida mós la brani atu husu: “Ita mak sé?” tanba sira hatene katak nia mak Naʼi.
13 Jesus mai no foti paun hodi fó ba sira, no nia mós halo hanesan ho ikan.
14 No neʼe mak dala tolu neʼebé Jesus mosu ba nia dixípulu sira depois nia moris hiʼas husi mate.
15 No kuandu sira matabixu hotu tiha, Jesus dehan ba Simão Pedro: “Simão, João nia oan, ó hadomi* haʼu liu fali sira-neʼe ka lae?” Nia hatán: “Sin, Naʼi, Ita hatene katak haʼu hadomi* Ita.” Jesus dehan ba nia: “Fó-han haʼu-nia bibi-oan sira.”
16 Ba dala segundu Jesus dehan tan ba nia: “Simão, João nia oan, ó hadomi* haʼu ka lae?” Nia hatete ba Jesus: “Sin, Naʼi, Ita hatene katak haʼu hadomi* Ita.” Jesus dehan: “Tau matan ba haʼu-nia bibi-oan sira.”
17 Ba dala terseiru Jesus dehan ba nia: “Simão, João nia oan, ó hadomi* haʼu ka lae?” Ho ida-neʼe Pedro sai triste tanba Jesus husu dala tolu ona hodi dehan: “Ó hadomi haʼu ka lae?” Entaun nia hatete ba Jesus: “Naʼi, Ita hatene buat hotu; Ita hatene katak haʼu hadomi* Ita.” Jesus dehan: “Fó-han haʼu-nia bibi-oan sira.
18 Tebes haʼu hatete loloos ba ó: Kuandu ó sei joven, ó mak hatais rasik no laʼo bá-mai tuir ó-nia hakarak. Maibé kuandu ó sai katuas ona, ó sei lolo ó-nia liman no ema seluk mak sei fó-hatais ó no lori ó ba fatin neʼebé ó lakohi.”
19 Jesus koʼalia ida-neʼe hodi hatudu oinsá mak Pedro sei mate hodi fó glória ba Maromak. No dehan tiha ida-neʼe, Jesus hatete ba Pedro: “Kontinua laʼo tuir haʼu.”
20 Kuandu Pedro fila oin, nia haree dixípulu ida neʼebé Jesus hadomi laʼo tuir sira, nia mak ida neʼebé mós tuur besik Jesus kuandu han-kalan no dehan: “Naʼi, sé mak sei entrega Ita ba inimigu?”
21 Nuneʼe, kuandu Pedro haree nia, Pedro dehan ba Jesus: “Naʼi, nia sei halo saida?”
22 Jesus dehan ba nia: “Se haʼu hakarak katak nia hela nafatin toʼo haʼu mai fali, tansá ó hanoin barak kona-ba neʼe? Ó kontinua laʼo tuir haʼu.”
23 Ho ida-neʼe, liafuan sira-neʼe toʼo ba dixípulu sira katak, dixípulu neʼe sei la mate. Tuir loloos, Jesus la dehan katak dixípulu neʼe sei la mate, maibé dehan: “Se haʼu hakarak katak nia hela nafatin toʼo haʼu mai fali, tansá ó hanoin barak kona-ba neʼe?”
24 Neʼe mak dixípulu neʼebé fó sasin kona-ba buat sira-neʼe no hakerek buat sira-neʼe, no ita hatene katak sasin neʼebé nia fó mak loos.
25 Tuir loloos, Jesus halo buat barak tan, maibé se hakerek hotu buat sira-neʼe, haʼu hanoin katak mundu neʼe rasik mós sei la iha fatin atu rai livru sira-neʼe.
