Primeiru Samuel 14:1-52
14 Loron ida Saul nia oan-mane Jonatan+ dehan ba ninia atan neʼebé lori ninia armas: “Mai ita laʼo ba tropa Filístia nia postu iha sorin neʼebá.” Maibé nia la fó-hatene ba ninia aman.
2 Saul hela daudaun iha sidade Gibea nia liʼur,+ iha ai-romaun ida nia okos iha Migron, no mane maizumenus naʼin-600 hamutuk ho nia.+
3 Iha tempu neʼebá, Ahitub+ nia oan-mane Ahias mak lori hela efod.*+ Ahitub mak Ikabod+ nia maun, Fineias+ nia oan-mane. Fineias mak Eli+ nia oan-mane, no Eli mak Jeová nia amlulik husi Silo.+ Kona-ba Jonatan, ema la hatene katak nia sai ona husi tropa nia hela-fatin.
4 No foho-leet neʼebé Jonatan koko atu liu hodi toʼo iha tropa Filístia nia postu, iha fatuk boot iha sorin-sorin neʼebé haree hanesan nehan. Naran ba fatuk boot iha sorin ida mak Bozez no ida seluk mak Sené.
5 No fatuk boot ida mak hanesan riin iha parte norte neʼebé hateke ba Mikmas no ida seluk mak iha parte súl hateke ba Geba.+
6 Entaun Jonatan hatete ba ninia atan: “Mai ita laʼo ba tropa sira-neʼe nia postu, tropa sira-neʼe mak ema neʼebé la hetan sirkunsizaun.*+ Karik Jeová sei ajuda ita, tanba se Jeová hakarak halo ita manán,* la iha buat ida mak bele hanetik nia, maski ita mak ema barak ka uitoan.”+
7 Rona tiha neʼe, ninia atan dehan ba nia: “Halo bá buat naran deʼit neʼebé Ita hakarak atu halo. Laʼo ba fatin naran deʼit neʼebé Ita hakarak, no haʼu sei tuir Ita ba fatin neʼebé Ita bá.”
8 Jonatan hatete: “Ita sei laʼo ba sorin hodi hatudu ita-nia an ba mane sira-neʼe.
9 Se sira hatete ba ita: ‘Hamriik metin iha neʼebá toʼo ami bá hasoru imi!’ entaun ita sei hamriik iha ita-nia fatin no la saʼe bá hasoru sira.
10 Maibé se sira hatete: ‘Saʼe mai kontra ami!’ entaun ita sei saʼe bá tanba Jeová entrega ona sira ba ita-nia liman. Neʼe mak sinál ba ita.”+
11 Tuirmai sira naʼin-rua hatudu an ba tropa Filístia sira neʼebé hein postu. No tropa Filístia dehan: “Haree bá! Ema Ebreu sai mai daudaun husi kuak sira neʼebé sira subar bá.”+
12 Entaun mane sira neʼebé hein postu dehan ba Jonatan no ninia atan: “Saʼe mai kontra ami, no ami sei hanorin imi!”+ Entaun Jonatan hatete kedas ba ninia atan: “Laʼo tuir haʼu, tanba Jeová sei entrega sira ba Izraél nia liman.”+
13 Jonatan dolar saʼe fatuk-lolon, no ninia atan tuir nia iha ninia kotuk. Jonatan komesa ataka ema Filístia sira, no ninia atan oho sira iha ninia kotuk.
14 Bainhira Jonatan no nia atan ataka ba dala primeiru, sira oho mane maizumenus naʼin-20 iha rai kloot deʼit.*
15 Tan neʼe, ema hotu iha tropa nia hela-fatin iha rai-luan no mós tropa sira neʼebé hein postu sai taʼuk. No grupu tropa sira neʼebé baibain ataka uluk+ mós sai taʼuk. Rai komesa nakdoko, no Maromak hamosu taʼuk.
16 Saul nia guarda sira iha Gibea+ iha rai-Benjamim haree katak runguranga sai boot liután iha tropa Filístia nia hela-fatin hotu.+
17 Saul hatete ba ema neʼebé hamutuk ho nia: “Favór ida, sura toʼok tropa hotu, no haree sé mak la iha.” Bainhira sira sura, sira haree katak Jonatan no ninia atan neʼebé lori ninia armas la iha neʼebá.
