Éfeso 3:1-21
3 Tan neʼe, haʼu Paulo, sai dadur+ tanba Kristu Jesus no mós tanba imi neʼebé husi nasaun sira seluk.
2 Tuir loloos imi rona ona kona-ba knaar+ neʼebé haʼu simu atu ajuda imi hetan buat diʼak liuhusi Maromak nia laran-diʼak neʼebé boot,
3 no nia fó sai ona ba haʼu kona-ba segredu santu, hanesan uluk haʼu hakerek uitoan ona ba imi kona-ba neʼe.
4 Entaun, kuandu imi lee ida-neʼe, imi bele hatene katak haʼu komprende segredu santu+ kona-ba Kristu.
5 Iha jerasaun uluk, Maromak la hatudu sai segredu neʼe ba ema hanesan nia halo agora, nia hatudu sai ona segredu neʼe ba ninia apóstolu santu sira no profeta sira liuhusi Maromak nia espíritu,+
6 segredu neʼe mak, ema husi nasaun seluk sei sai ida deʼit ho Kristu Jesus, no liuhusi liafuan diʼak mak sira sei simu liman-rohan ho ami, no sai parte ba grupu ida deʼit,*+ no mós hola parte iha Maromak nia promesa hamutuk ho ami.
7 Haʼu sai nuʼudar atan ba segredu santu neʼe tanba Maromak nia laran-diʼak neʼebé boot. Nia fó prezente* neʼe ba haʼu tuir ninia kbiit.+
8 Maromak fó ninia laran-diʼak boot+ neʼe ba haʼu neʼebé kiʼik liu fali ema neʼebé kiʼik liu husi ema santu* hotu,+ atu nuneʼe haʼu tenke fó sai ba nasaun sira liafuan diʼak kona-ba rikusoin Kristu nian neʼebé labele sura
9 no haʼu tenke halo ema hotu haree oinsá mak Maromak, neʼebé kria buat hotu, kumpre ninia segredu santu+ neʼebé nia subar hela ba tempu kleur.
10 Hodi nuneʼe agora, governu no sira neʼebé iha podér iha lalehan bele hatene Maromak nia matenek boot oioin+ liuhusi kongregasaun.+
11 Ida-neʼe tuir ninia hakarak neʼebé iha ba nafatin, neʼebé nia deside ona atu kumpre liuhusi Kristu,+ ita-nia Naʼi Jesus.
12 No liuhusi nia mak ita bele koʼalia ho aten-brani*+ no hakbesik ba Maromak ho konfiansa, tanba ita tau fiar ba nia.
13 Tan neʼe, haʼu husu imi atu la rende an tan deʼit susar sira neʼebé haʼu hetan tanba ajuda imi, tanba susar sira-neʼe lori glória ba imi.+
14 Tan razaun neʼe mak haʼu hakneʼak hodi halo orasaun ba Aman,
15 tanba liuhusi nia mak família hotu iha lalehan no rai mosu mai.*
16 Haʼu harohan katak nia, neʼebé iha kbiit boot, sei uza kbiit husi ninia espíritu* atu hametin imi-nia laran no neon.+
17 No haʼu mós harohan katak liuhusi imi-nia fiar mak Kristu bele hela iha imi-nia laran hamutuk ho domin.+ Haʼu hein katak imi bele sai hanesan ai-hun neʼebé iha abut metin+ no sai metin iha fundasaun fiar nian,+
18 atu nuneʼe hamutuk ho ema santu hotu, imi bele komprende didiʼak kona-ba luan, naruk, aas no kleʼan,
19 no hatene kona-ba Kristu nia domin+ neʼebé boot liu fali koñesimentu, hodi nuneʼe imi bele sai nakonu ho Maromak nia hahalok neʼebé nia fó.
20 Agora Maromak bele halo barak liu fali buat hotu neʼebé ita husu ka hanoin+ tanba ninia kbiit neʼebé book an iha ita.+
21 Entaun, nia merese simu glória liuhusi kongregasaun no mós liuhusi Kristu Jesus iha jerasaun hotu tinan ba tinan nafatin. Amen.
Nota-rodapé
^ Ka “sai membru husi isin-lolon ida deʼit”.
^ Ka “prezente neʼebé la presiza selu”.
^ Haree “Ema santu” iha Glosáriu.
^ Ka “koʼalia nakloke”.
^ Ka “simu sira-nia naran husi nia”.
^ Haree “Pneuma” iha Glosáriu.
