Primeiru Tesalónika 3:1-13
3 Tan neʼe, kuandu ami labele hein ona atu rona kona-ba imi, ami hanoin katak diʼak liu atu ami hela deʼit iha Atenas,+
2 no ami haruka ita-nia alin Timóteo,+ neʼebé mak Maromak nia atan* neʼebé haklaken liafuan diʼak kona-ba Kristu, atu nia bele hametin imi no fó kmaan ba imi kona-ba imi-nia fiar,
3 atu nuneʼe imi-nia fiar labele nakdoko tanba susar sira-neʼe. Tanba imi rasik hatene katak ita labele hasees an husi susar sira hanesan neʼe.+
4 Tanba uluk kuandu ami hamutuk ho imi, ami sempre fó sai nanis ba imi katak ita sei hasoru susar, no neʼe mak buat neʼebé akontese duni, hanesan imi hatene ona.+
5 Tan neʼe mak kuandu haʼu labele hein ona, haʼu haruka Timóteo ba imi atu hatene imi-nia laran-metin,+ tanba haʼu taʼuk keta Diabu*+ tenta ona imi, no ami-nia serbisu sai saugati deʼit.
6 Maibé agora, Timóteo foin fila fali husi neʼebá+ no nia fó-hatene ami liafuan diʼak kona-ba imi-nia laran-metin no domin, no katak imi kontinua hanoin-hetan ami ho domin, no imi hakarak tebes atu haree ami hanesan ami mós hakarak tebes atu haree imi.
7 Tan neʼe, maun-alin sira, maski ami iha susar* no iha terus laran, ami hetan kmaan tanba imi no tanba laran-metin neʼebé imi hatudu.+
8 Tanba se imi hamriik metin iha Naʼi, neʼe halo ami hetan fali forsa.*
9 Ami agradese tebes ba Maromak kona-ba imi tanba imi halo ami haksolok tebes iha Maromak nia oin.
10 Loron-kalan ami harohan ho laran-manas atu ami bele haree imi* no fó buat neʼebé imi presiza atu hametin imi-nia fiar.+
11 Agora, ami harohan katak ita-nia Aman Maromak no ita-nia Naʼi Jesus loke dalan ba ami hodi bele bá vizita imi.
12 Liután neʼe, ami hein katak Naʼi sei halo imi aumenta no halo nakonu imi-nia domin ba malu+ no mós ba ema hotu, hanesan ami-nia domin ba imi,
13 atu nuneʼe nia sei hametin imi-nia laran, hodi sai ema neʼebé moris ho hahalok loos no santu iha ita-nia Aman Maromak+ nia oin iha tempu neʼebé ita-nia Naʼi Jesus+ toʼo ona mai* hamutuk ho ninia ema santu* hotu.
Nota-rodapé
^ Ka karik “Maromak nia maluk serbisu-naʼin”.
^ Orj., “Tentadór”.
^ Orj., “ami falta buat neʼebé ami presiza”.
^ Orj., “ami moris”.
^ Orj., “imi-nia oin”.
^ Haree “Parousia” iha Glosáriu.
^ Haree “Ema santu” iha Glosáriu.
