Primeiru Reis 9:1-28
9 Bainhira Salomão foin harii hotu Jeová nia uma, liurai nia palásiu+ no mós buat hotu neʼebé Salomão hakarak,+
2 Jeová mosu ba Salomão dala segundu, hanesan nia mosu ona ba Salomão iha Gibeão.+
3 Jeová dehan ba nia: “Haʼu rona ona ó-nia orasaun atu husu laran-diʼak. Haʼu halo santu ona uma neʼe neʼebé ó harii, hodi lori haʼu-nia naran ba nafatin.+ Haʼu-nia matan sei hateke ba fatin neʼe no haʼu sei nafatin hanoin fatin neʼe.+
4 No se ó laʼo iha haʼu-nia oin ho laran-metin*+ no laran-loos+ hanesan ó-nia aman David,+ hodi halo tuir haʼu-nia mandamentu hotu neʼebé haʼu fó ba ó,+ no se ó halo tuir haʼu-nia ukun-fuan no desizaun sira,+
5 haʼu sei hametin ó-nia kadunan atu ukun Izraél ba nafatin, hanesan haʼu promete ona ba ó-nia aman David, hodi dehan: ‘Sei iha nafatin mane ida husi ó-nia jerasaun neʼebé sei tuur iha kadunan atu ukun Izraél.’+
6 Maibé se imi no imi-nia oan-mane sira fila kotuk hodi la laʼo tuir haʼu no la halo tuir haʼu-nia mandamentu no ukun-fuan sira neʼebé haʼu fó ona ba imi, no imi bá serbí maromak sira seluk hodi hakruʼuk ba sira,+
7 haʼu sei halakon ema Izraél husi rai neʼebé haʼu fó ona ba sira,+ no haʼu sei soe tiha uma neʼe, uma neʼebé haʼu halo santu ona ba haʼu-nia naran.+ Izraél sei sai buat neʼebé ema goza* no hatún iha nasaun hotu nia leet.+
8 Uma neʼe sei rahun.+ Ema hotu neʼebé laʼo liu sei hateke ho hakfodak no sei hakfuʼik, hodi dehan: ‘Tanbasá mak Jeová halo nuneʼe ba rai neʼe no uma neʼe?’+
9 Tuirmai sira sei dehan: ‘Neʼe tanba sira husik tiha ona Jeová, sira-nia Maromak, neʼebé lori sira-nia beiʼala sai husi rai-Ejitu, no sira adora fali maromak sira seluk no hakruʼuk hodi serbí sira. Tan neʼe mak Jeová lori susar hotu neʼe ba sira.’”+
10 Iha tinan 20 nia laran, Salomão harii uma rua, Jeová nia uma no liurai nia palásiu.+
11 Durante tempu neʼe, Liurai Hirão+ husi Tiro fó ai-sedru, ai-juníperu no osan-mean barak ba Salomão hodi tuir ninia hakarak,+ entaun Liurai Salomão fó sidade 20 iha rai-Galileia ba Hirão.
12 Tan neʼe, Hirão sai husi Tiro hodi bá haree sidade sira neʼebé Salomão fó ona ba nia, maibé nia la kontente ho sidade sira-neʼe.*
13 Nia dehan: “Haʼu-nia belun, tanbasá mak ó fó sidade sira hanesan neʼe mai haʼu?” Ho ida-neʼe, sira hanaran sidade sira-neʼe rai-Kabul* toʼo ohin loron.
14 Hirão haruka osan-mean+ kilograma 4.100* ba liurai.
15 Tuirmai neʼe mak istória kona-ba ema sira neʼebé Liurai Salomão haruka atu halo serbisu+ hodi harii Jeová nia uma,+ Salomão nia palásiu, Millo,*+ Jeruzalein nia moru, Hazor,+ Megido+ no Gezer.+
16 Uluk Faraó, liurai Ejitu, mai hodi manán Gezer, no sunu sidade neʼe, no nia mós oho ema Kanaan+ neʼebé hela iha sidade neʼe. Entaun nia fó sidade neʼe nuʼudar prezente despedida nian ba ninia oan-feto,*+ Salomão nia feen.
17 Salomão harii fali* Gezer, Bet-Horom Kraik,+
18 Baalat,+ no Tamar iha rai-fuik, iha rai-Izraél nia fronteira laran,*
19 no Salomão mós hametin sidade hotu neʼebé sai nuʼudar armazén, sidade hotu atu tau kuda-karreta sira,+ sidade ba tropa neʼebé saʼe kuda, no harii buat hotu neʼebé Salomão hakarak atu harii iha Jeruzalein, iha Líbanu, no iha rai hotu neʼebé nia ukun.
20 Kona-ba povu restu hotu husi ema Amoreu, ema Hetes, ema Perizeu, ema Heveu no ema Jebus,+ neʼebé laʼós parte ba povu Izraél,+
21 ema sira-neʼe nia bei-oan neʼebé moris hela, katak sira neʼebé ema Izraél la konsege halakon husi rai neʼe, Salomão haruka sira atu halo serbisu nuʼudar ninia atan toʼo ohin loron.+
22 Maibé Salomão la halo ema Izraél ida sai atan,+ tanba sira sai ninia funu-naʼin, serbisu-naʼin, ulun-naʼin, ajudante, no xefe ba ninia tropa neʼebé lori kuda-karreta no tropa neʼebé saʼe kuda.
23 Iha xefe naʼin-550 ba ulun-naʼin sira neʼebé tau matan ba Salomão nia serbisu. Sira mak tau matan ba ema neʼebé halo serbisu.+
24 Faraó nia oan-feto+ sai husi David nia Sidade+ hodi bá ninia uma rasik neʼebé Salomão harii ona ba nia. Tuirmai Salomão harii Millo.+
25 Dala tolu iha tinan ida nia laran+ Salomão hasaʼe sakrifísiu sunu nian no sakrifísiu dame nian iha altár neʼebé nia harii ona ba Jeová,+ no mós sunu sakrifísiu hodi halo suar iha altár leten, neʼebé iha Jeová nia oin. Ho ida-neʼe, nia halo hotu uma neʼe.+
26 Liurai Salomão mós halo ró sira iha Ezion-Geber,+ neʼebé besik Elot, iha Tasi Mean ninin iha rai-Edom.+
27 Hirão haruka ninia atan rasik neʼebé iha esperiénsia atu halo serbisu iha ró,+ hodi halo viajen ho ró hamutuk ho Salomão nia atan sira.
28 Sira bá Ofir+ hodi foti osan-mean kilograma 14.360* husi fatin neʼe no lori ba Liurai Salomão.
Nota-rodapé
^ Ka “integridade”.
^ Orj., “Izraél sei sai hanesan lia-dadolin”.
^ Ka “maibé sidade sira-neʼe la diʼak tuir ninia haree”.
^ Ka karik “Rai neʼebé La Iha Folin”.
^ Ka “prezente kaben nian ba ninia oan-feto”.
^ Ka “hametin”.
^ Orj., “iha rai laran”.
^ Orj., “talentu 420”.
