Primeiru Pedro 4:1-19
4 Tanba Kristu hetan terus iha isin,+ imi mós prepara imi-nia an bá ho hanoin* neʼebé hanesan Kristu nian; tanba ema neʼebé hetan ona terus iha isin, nia la halo tan sala,+
2 atu nuneʼe nia bele halo Maromak nia hakarak+ durante tempu neʼebé nia sei moris iha isin, no la moris tan ba hakarak isin nian.+
3 Uluk imi uza ona tempu barak atu halo tuir nasaun sira-nia hakarak+ hodi halo hahalok aat toʼo la sente moe,* iha hakarak aat neʼebé labele kontrola, hemu tua barak demais, festa arbiru, halibur malu hodi hemu tua barak, no adora estátua* hodi kontra ukun-fuan.+
4 Agora sira sai konfuzaun tanba imi la hola parte tan hamutuk ho sira hodi tuir sira-nia dalan moris nian neʼebé arbiru no aat, tan neʼe sira koʼalia aat kona-ba imi.+
5 Maibé ema sira-neʼe sei hatán ba ida neʼebé prepara ona atu tesi-lia ba ema moris no ema mate.+
6 Tuir loloos, tanba razaun neʼe mak liafuan diʼak neʼe mós fó sai ona ba ema mate sira,*+ atu nuneʼe, maski sira hetan tesi-lia iha isin tuir ema nia hanoin, maibé sira bele moris hodi tuir Maromak nia espíritu no tuir Maromak nia hanoin.
7 Maibé buat hotu nia rohan besik daudaun ona. Tan neʼe, iha hanoin neʼebé loos bá,+ no matan-moris bá* atu harohan.+
8 Buat neʼebé importante liu mak imi tenke hadomi malu tebetebes,+ tanba ema neʼebé iha domin, sempre prontu atu fó perdua ba sala barak.+
9 Simu malu ho laran-diʼak* hodi la muramura.+
10 Uza prezente neʼebé imi ida-idak simu atu serbí malu nuʼudar atan* diʼak neʼebé simu ona Maromak nia laran-diʼak neʼebé boot; Maromak hatudu ona laran-diʼak neʼe iha dalan oioin.+
11 Se ema ruma koʼalia, nia tenke koʼalia hanesan ema neʼebé fó sai lia-menon husi Maromak; se ema ruma serbí ema seluk, nia tenke serbí tuir kbiit neʼebé Maromak fó ona ba nia;+ atu nuneʼe Maromak bele hetan glória iha buat hotu+ liuhusi Jesus Kristu. Maromak iha glória no kbiit tinan ba tinan nafatin. Amen.
12 Maluk doben sira, keta hakfodak ho terus neʼebé imi hasoru daudaun neʼebé hanesan ahi-lakan,+ tanba buat neʼebé akontese daudaun ba imi laʼós buat neʼebé foun liu.
13 Maibé kontinua haksolok bá+ tanba imi hola parte iha Kristu nia terus,+ atu nuneʼe imi mós bele sai kontente no nakonu ho ksolok durante tempu neʼebé nia hatudu sai ninia glória.+
14 Se ema koʼalia aat* imi tanba Kristu nia naran, imi haksolok bá,+ tanba espíritu glória nian, katak Maromak nia espíritu, hela daudaun iha imi.
15 Maibé, haʼu lakohi imi ida hetan terus tanba sai ohodór ka naʼok-teen ka ema aat ka gosta atu mete iha ema seluk nia moris.+
16 Maibé se ema ida hetan terus nuʼudar ema Kristaun, nia labele sente moe,+ nia tenke kontinua fó glória ba Maromak hodi lori naran neʼe.
17 Tanba neʼe mak tempu neʼebé deside ona atu tesi-lia, no tesi-lia neʼe komesa husi Maromak nia umakain.+ Nuneʼe se tesi-lia neʼe komesa husi ita,+ entaun saida mak sei akontese ba ema sira neʼebé la halo tuir liafuan diʼak husi Maromak?+
18 “Se ema laran-loos tenke hakaʼas an atu hetan salvasaun, entaun saida mak sei akontese ba ema aat no sala-naʼin?”+
19 Neʼe duni, sira neʼebé hetan terus tanba halo Maromak nia hakarak tenke kontinua entrega sira-nia an ba Kriadór neʼebé laran-metin no nafatin halo buat neʼebé diʼak.+
Nota-rodapé
^ Ka “ho desizaun neʼebé metin”.
^ Ka “sai prontu bá”.
^ Ka “Tau matan ba malu”.
^ Ka “administradór”.
^ Ka “insulta”.
