Primeiru Tesalónika 2:1-20
2 Maun-alin sira, imi rasik hatene ho loloos katak ami-nia vizita ba imi iha duni rezultadu.+
2 Tanba hanesan imi hatene ona, bainhira ami hetan susar no ema halo aat ba ami iha Filipe,+ ami sai aten-brani liuhusi ami-nia Maromak atu fó-hatene liafuan diʼak husi Maromak ba imi+ maski ema barak kontra ami.*
3 Tanba konsellu neʼebé ami fó sai ba imi la mai husi hanoin neʼebé sala ka hanoin neʼebé la moos ka lohi,
4 maibé, tanba Maromak hili ona ami atu simu knaar hodi fó sai liafuan diʼak, entaun ami koʼalia, laʼós atu halo kontente ema maibé atu halo kontente Maromak, neʼebé buka-hatene ami-nia laran.+
5 Tuir loloos, imi hatene katak ami nunka uza liafuan midar ka finje hodi subar hakarak neʼebé kaan-teen;+ Maromak mak sai sasin kona-ba neʼe!
6 Ami mós la buka glória husi ema ida, laʼós husi imi ka ema seluk, maski ami bele hatodan imi atu tau matan ba ami-nia presiza nuʼudar Kristu nia apóstolu.+
7 Maibé, ami hatudu laran-diʼak no tau matan didiʼak ba imi, hanesan inan neʼebé fó-susu no tau matan didiʼak ba* ninia oan.
8 Tanba ami hadomi tebes imi, ami deside* atu fahe ba imi laʼós deʼit liafuan diʼak kona-ba Maromak, maibé mós fó ami-nia moris*+ hodi ajuda imi, tanba ami hadomi tebetebes imi.+
9 Maun-alin sira, haʼu hatene katak imi la haluha ami-nia serbisu no hakaʼas an. Tanba bainhira ami haklaken liafuan diʼak kona-ba Maromak ba imi, ami serbisu loron no kalan hodi hetan ami-nia presiza atu labele hatodan imi.+
10 Imi no mós Maromak sai sasin katak ami laran-metin no laran-loos no moris ho hahalok loos kuandu ami ajuda imi fiar-naʼin sira.
11 Imi hatene ho didiʼak katak ami kontinua fó konsellu, fó kmaan no fó sasin ba imi ida-idak,+ hanesan aman ida+ halo ba ninia oan,
12 atu nuneʼe imi bele kontinua laʼo iha dalan neʼebé halo kontente Maromak,+ neʼebé bolu ona imi ba ninia Ukun*+ no glória.+
13 Tuir loloos, tan neʼe mak ami fó agradese nafatin ba Maromak,+ tanba bainhira imi rona Maromak nia liafuan husi ami, imi simu ida-neʼe laʼós nuʼudar ema nia liafuan maibé nuʼudar Maromak nia liafuan, no loloos hanesan neʼe duni, no Maromak nia liafuan mós ajuda daudaun imi fiar-naʼin sira.
14 Tanba maun-alin sira, imi halo tuir ezemplu husi Maromak nia kongregasaun sira iha Judeia neʼebé ida deʼit ho Kristu Jesus, tanba ema husi imi-nia rai rasik+ mak fó-terus ba imi, hanesan kongregasaun sira iha Judeia mós hetan terus husi ema Judeu sira
15 neʼebé oho tiha Naʼi Jesus+ no profeta sira no fó-terus ba ami.+ Liután neʼe, sira la halo kontente Maromak no buat neʼebé sira halo la lori diʼak ba ema hotu,
16 tanba sira koko hanetik ami atu la koʼalia ba ema husi nasaun seluk hodi ajuda ema sira-neʼe hetan salvasaun.+ Hodi nuneʼe, sira aumenta sira-nia sala. Maibé agora Maromak nia hirus besik atu tun ba sira.+
17 Maun-alin sira, uluk ema haketak ami husi imi ba tempu uitoan iha isin, maibé laʼós iha ami-nia laran. Maibé tanba ami hakarak tebes atu bá haree imi, ami hakaʼas an liután atu bá vizita imi.*
18 Tan razaun neʼe mak ami hakarak bá vizita imi. Sin, haʼu Paulo, koko laʼós dala ida deʼit maibé dala rua, maibé Satanás hanetik ami-nia dalan.
19 Iha tempu neʼebé ita-nia Naʼi Jesus toʼo ona mai,* sé mak sei sai ami-nia esperansa, ka ksolok ka koroa kontente nian iha ninia oin? Neʼe mak imi, loos ka lae?+
20 Loos duni, imi mak ami-nia glória no ksolok.
Nota-rodapé
^ Ka karik “maski ami tenke luta makaʼas”.
^ Ka “no hafolin”.
^ Orj., “kontente tebes”.
^ Haree “Psiké” iha Glosáriu.
^ Ka “Reinu; Governu”.
^ Orj., “atu haree imi-nia oin”.
^ Haree “Parousia” iha Glosáriu.
