Ebreu 3:1-19
3 Tan neʼe, maun-alin santu sira, neʼebé parte husi sira neʼebé Maromak bolu ona atu bá lalehan, imi hanoin didiʼak kona-ba Jesus; nia mak apóstolu no amlulik boot neʼebé ita fó sai katak ita fiar.
2 Nia laran-metin ba Maromak neʼebé hili ona nia, hanesan Moisés mós serbí ho laran-metin iha Maromak nia uma.
3 Basá glória neʼebé Jesus simu mak boot liu fali Moisés nian, tanba ida neʼebé harii uma hetan glória neʼebé boot liu fali uma neʼe.
4 Klaru katak, uma ida-idak ema mak harii, maibé ida neʼebé harii buat hotu mak Maromak.
5 No Moisés serbí ho laran-metin nuʼudar atan iha Maromak nia uma, no ninia serbisu sai nuʼudar sasin ba buat neʼebé sei fó sai iha futuru,
6 maibé Kristu hatudu ona laran-metin nuʼudar Oan-Mane hodi tau matan ba Maromak nia uma. No ita mak Maromak nia uma, só deʼit se ita kaer metin toʼo rohan ba ita-nia aten-brani atu koʼalia no mós kaer metin ba ita-nia esperansa ho haksolok.
7 Tan neʼe mak espíritu santu dehan: “Se ohin loron imi rona ba haʼu-nia lian,
8 keta halo toos imi-nia laran hanesan iha tempu neʼebé imi-nia beiʼala sira halo haʼu hirus tebes, iha loron neʼebé sira koko haʼu iha rai-fuik,
9 no maski sira haree ona haʼu-nia hahalok sira ba tinan haatnulu, maibé sira koko haʼu.
10 Tan neʼe mak haʼu hakribi ba jerasaun neʼe no dehan: ‘Sira-nia laran sempre dook husi haʼu, no sira la hatene haʼu-nia dalan sira.’
11 Entaun ho hirus haʼu jura katak, ‘Sira sei la tama iha haʼu-nia fatin deskansa nian.’”
12 Matan-moris bá, maun-alin sira, atu imi labele haburas laran-aat neʼebé la iha fiar hodi hadook an husi Maromak neʼebé moris;
13 maibé kontinua fó laran-manas ba malu loron-loron bainhira sei iha tempu neʼebé bolu nuʼudar “ohin loron”, atu nuneʼe imi-nia laran la sai toos tanba sala nia kbiit atu lohi.
14 Tanba tuir loloos ita sei sai parte ba Kristu só deʼit se ita kaer metin ba fiar uluk nian toʼo rohan.
15 Hanesan hatete nanis ona: “Se ohin loron imi rona ba haʼu-nia lian, keta halo toos imi-nia laran hanesan iha tempu neʼebé imi-nia beiʼala sira halo haʼu hirus tebes.”
16 Sé mak sira neʼebé rona maibé halo nia hirus tebes? Tuir loloos, sira mak ema neʼebé Moisés lori sai husi Ejitu, loos ka lae?
17 Liután neʼe, sé mak Maromak hakribi ba tinan haatnulu? Sira mak ema neʼebé halo sala, no sira-nia mate-isin monu iha rai-fuik, loos ka lae?
18 No ba sé mak nia jura katak sira sei la tama iha ninia fatin deskansa nian? Sira mak ema neʼebé kontra nia, loos ka lae?
19 Entaun ita hatene katak sira la bele tama tanba sira la iha fiar.
