Mateus 24:1-51
24 Sai tiha husi templu, Jesus nia dixípulu sira hakbesik nia no hatudu ba nia uma sira iha templu.
2 Jesus hatete ba sira: “Imi haree buat sira-neʼe hotu, loos ka lae? Haʼu hatete loloos ba imi: La iha fatuk ida sei husik hela iha fatuk seluk nia leten, sira hotu sei naksobu.”
3 Kuandu nia tuur iha Foho Oliveira, ninia dixípulu hakbesik nia mesamesak no husu: “Fó-hatene mai ami, bainhira mak buat sira-neʼe sei mosu, no sinál saida mak sei hatudu katak Ita toʼo ona mai* no katak mundu neʼe atu hotu?”
4 Jesus hatán ba sira dehan: “Kuidadu bá atu ema ida la lohi imi,
5 tanba ema barak sei mai hodi haʼu-nia naran no dehan: ‘Haʼu mak Kristu’, no sira sei lohi ema barak.
6 Imi sei rona kona-ba funu iha fatin oioin, maibé kuidadu bá katak imi la sai taʼuk. Tanba buat sira-neʼe tenke mosu duni, maibé rohan seidauk mai.
7 “Nasaun sei hamriik hasoru nasaun seluk no ukun ida sei hamriik hasoru ukun seluk, no rai sei hamlaha no sei iha rai-nakdoko iha fatin oioin.
8 Buat sira-neʼe hatudu katak terus* foin hahú.
9 “Ema sei fó-terus ba imi no sei oho imi, no nasaun sira hotu sei odi imi tanba haʼu-nia naran.
10 No ema barak sei lakon sira-nia fiar no sira sei la laran-metin ba malu, no sei odi malu.
11 Profeta falsu sira sei mosu no lohi ema barak.
12 No tanba hahalok aat aumenta ba beibeik, entaun ema barak nia domin sei sai malirin.
13 Maibé, ema neʼebé tahan toʼo rohan mak ida neʼebé sei hetan salvasaun.
14 No ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, no depois neʼe mundu nia rohan sei mai.
15 “Tan neʼe, kuandu imi haree buat neʼebé foʼer hamriik iha fatin santu no sei halakon fatin neʼe, no neʼe tuir liafuan neʼebé profeta Daniel fó-hatene nanis ona (atu komprende ida-neʼe, ema neʼebé lee hanoin didiʼak bá),
16 iha oras neʼe, ema neʼebé iha Judeia presiza halai ba foho.
17 No ema neʼebé iha uma-leten keta tun atu foti ninia sasán iha uma laran.
18 No ema neʼebé iha toʼos keta fila ba nia uma atu foti ninia hatais.
19 Susar ba feto sira neʼebé isin-rua no mós ba sira neʼebé fó-susu ba bebé iha loron sira neʼebá!
20 Kontinua harohan atu tempu neʼebé imi halai laʼós iha tempu malirin ka loron Sábadu.
21 Tanba iha tempu neʼe sei mosu terus boot. Husi mundu hahú toʼo agora seidauk mosu terus hanesan neʼe, no depois neʼe sei la mosu fali.
22 Tuir loloos, se Maromak la habadak loron sira-neʼe, sei la iha ema ida neʼebé hetan salvasaun; maibé tanba sira neʼebé Maromak hili ona, entaun loron sira-neʼe sei habadak duni.
23 “Entaun se ema ruma hatete ba imi: ‘Haree! Kristu iha neʼe’, ka ‘Kristu iha neʼebá!’, imi keta fiar ida-neʼe.
24 Tanba Kristu falsu no profeta falsu sira sei mosu no sira sei halo sinál boot oioin no mós halo milagre sira tanba koko atu lohi mós sira neʼebé Maromak hili ona.
25 Haree! Haʼu fó avizu nanis ona ba imi.
26 Neʼe duni, se ema dehan ba imi: ‘Haree! Nia iha rai-fuik’, imi keta bá neʼebá, ka se ema dehan: ‘Haree! Nia iha uma laran’, imi keta fiar.
