Primeiru Reis 19:1-21
19 Tuirmai Acab+ konta ba Jezabel+ kona-ba buat hotu neʼebé Elias halo no oinsá nia oho profeta hotu ho surik.+
2 Ho ida-neʼe, Jezabel haruka ema lori lia-menon ba Elias, hodi dehan: “Husik maromak sira fó kastigu ba haʼu no aumenta tan kastigu neʼe se aban iha oras neʼe haʼu la oho ó hanesan profeta sira-neʼe!”
3 Rona tiha neʼe, Elias sai taʼuk, entaun nia hamriik no halai atu salva ninia moris.+ Nia toʼo iha Beer-Seba,+ iha rai-Judá,+ no nia husik hela ninia atan iha neʼebá.
4 Nia tama ba rai-fuik no nia laʼo ba loron ida, depois neʼe, nia tuur iha ai-jiesta ida nia okos, no nia husu atu mate deʼit. Nia dehan: “Oh Jeová, toʼo ona! Agora hasai deʼit haʼu-nia moris,*+ tanba haʼu la diʼak liu fali haʼu-nia beiʼala sira neʼebé mate ona.”
5 Tuirmai Elias latan an no toba-dukur iha ai-jiesta neʼe nia okos. Maibé derrepente deʼit anju ida kaer nia+ no dehan: “Hadeer no han bá.”+
6 Bainhira nia hateke, nia haree paun kabuar fuan ida iha fatuk manas nia leten no bee iha buli ida besik ninia ulun. Nia han no hemu, depois neʼe toba fali.
7 Tuirmai Jeová nia anju mai fali ba dala segundu no kaer nia, hodi dehan: “Hadeer no han bá, tanba viajen neʼebé ó sei halo mak dook tebes no ó labele tahan.”
8 Tuirmai nia hadeer hodi han no hemu, no ai-han neʼe fó forsa ba nia atu laʼo loron 40 no kalan 40 hodi toʼo iha Maromak loos nia Foho Horeb.+
9 Iha neʼebá nia tama iha fatuk-kuak ida+ atu toba kalan iha fatuk-kuak neʼe nia laran. Durante kalan Jeová dehan ba nia: “Elias, ó halo saida iha neʼe?”
10 Nia hatán: “Haʼu serbí ona Jeová, Maromak neʼebé ukun tropa lalehan nian,+ ho laran-manas. Maibé povu Izraél husik ona Ita-Boot nia aliansa,+ sira halo rahun ona Ita-nia altár sira, no sira oho ona Ita-nia profeta sira ho surik,+ só haʼu deʼit mak moris. Agora sira buka daudaun atu oho haʼu.”+
11 Maibé Nia dehan: “Sai bá no hamriik iha foho, iha Jeová nia oin.” Iha tempu neʼebá, Jeová liu daudaun,+ no anin-fuik fera foho sira no halo rahun fatuk boot sira iha Jeová nia oin,+ maibé Jeová la iha anin neʼe nia laran. Depois anin neʼe para, mosu rai-nakdoko,+ maibé Jeová la iha rai-nakdoko neʼe nia laran.
12 Depois rai-nakdoko para, mosu ahi,+ maibé Jeová la iha ahi neʼe nia laran. Depois ahi neʼe para, nia rona lian neʼebé neineik no kalma.+
13 Bainhira Elias rona lian neʼe, nia falun nia oin ho ninia roupa profeta nian+ no nia sai hodi hamriik iha fatuk-kuak nia ibun. Tuirmai lian ida husu nia: “Elias, ó halo saida iha neʼe?”
14 Nia hatán: “Haʼu serbí ona Jeová, Maromak neʼebé ukun tropa lalehan nian, ho laran-manas. Maibé povu Izraél husik ona Ita-Boot nia aliansa,+ sira halo rahun ona Ita-nia altár sira, no sira oho ona Ita-nia profeta sira ho surik, só haʼu deʼit mak moris. Agora sira buka daudaun atu oho haʼu.”+
15 Jeová hatete ba Elias: “Fila fali, no laʼo ba rai-fuik iha Damasku. Bainhira ó toʼo iha neʼebá, foti* Hazael+ nuʼudar liurai ba rai-Síria.
16 No ó tenke foti* Ninsi nia bei-oan Jeú+ hodi sai nuʼudar liurai ba Izraél, no ó tenke foti Eliseu,* Safat husi Abel-Mehola nia oan-mane, hodi sai nuʼudar profeta atu troka ó.+
17 Jeú sei oho+ ema sira neʼebé halai husi Hazael nia surik,+ no Eliseu sei oho ema sira neʼebé halai husi Jeú nia surik.+
18 Haʼu sei iha ema naʼin-7.000 iha Izraél,+ sira hotu la hakneʼak ba Baal+ no sira-nia ibun la reʼi Baal.”+
19 Entaun Elias sai husi fatin neʼe no nia hetan Safat nia oan-mane Eliseu. Iha tempu neʼe Eliseu fila daudaun rai ho karau-aman pár 12 neʼebé iha ninia oin, no nia hamriik ho karau rua neʼebé iha kotuk liu. Nuneʼe Elias hakbesik ba nia no tau ninia roupa profeta nian+ ba Eliseu.
20 Ho ida-neʼe, nia husik hela ninia karau sira no halai tuir Elias, hodi dehan: “Favór ida, husik haʼu reʼi lai haʼu-nia inan-aman. Tuirmai haʼu sei laʼo tuir Ita.” Elias hatán: “Fila fali bá, tanba haʼu la hapara ó.”
21 Entaun Eliseu fila fali no foti karau-aman pár ida hodi hasaʼe nuʼudar sakrifísiu, no nia sunu ninia sasán fila rai nian hodi daʼan naʼan-karau no fó neʼe ba ema atu han. Depois neʼe, nia hamriik hodi laʼo tuir Elias no komesa serbí Elias.+
Nota-rodapé
^ Haree “Nefes” iha Glosáriu.
^ Orj., “fui mina ba”. Haree “Fui mina” iha Glosáriu.
^ Naran neʼe katak “Maromak fó salvasaun”.
^ Orj., “fui mina ba”. Haree “Fui mina” iha Glosáriu.