18 Entaun Saul hatete ba Ahias:+ “Lori Maromak loos nia Arka mai!” Tanba iha tempu neʼebá, Maromak loos nia Arka iha ema Izraél nia leet.
19 Nuʼudar Saul koʼalia ba amlulik neʼe, runguranga sai boot liután iha tropa Filístia nia hela-fatin. Tuirmai Saul dehan ba amlulik: “Para ho buat neʼebé ó halo daudaun.”*
20 Entaun Saul no ninia ema hotu halibur hamutuk atu bá halo funu, no iha neʼebá sira haree ema Filístia oho malu ho surik, no haree runguranga tebes.
21 No mós, ema Ebreu neʼebé uluk apoia ema Filístia no mai hamutuk ho sira hodi tama tropa Filístia nia hela-fatin, agora sira apoia fali ema Izraél neʼebé Saul no Jonatan dirije.
22 Liután neʼe, ema Izraél hotu neʼebé subar+ iha área foho iha Efraim rona katak ema Filístia halai ona, no sira mós apoia hodi duni tuir ema Filístia iha funu neʼe.
23 Nuneʼe Jeová salva Izraél iha loron neʼebá,+ no funu neʼe habelar toʼo Bet-Aven.+
24 Maibé iha loron neʼebá tropa Izraél hetan susar boot, tanba Saul halo juramentu kona-ba sira, hodi dehan: “Malisan ba ema neʼebé han ai-han* ruma antes kalan no antes haʼu selu fali ba haʼu-nia inimigu sira!” Entaun tropa ida mós la han ai-han ida.+
25 No sira hotu* toʼo iha ai-laran, neʼebé iha bani-been iha rai.
26 Bainhira sira toʼo iha ai-laran, sira haree bani-been turuk hela, maibé ema ida mós la han ida-neʼe, tanba sira taʼuk kona-ba juramentu neʼe.
27 Maibé Jonatan la rona bainhira ninia aman halo juramentu kona-ba tropa sira,+ entaun nia lolo ninia ai-tonka iha nia liman no hatama neʼe iha bani-been. Bainhira nia han ida-neʼe, ninia matan sai nabilan.
28 Ho ida-neʼe, ema ida husi tropa sira-neʼe hatete: “Ó-nia aman halo ona juramentu metin kona-ba tropa sira, hodi dehan: ‘Malisan ba ema neʼebé han ai-han ruma ohin!’+ Tan neʼe mak tropa sira-neʼe kole loos.”
29 Maibé Jonatan dehan: “Haʼu-nia aman lori ona susar boot ba rai neʼe. Haree toʼok, haʼu-nia matan sai nabilan tanba haʼu koko bani-been uitoan neʼe.
30 Diʼak liu ohin tropa sira-neʼe han+ buat neʼebé sira foti husi sira-nia inimigu. Se nuneʼe karik ita sei oho ema Filístia barak liután.”
31 Iha loron neʼe, sira kontinua oho ema Filístia husi Mikmas toʼo Aijalon,+ no tropa sira-neʼe sai kole tebes.
32 Tan neʼe, ho kaan-teen sira halai lalais atu foti sasán neʼebé sira hadau ona. Sira foti bibi, karau no karau-oan, no sira oho kedas iha fatin neʼe, no han naʼan hamutuk ho raan.+
33 Entaun ema fó-hatene kona-ba neʼe ba Saul, hodi dehan: “Tropa sira-neʼe halo sala hasoru Jeová hodi han naʼan hamutuk ho raan!”+ Ho ida-neʼe, nia hatete: “Imi la hatudu hahalok laran-metin. Duir kedas fatuk boot ida ba haʼu-nia oin.”
34 Tuirmai Saul dehan: “Habelar lia-menon neʼe ba tropa hotu, hodi dehan: ‘Imi ida-idak tenke lori imi-nia karau no bibi-malae, no oho iha neʼe no tuirmai imi bele han bá. Keta halo sala hasoru Jeová hodi han naʼan hamutuk ho raan.’”+ Entaun iha kalan neʼe sira ida-idak lori sira-nia karau no oho iha fatin neʼebá.