27 Hanesan rai-lakan neʼebé mosu husi parte leste no nia naroman toʼo parte oeste, nuneʼe mós kuandu Oan-Mane husi ema toʼo ona mai.*
28 Iha fatin neʼebé iha mate-isin, iha neʼebá mós manu-makikit sira halibur.
29 “Lakleur depois susar iha loron sira-neʼe, loro-matan sei sai nakukun no fulan sei la fó tan ninia naroman no fitun sira sei monu husi lalehan no lalehan nia kbiit sei nakdoko.
30 No tuirmai, sinál husi Oan-Mane husi ema sei mosu iha lalehan, no nasaun* hotu iha rai sei baku sira-nia an ho triste, no sira sei haree Oan-Mane husi ema, no nia sei mai iha kalohan iha lalehan ho kbiit no ho glória boot.
31 No nia sei haruka ninia anju sira, no ho lian trombeta nian neʼebé boot, sira sei halibur ema neʼebé Maromak hili ona husi mundu nia parte haat,* husi lalehan nia parte ida toʼo lalehan nia parte seluk.
32 “Aprende husi ai-figeira nuʼudar ai-knanoik ida atu hatene ida-neʼe: Kuandu ai-sanak nurak mosu no hamosu tahan, imi hatene katak tempu bailoro* besik ona.
33 Nuneʼe mós kuandu imi haree buat hotu neʼe, imi hatene bá katak nia besik ona odamatan.
34 Haʼu hatete loloos ba imi katak jerasaun neʼe sei la lakon toʼo buat hotu neʼe mosu.
35 Maski lalehan no rai sei lakon, maibé haʼu-nia liafuan sei la lakon.
36 “Kona-ba loron no oras, ema ida la hatene, anju sira iha lalehan la hatene no Oan-Mane mós la hatene, só deʼit Aman.
37 Basá hanesan Noé nia loron, nuneʼe mós ho tempu neʼebé Oan-Mane husi ema toʼo ona mai.*
38 Iha loron sira neʼebá antes rai-nabeen, ema han no hemu, mane no feto sira kaben, toʼo loron neʼebé Noé tama ba ró* laran.
39 No sira lakohi rona toʼo rai-nabeen mosu no halakon sira hotu, nuneʼe mós sei mosu iha tempu neʼebé Oan-Mane husi ema toʼo ona mai.*
40 Mane naʼin-rua sei iha toʼos laran: Ida Maromak sei lori no ida seluk sei husik hela.
41 Feto naʼin-rua sei dulas hela trigu: Ida Maromak sei lori no ida seluk sei husik hela.
42 Tan neʼe, matan-moris nafatin bá, tanba imi la hatene loron neʼebé imi-nia Naʼi sei mai.
43 “Maibé hanoin ida-neʼe bá: Se uma-naʼin hatene ona iha oras saida mak naʼok-teen sei mai, nia sei kontinua atu hadeer no la husik naʼok-teen neʼe atu tama nia uma.
44 Nuneʼe mós hatudu imi-nia an prontu bá, tanba iha oras neʼebé imi la hanoin nia atu mai, iha oras neʼe mak Oan-Mane husi ema sei mai.
45 “Sé loos mak atan laran-metin no matenek neʼebé ninia Naʼi hili atu tau matan ba Naʼi nia atan sira seluk, atu fó sira ai-han iha tempu loloos?
46 Ksolok ba atan neʼe, se nia Naʼi mai no haree nia halo nuneʼe!
47 Haʼu hatete loloos ba imi: Nia sei foti atan neʼe atu tau matan ba ninia rikusoin tomak.
48 “Maibé se atan neʼe aat no koʼalia iha nia laran dehan: ‘Haʼu-nia Naʼi sei mai tarde’,
49 no hahú baku ninia maluk atan no han no hemu ho ema lanu-teen sira,
50 atan neʼe nia Naʼi sei mai iha loron neʼebé nia la hein no iha oras neʼebé nia la hatene,
51 no sei fó kastigu todan ba nia no sei tau nia hamutuk ho ema laran-makerek sira. Iha neʼebá mak nia sei tanis no ruun nehan.
