Mateus 21:1-46
21 Tuirmai, sira toʼo ba Betfage iha Foho Oliveira no fatin neʼe besik Jeruzalein. No Jesus haruka ninia dixípulu naʼin-rua
2 hodi dehan ba sira: “Bá hodi tama ba knua neʼebé imi haree daudaun, no imi sei hetan kuda-burru inan neʼebé kesi hela hamutuk ho kuda-burru oan ida. Imi kore sira no lori mai haʼu.
3 Se ema ruma husu, imi tenke dehan: ‘Naʼi presiza sira.’ Iha tempu neʼe, nia sei husik kedas imi atu lori sira.”
4 Ida-neʼe sai loos atu bele kumpre liafuan neʼebé Maromak koʼalia liuhusi profeta neʼebé dehan:
5 “Hatete ba Siaun nia oan-feto: ‘Haree! Ó-nia Liurai laʼo ba ó, ho laran-maus, no nia saʼe kuda-burru ida, sin, nia tuur iha kuda-burru oan nia leten.’”
6 No dixípulu sira bá hodi halo tuir buat hotu neʼebé Jesus haruka.
7 Sira lori ba nia kuda-burru inan no ninia oan, no sira tau sira-nia hatais ba kuda-burru nia leten no Jesus tuur iha kuda neʼe nia leten.
8 Ema barak husi ema-lubun nahe sira-nia hatais iha dalan no ema balu seluk hahú tesi ai-sanak no tau iha dalan.
9 Kona-ba ema-lubun neʼe, sira neʼebé laʼo iha ninia oin no mós sira neʼebé laʼo iha ninia kotuk kontinua hakilar makaʼas dehan: “Ami harohan, salva* David nia Oan bá! Bensaun ba ida neʼebé mai ho Jeová nia naran! Salva nia, Ita-Boot neʼebé iha fatin aas!”
10 Kuandu nia tama ba Jeruzalein, ema hotu iha sidade koʼalia ba malu kona-ba nia, dehan: “Ema neʼe sé?”
11 Ema-lubun neʼe kontinua dehan ba sira: “Neʼe mak profeta Jesus, nia husi Nazaré iha Galileia!”
12 No Jesus tama ba templu no duni sai ema sira hotu neʼebé faʼan no sosa iha templu, no nia baku fila meza ema troka osan nian no banku ema faʼan manu-pombu nian.
13 Nia hatete ba sira: “Hakerek nanis ona: ‘Haʼu-nia uma sei bolu nuʼudar uma orasaun nian’, maibé imi halo nia sai fali hanesan naʼok-teen sira-nia knuuk.”
14 No mós ema matan-delek sira no ain-kudeʼik sira hakbesik ba nia iha templu no nia kura sira.
15 Maibé ulun-naʼin amlulik sira no eskriba sira sai hirus kuandu sira haree buat furak sira neʼebé nia halo no rona labarik-mane sira neʼebé hakilar iha templu laran hodi dehan: “Ami harohan, salva David nia Oan bá!”
16 Sira hatete ba Jesus: “Ó la rona buat neʼebé labarik sira-neʼe dehan ka?” Jesus hatán: “Sin, haʼu rona. Maibé, imi lee tiha ona ka lae liafuan neʼebé dehan: ‘Ita halo labarik kiʼik no bebé sira-nia ibun fó hahiʼi ba Ita’?”
17 Tuirmai, nia husik hela sidade neʼe no nia bá Betánia hodi hela iha neʼebá kalan neʼe.
18 Kuandu nia fila fali ba sidade iha dadeer-saan, nia sente hamlaha.
19 No nia haree ai-figeira hun ida iha dalan ninin, no nia laʼo besik ba ai neʼe, maibé nia la hetan ai-fuan ida, só deʼit tahan. Entaun nia dehan ba ai neʼe: “Husi ohin ba oin, ó sei la fó fuan tan ba nafatin.” Iha tempu neʼe kedas ai-figeira neʼe sai maran.
20 Maibé kuandu ninia dixípulu sira haree ida-neʼe, sira hakfodak no dehan: “Oinsá mak ai-figeira neʼe sai maran kedas?”
21 Jesus hatán ba sira: “Haʼu hatete loloos ba imi: Se imi iha fiar no la laran-rua, imi laʼós deʼit halo buat neʼebé haʼu halo ba ai-figeira neʼe, maibé se imi hatete ba foho neʼe: ‘Hiʼit ó-nia an no soe tiha ba tasi’, ida-neʼe sei akontese duni.
22 No buat hotu neʼebé imi husu iha orasaun, hatudu fiar bá, no imi sei simu.”
23 No kuandu nia tama tiha ba templu, ulun-naʼin amlulik sira no katuas sira hakbesik nia nuʼudar nia hanorin hela no sira husu: “Ho kbiit saida mak ó halo buat sira-neʼe? No sé mak fó kbiit neʼe ba ó?”
