Primeiru Pedro 3:1-22
3 Nuneʼe mós, imi feen sira, hakruʼuk ba imi-nia laʼen,+ atu nuneʼe, se sira la halo tuir Maromak nia liafuan, imi bele ajuda sira atu iha fiar, laʼós liuhusi imi-nia liafuan, maibé liuhusi imi-nia hahalok,+
2 tanba ho sira-nia matan rasik sira haree ona imi-nia hahalok moos+ neʼebé imi hatudu hamutuk ho respeitu kleʼan.
3 Keta hafurak imi-nia an iha liʼur deʼit, hanesan sasin fuuk ho modelu espesiál ka uza osan-mean+ ka roupa furak,
4 maibé imi tenke hafurak* imi-nia laran ho buat neʼebé labele mohu, hanesan hahalok kalma no laran-maus,+ neʼebé iha folin boot tuir Maromak nia haree.
5 Tanba iha tempu uluk, feto santu sira neʼebé tau ona esperansa ba Maromak, sira hafurak sira-nia an iha dalan hanesan neʼe hodi hakruʼuk ba sira-nia laʼen,
6 hanesan Sara neʼebé halo tuir Abraão hodi bolu nia naʼi.+ Se imi kontinua halo hahalok diʼak no la husik buat ida halo imi taʼuk,+ imi sai ona hanesan Sara nia oan sira.
7 Nuneʼe mós, imi laʼen sira, kontinua moris hamutuk ho imi-nia feen hodi komprende sira.* Hatudu respeitu+ ba sira tanba feto sira fraku liu imi, hanesan vazu neʼebé fraku, tanba sira mós sei simu prezente moris nian nuʼudar liman-rohan hamutuk ho imi.+ Se imi la halo nuneʼe, Maromak sei la rona imi-nia orasaun.
8 Ikusliu, imi hotu tenke iha neon ida deʼit,*+ hanoin malu, hadomi malu hanesan maun-alin, hatudu laran-sadiʼa+ no haraik an.+
9 Keta selu aat ho aat+ ka liafuan kroʼat ho liafuan kroʼat.+ Maibé, koʼalia ho laran-diʼak bá,+ tanba Maromak bolu imi ba dalan neʼe, atu nuneʼe imi bele simu bensaun nuʼudar liman-rohan.
10 Tanba “ema neʼebé hadomi moris no hakarak haree loron diʼak sira, nia tenke kontrola ninia nanál atu la koʼalia buat aat+ no kontrola ninia ibun atu la koʼalia bosok.
11 Nia tenke hasees an husi buat neʼebé aat+ no halo buat neʼebé diʼak;+ nia tenke buka dame no halo dame.+
12 Tanba Jeová* nia matan hateke ba ema laran-loos sira, no nia see tilun ba sira-nia harohan;+ maibé Jeová* fila kotuk ba* sira neʼebé halo buat aat.”+
13 Tuir loloos, sé mak sei halo aat ba imi se imi sai laran-manas atu halo buat diʼak?+
14 Maibé se imi hetan duni terus tanba halo hahalok loos, imi sei haksolok.+ Maski nuneʼe, keta taʼuk buat neʼebé ema seluk taʼuk,* no keta laran-susar.+
15 Maibé rekoñese Kristu nuʼudar Naʼi neʼebé merese respeitu* iha imi-nia laran, sai prontu nafatin atu defende imi-nia esperansa ba ema hotu neʼebé husu razaun kona-ba imi-nia esperansa neʼe, maibé halo ida-neʼe ho laran-maus+ no respeitu kleʼan.+
16 Kontinua iha konxiénsia neʼebé diʼak,+ atu nuneʼe, bainhira ema koʼalia kontra imi, sira sei sente moe+ tanba imi hatudu hahalok diʼak nuʼudar Kristu nia dixípulu.+
17 Tanba diʼak liu imi hetan terus tanba halo buat diʼak,+ se Maromak husik ida-neʼe akontese tuir ninia hakarak, duké hetan terus tanba imi halo buat aat.+
18 Tanba Kristu mós mate dala ida deʼit ba nafatin ba ema nia sala,+ neʼe katak ema laran-loos ida mate ba ema neʼebé la hatudu hahalok loos,+ atu nuneʼe nia bele lori imi ba Maromak.+ Ema oho nia iha isin,+ maibé Maromak halo nia moris fali nuʼudar espíritu.*+
19 No nuʼudar espíritu, nia bá haklaken ba anju sira neʼebé iha dadur laran,+
20 neʼebé uluk kontra Maromak kuandu Maromak hein ho pasiénsia* iha Noé nia tempu.+ Iha tempu neʼebá Noé harii daudaun ró* boot,+ no ho ró neʼe mak ema uitoan deʼit, katak ema* naʼin-ualu mak hetan salvasaun liuhusi bee bainhira rai-nabeen.+
21 Batizmu* mós hanesan ho akontesimentu neʼe, no agora batizmu salva imi liuhusi imi-nia fiar ba Jesus Kristu nia moris-hiʼas. Batizmu laʼós atu hasai tiha foʼer husi isin, maibé atu husu ba Maromak hodi ita bele iha konxiénsia neʼebé diʼak.+
22 Jesus iha Maromak nia liman sorin loos+ tanba nia saʼe ona ba lalehan; anju no sira neʼebé iha podér no kbiit, tenke hakruʼuk ba nia.+
Nota-rodapé
^ Ka “hafurak parte neʼebé subar hela iha”.
^ Ka “hodi hanoin sira; hodi tuir koñesimentu”.
^ Ka “iha hanoin neʼebé hanesan”.
^ Ka “Jeová fila oin atu kontra”.
^ Ka karik “keta taʼuk bainhira sira ameasa imi”.
^ Ka “neʼebé santu”. Haree “Halo santu” iha Glosáriu.
^ Haree “Pneuma” iha Glosáriu.
^ Orj., “Maromak nia pasiénsia hein hela”.
^ Haree “Psiké” iha Glosáriu.
