Mateus 17:1-27
17 Liutiha loron neen, Jesus lori Pedro, Tiago no mós ninia alin João* bá foho aas ida hodi sira mesamesak.
2 No Jesus nakfila an iha sira-nia oin. Ninia oin sai naroman hanesan loro-matan, no ninia hatais sai nabilan loos.
3 No haree! Moisés no Elias mosu iha sira-nia oin no koʼalia daudaun ho Jesus.
4 Tuirmai, Pedro hatete ba Jesus: “Naʼi, ami kontente tebes atu mai iha neʼe. No se Ita hakarak, haʼu sei harii tenda tolu iha neʼe, ida ba Ita, ida ba Moisés, no ida ba Elias.”
5 Kuandu Pedro sei koʼalia hela, kalohan nabilan ida taka sira no lian ida sai husi kalohan dehan: “Neʼe mak haʼu-nia Oan-Mane, ida neʼebé haʼu hadomi, no neʼebé halo haʼu kontente, rona nia bá.”
6 Rona tiha neʼe, dixípulu sira hakneʼak ho oin ba rai no sira sai taʼuk tebetebes.
7 Tuirmai, Jesus hakbesik sira no kona sira hodi dehan: “Hamriik bá, no keta taʼuk.”
8 Kuandu sira foti sira-nia matan, sira la haree ema ida, só Jesus deʼit.
9 Nuʼudar sira tun husi foho, Jesus bandu sira, hodi dehan: “Keta fó-hatene ba ema ida buat neʼebé imi haree, toʼo Oan-Mane husi ema moris hiʼas fali husi mate.”
10 Maibé, dixípulu sira husu ba nia: “Entaun, tansá mak ema eskriba sira dehan katak Elias tenke mai uluk?”
11 Nia hatán: “Loloos, Elias tenke mai uluk hodi hadiʼa fali buat hotu.
12 Haʼu hatete ba imi katak Elias mai tiha ona, maibé sira la hatene loloos kona-ba nia, no sira halo aat ba nia tuir deʼit sira-nia hakarak. Iha dalan hanesan neʼe mós, Oan-Mane husi ema sei hetan terus iha sira-nia liman.”
13 No dixípulu sira foin komprende katak nia koʼalia ba sira kona-ba João Batista.
14 Kuandu sira laʼo besik ba ema-lubun, mane ida hakbesik nia, hakneʼak iha nia oin no hatete:
15 “Naʼi, hatudu laran-sadiʼa ba haʼu-nia oan-mane tanba nia moras bibi-maten no nia terus tebetebes. Dala barak ona nia monu ba ahi no monu ba bee laran,
16 no haʼu lori nia ba Ita-Boot nia dixípulu, maibé sira la bele kura nia.”
17 Maibé Jesus hatán: “Oh jerasaun neʼebé la iha fiar no aat, ba tempu hira tan mak haʼu sei hamutuk ho imi? Tempu hira tan mak haʼu tenke tahan imi? Lori nia mai haʼu.”
18 Tuirmai, Jesus siʼak anju aat neʼe no nia sai husi labarik-mane, no labarik neʼe sai diʼak kedas iha oras neʼebá.
19 No dixípulu sira hakbesik ba Jesus mesamesak no husu: “Tansá mak ami la bele duni sai anju aat neʼe?”
20 Nia hatán ba sira: “Tanba imi-nia fiar mak kiʼik. Haʼu hatete loloos ba imi: Se imi-nia fiar boot hanesan mostarda-musan, imi sei hatete ba foho neʼe: ‘Muda husi neʼe hodi bá fali neʼebá’, no foho neʼe sei muda, no la iha buat ida neʼebé imi la bele halo.”
21 ——*
22 Kuandu sira halibur hamutuk iha Galileia, Jesus hatete ba sira: “Fó-hatene nanis ona katak ema sei entrega Oan-Mane husi ema ba inimigu nia liman,
23 no sira sei oho nia, no liutiha loron tolu nia sei moris hiʼas fali.” Rona tiha ida-neʼe, sira sente triste tebetebes.
24 Kuandu sira toʼo tiha Kafarnaum, ema neʼebé halibur impostu templu nian* hakbesik Pedro no hatete: “Imi-nia mestre selu impostu templu nian ka lae?”
25 Nia hatán: “Sin.” Maibé, kuandu nia tama ba uma laran, Jesus koʼalia kedas ba nia no dehan: “Simão, ó hanoin oinsá? Liurai sira rai neʼe nian simu impostu sira husi sé? Husi sira-nia oan ka husi ema seluk?”
26 Nia hatán: “Husi ema seluk.” No Jesus dehan ba nia: “Entaun, oan sira la presiza selu impostu.
27 Maibé atu la halo sira sidi, ó bá tasi no soe kail, foti ikan primeiru neʼebé ó kaer no loke ninia ibun, iha neʼebá ó sei hetan osan-mutin ida.* Lori neʼe no fó ba sira atu selu impostu ba haʼu no ba ó.”
Nota-rodapé
^ Mt 17:21 Versíkulu neʼe la hetan iha Eskritura lia-gregu husi Westcott no Hort, no mós la hetan iha manuskritu importante sira.
