Koloso 2:1-23
2 Basá haʼu hakarak imi atu hatene kona-ba oinsá haʼu hakaʼas an makaʼas ba imi no ba sira neʼebé iha Laodiseia no mós ba sira hotu neʼebé seidauk haree haʼu-nia oin.
2 Haʼu halo neʼe atu ema hotu nia laran bele hetan kmaan no sira bele sai ida deʼit iha domin. Nuneʼe sira bele hetan rikusoin hotu hodi komprende no hetan matenek loloos kona-ba Maromak nia segredu santu, katak Kristu.
3 Matenek nia rikusoin hotu subar iha nia.
4 Haʼu koʼalia ida-neʼe atu ema ida labele lohi imi ho liafuan midar oioin.
5 No maski loos katak haʼu la hamutuk ho imi iha isin, maibé haʼu-nia laran hamutuk ho imi, haʼu haksolok atu haree oinsá imi laʼo ho didiʼak no imi-nia fiar metin ba Kristu.
6 Tan neʼe, nuʼudar imi simu ona ita-nia Naʼi Kristu Jesus, kontinua laʼo hamutuk ho nia.
7 Hanesan ai nia abut neʼebé metin, imi tenke hamriik metin iha Jesus hodi tuir buat neʼebé imi aprende ona, no kuandu imi fó-agradese ba Maromak, imi-nia fiar bele sai nakonu liután.
8 Kuidadu bá atu ema ida la kaer imi ho lasu liuhusi ema nia matenek no hanorin bosok neʼebé la iha folin. Buat sira-neʼe tuir deʼit ema nia lisan no tuir dalan mundu neʼe nian, laʼós tuir Kristu.
9 Basá Maromak nia hahalok hotu kompletu iha nia.
10 No imi sai kompletu ona liuhusi nia, neʼebé nuʼudar ulun ba governu hotu no ukun-naʼin hotu.
11 Liuhusi nia mak imi mós hetan ona sirkunsizaun, laʼós ho ema nia liman maibé hodi hasai hahalok sala husi isin, tanba neʼe mak dalan neʼebé Kristu nia atan sira hetan sirkunsizaun.
12 Basá hodi hetan batizmu iha nia, imi hakoi tiha ona hamutuk ho nia, no liuhusi nia mak imi mós moris fali hamutuk ho nia tanba imi-nia fiar ba Maromak nia kbiit. Maromak mak ida neʼebé halo nia moris hiʼas husi mate.
13 Liután neʼe, maski imi mate ona iha imi-nia sala sira no imi mós la hetan sirkunsizaun iha imi-nia isin, maibé Maromak halo imi moris hamutuk ho nia. Nia ho laran-diʼak fó perdua ba ita-nia sala hotu
14 no nia hamoos tiha ukun-fuan neʼebé kontra ita, neʼebé inklui mandamentu sira. Nia hasai tiha ida-neʼe hodi hedi iha ai-riin terus nian.
15 No liuhusi ai-riin terus nian neʼe, nia manán tiha governu sira no ukun-naʼin sira no lori sira nuʼudar dadur, nia hamoe sira iha ema barak nia oin hodi hatudu sai katak nia manán sira.
16 Nuneʼe, keta husik ema ida tesi lia ba imi kona-ba buat neʼebé imi han no hemu ka kona-ba selebra festa ka fulan foun ka loron Sábadu;
17 tanba buat sira-neʼe mak nuʼudar lalatak husi buat neʼebé atu mai, maibé buat neʼebé loloos mak Kristu.
18 Ema balu hatudu haraik-an ho finje deʼit no adora anju sira, maibé keta husik ema hanesan neʼe hanetik imi atu hetan imi-nia kolen. Sira gaba an kona-ba buat neʼebé sira haree. No sira sai foti-an kona-ba buat neʼebé la iha folin tanba sira hanoin tuir isin deʼit.
19 Ema hanesan neʼe la kaer metin ba ulun, katak ida neʼebé fó buat neʼebé isin tomak presiza, no halo parte ida-idak tutan hamutuk, no liuhusi nia mak Maromak halo isin-lolon tomak sai boot ba daudaun.
20 Se imi la simu dalan mundu neʼe nian no mate ona ho Kristu, tansá mak imi kontinua moris hanesan imi parte ba mundu neʼe no tansá mak imi halo tuir ukun-fuan sira tuirmai neʼe:
21 “Keta foti, keta koko, keta kona”?
22 Tanba buat sira-neʼe koʼalia kona-ba buat neʼebé lakon tiha kuandu ita han no hemu. No ukun-fuan sira-neʼe mak lei no hanorin husi ema.
23 Maski ukun-fuan sira-neʼe haree hanesan matenek, maibé neʼe la ajuda ema atu luta hasoru hakarak isin nian, no ema halo tuir ukun-fuan sira-neʼe tanba sira hakarak hili rasik dalan atu halaʼo adorasaun. Sira fó-terus ba sira-nia isin rasik tanba sira hakarak ema atu hanoin katak sira haraik-an.