24 Jesus hatán ba sira: “Haʼu mós sei husu imi buat ida. Se imi fó-hatene mai haʼu, haʼu mós sei fó-hatene imi ho kbiit saida mak haʼu halo buat sira-neʼe:
25 João nia batizmu mai husi neʼebé? Husi Maromak* ka husi ema?” Maibé sira hahú koʼalia ba malu dehan: “Se ita hatete: ‘Husi Maromak’, nia sei hatán ba ita: ‘Entaun, tansá mak imi la fiar nia?’
26 Se ita dehan: ‘Husi ema’, ita taʼuk ba ema-lubun, tanba sira hotu haree João nuʼudar profeta ida.”
27 Entaun sira hatete ba Jesus: “Ami la hatene.” Nuneʼe, Jesus dehan ba sira: “Haʼu mós sei la fó-hatene imi ho kbiit saida mak haʼu halo buat sira-neʼe.
28 “Imi hanoin oinsá? Mane ida iha oan naʼin-rua. Nia hakbesik ba ida primeiru no dehan: ‘Oan, ohin ó bá hodi halo serbisu iha toʼos uvas nian.’
29 Oan neʼe hatán: ‘Haʼu sei bá, apá’, maibé nia la bá.
30 Hakbesik ba ida seluk, nia hatete buat neʼebé hanesan. No oan neʼe hatán: ‘Haʼu sei la bá.’ Maibé depois neʼe, nia sente triste no nia bá.
31 Husi oan naʼin-rua neʼe, ida-neʼebé mak halo ninia aman nia hakarak?” Sira hatete: “Ida ikus.” Jesus dehan ba sira: “Haʼu hatete loloos ba imi katak kobradór impostu nian no feto-aat sira sei laʼo uluk liu imi atu tama ba Maromak nia Ukun.
32 Tanba João mosu ba imi no hatudu ba imi dalan neʼebé loos, no imi la fiar nia. Maibé, ema kobradór impostu nian no feto-aat sira fiar nia. Maski imi haree ida-neʼe, maibé imi la hakribi an hodi tau fiar ba nia.
33 “Rona tan ai-knanoik ida-neʼe: Iha mane toʼos-naʼin ida. Nia halo toʼos uvas nian no tau lutu haleʼu no nia keʼe fatin sama uvas nian no harii uma aas,* no depois neʼe nia fó-aluga* ba toʼos-atan sira, no nia bá rai liʼur.
34 Kuandu toʼo ona tempu atu kuʼu uvas, nia haruka ninia ema sira atu bá toʼos-atan sira hodi simu ai-fuan neʼebé ninian.
35 Maibé, toʼos-atan sira kaer tiha toʼos-naʼin nia ema, no sira baku ida, oho ida seluk, no ida tan sira tuda.
36 Tuirmai, nia haruka ema seluk tan, barak liu fali uluk, maibé toʼos-atan sira halo buat neʼebé hanesan ba ema sira-neʼe.
37 Ikusliu, nia haruka ninia oan ba sira tanba nia hanoin: ‘Sira sei respeitu haʼu-nia oan.’
38 Kuandu haree oan neʼe, toʼos-atan sira koʼalia ba malu: ‘Nia mak ida neʼebé sei simu toʼos neʼe nuʼudar liman-rohan, mai ita oho tiha nia no foti ninia liman-rohan.’
39 Entaun, sira kaer nia no lori nia ba toʼos liʼur no oho nia.
40 Nuneʼe, kuandu toʼos-naʼin mai, saida mak nia sei halo ba toʼos-atan sira-neʼe?”
41 Sira hatete ba nia: “Tanba ema sira-neʼe aat, entaun nia sei oho sira no sei fó-aluga toʼos neʼe ba toʼos-atan seluk, neʼebé sei fó ba nia uvas-fuan kuandu tempu toʼo.”
42 Jesus hatete ba sira: “Imi seidauk lee buat neʼebé Eskritura sira dehan ka? Basá Eskritura hatete: ‘Fatuk neʼebé badain sira la simu sai ona fatuk neʼebé importante liu.* Ida-neʼe mai husi Jeová, no ida-neʼe furak tebes iha ita-nia matan.’
43 Tan neʼe mak haʼu hatete ba imi: Maromak nia Ukun sei foti tiha husi imi no fó fali ba nasaun neʼebé halo tuir ninia hakarak.
44 No ema neʼebé monu iha fatuk neʼe nia leten sei rahun. Nuneʼe mós, ema neʼebé fatuk neʼe monu iha nia leten, ema neʼe sei rahun.”
45 Kuandu ulun-naʼin amlulik sira no farizeu sira rona tiha ai-knanoik sira-neʼe, sira hatene katak nia koʼalia kona-ba sira.
46 Maski sira buka atu kaer nia, maibé sira taʼuk ema-lubun, tanba ema sira-neʼe haree nia nuʼudar profeta ida.
