Filemon 1:1-25
1 Husi Paulo, dadur-naʼin tanba Kristu Jesus, no Timóteo ita-nia alin, ba Filemon, ami-nia maluk serbisu-naʼin neʼebé ami hadomi,
2 no ba Ápia, ami-nia feton, no ba Arkipo, ami-nia maluk funu-naʼin, no ba kongregasaun neʼebé iha ó-nia uma:
3 Haʼu harohan katak ita-nia Aman Maromak no Naʼi Jesus Kristu sei hatudu laran-diʼak ba imi no haraik dame ba imi.
4 Haʼu sempre fó-agradese ba Maromak kuandu haʼu temi kona-ba ó iha haʼu-nia orasaun,
5 tanba haʼu rona beibeik kona-ba ó-nia domin no fiar neʼebé ó hatudu ba Naʼi Jesus no ba santu sira.
6 Haʼu harohan atu fiar neʼebé ó hatudu bele book ó atu hatene buat diʼak hotu neʼebé ita simu liuhusi Kristu.
7 Haʼu hetan ksolok boot no sente kmaan tanba ó-nia domin, basá santu sira sai laran-manas fali liuhusi ó, haʼu-nia maluk fiar-naʼin.
8 Tan razaun neʼe, maski haʼu bele koʼalia ho aten-brani liuhusi Kristu hodi haruka ó atu halo buat neʼebé loos,
9 maibé diʼak liu ba haʼu atu fó laran-manas ba ó atu halo ida-neʼe tan ó-nia domin, basá haʼu Paulo, haʼu idade ona no agora haʼu iha dadur laran tanba Kristu Jesus.
10 Haʼu husu ó kona-ba haʼu-nia oan, Onésimo, basá haʼu sai ona hanesan aman ba nia iha haʼu-nia situasaun nuʼudar dadur.
11 Uluk nia la iha folin ba ó maibé agora nia folin-boot ba ó no ba haʼu.
12 Haʼu haruka nia ba ó, sin, nia mak ida neʼebé haʼu hadomi.
13 Haʼu hakarak atu nia hela hamutuk ho haʼu iha neʼe durante haʼu iha dadur tanba liafuan diʼak, atu nuneʼe nia bele kontinua ajuda haʼu hodi taka ó-nia fatin.
14 Maibé haʼu lakohi halo buat ida se la hetan lisensa husi ó, atu nuneʼe ó halo buat diʼak laʼós tanba haʼu obriga, maibé tanba ó-nia hakarak rasik.
15 Karik tan razaun neʼe mak nia haketak an husi ó ba tempu uitoan, atu nuneʼe ó bele simu fali nia ba nafatin,
16 laʼós tan nuʼudar atan, maibé liu fali atan, nuʼudar maluk fiar-naʼin. Haʼu hadomi tebes nia, maibé ó sei hadomi nia liután nuʼudar atan no mós nuʼudar maluk fiar-naʼin iha Naʼi.
17 Tan neʼe, se ó haree haʼu nuʼudar maluk fiar-naʼin, simu nia bá ho laran-diʼak hanesan ó simu haʼu.
18 Liután neʼe, se nia halo sala ruma ba ó ka debe buat ruma husi ó, husik haʼu mak lori ninia todan.
19 Haʼu Paulo, haʼu hakerek ho haʼu-nia liman rasik katak haʼu sei selu fali buat neʼebé Onésimo debe. Tuir loloos, ó hatene katak ó iha tusan ba haʼu kona-ba ó-nia moris rasik.
20 Sin, haʼu-nia alin, haʼu hein katak haʼu bele simu ajuda neʼe husi ó iha Naʼi; fó kmaan ba haʼu-nia laran iha Kristu.
21 Haʼu fiar metin katak ó sei halo tuir ida-neʼe, tan neʼe mak haʼu hakerek ba ó, tanba haʼu hatene katak ó sei halo barak liu fali buat neʼebé haʼu dehan.
22 Maibé hamutuk ho ida-neʼe, ó prepara mós fatin ba haʼu atu hela, tanba haʼu hein katak liuhusi imi-nia orasaun sira haʼu sei fila fali ba imi.
23 Epafras, haʼu-nia maluk iha dadur tanba Kristu Jesus, haruka ninia kumprimentus ba ó,
24 nuneʼe mós ho Marcos, Aristarko, Demas, no Lucas, haʼu-nia maluk serbisu-naʼin sira.
25 Haʼu harohan katak ita Naʼi Jesus Kristu nia laran-diʼak neʼebé boot sei hamutuk ho imi tuir hahalok diʼak neʼebé imi hatudu.