35 No Saul harii altár ida ba Jeová.+ Neʼe mak altár primeiru neʼebé nia harii ba Jeová.
36 Tuirmai Saul hatete: “Mai ita tun bá hodi ataka tropa Filístia iha kalan no hadau sira-nia sasán toʼo rai naroman. Ita sei la husik ema ida moris.” Ho ida-neʼe, sira hatán: “Halo deʼit buat neʼebé Ita hanoin mak diʼak.” Maibé amlulik dehan: “Mai ita husu ba Maromak loos iha fatin neʼe.”+
37 No Saul husu ba Maromak: “Haʼu tenke tun bá hodi ataka ema Filístia ka lae?+ Ita sei entrega sira ba ema Izraél nia liman ka lae?” Maibé Maromak la hatán ba nia iha loron neʼe.
38 Entaun Saul dehan: “Imi tropa nia xefe sira, mai iha neʼe, no buka-hatene sala saida mak ohin ita halo.
39 Haʼu jura hodi Jeová, Maromak neʼebé moris, neʼebé salva ona Izraél, maski ema neʼebé halo sala mak haʼu-nia oan Jonatan, nia tenke mate.” Maibé sira ida mós la hatán ba nia.
40 Tuirmai nia hatete ba ema Izraél hotu: “Imi hamriik iha sorin ida, no haʼu ho haʼu-nia oan Jonatan hamriik iha sorin seluk.” Ho ida-neʼe, sira dehan ba Saul: “Halo deʼit buat neʼebé Ita hanoin mak diʼak.”
41 Entaun, Saul koʼalia ba Jeová: “Oh Izraél nia Maromak, hatán bá liuhusi Tumim!”*+ Tuirmai ida-neʼe hili Jonatan no Saul, no mane sira seluk sai livre.
42 Entaun Saul dehan: “Dada sorteiu* bá+ atu deside kona-ba haʼu no haʼu-nia oan Jonatan.” No ida-neʼe monu ba Jonatan.
43 Saul hatete ba Jonatan: “Fó sai mai haʼu, saida mak ó halo ona?” Jonatan dehan ba nia: “Haʼu koko deʼit bani-been uitoan neʼebé iha haʼu-nia ai-tonka tutun.+ Agora haʼu mak neʼe! Haʼu prontu ona atu mate!”
44 Ho ida-neʼe, Saul dehan: “Maromak tenke fó kastigu makaʼas ba haʼu se ó la mate, Jonatan.”+
45 Maibé tropa sira-neʼe hatete ba Saul: “Jonatan tenke mate ka? Nia mak halo Izraél manán boot.*+ Labele halo ida-neʼe ba nia! Ami jura hodi Jeová, Maromak neʼebé moris, katak Jonatan nia fuuk-lahan ida mós labele monu ba rai, tanba ho Maromak nia ajuda mak nia halo ida-neʼe ohin.”+ Ho ida-neʼe, sira salva* Jonatan no nia la mate.
46 Entaun Saul la duni tuir tan ema Filístia no ema Filístia sira fila fali ba sira-nia rai.
47 Saul hametin ninia ukun iha Izraél no nia halo funu hasoru ninia inimigu hotu iha sorin-sorin, nia halo funu hasoru ema Moab,+ ema Ammon,+ ema Edom,+ liurai sira husi Zoba+ no ema Filístia,+ no nia manán sira iha fatin naran deʼit neʼebé nia bá.
48 No nia halo funu ho aten-brani no manán ema Amalec+ no salva ema Izraél husi sira-nia inimigu nia liman.
49 Saul nia oan-mane sira-nia naran mak Jonatan, Isvi no Malkisua.+ No nia iha oan-feto naʼin-rua. Ida primeiru naran Merab,+ no ida segundu naran Mical.+
50 Saul nia feen nia naran mak Ahinoam, Ahimaz nia oan-feto. No xefe ba Saul nia tropa naran Abner,+ Ner nia oan-mane. Abner mak Saul nia tiu.
51 Kis+ mak Saul nia aman, no Abner nia aman mak Ner,+ no Ner nia aman mak Abiel.
52 Durante Saul nia moris tomak sempre iha funu makaʼas hasoru ema Filístia.+ Bainhira Saul haree ema neʼebé iha kbiit no aten-brani, nia foti ema neʼe atu sai tropa.+
Nota-rodapé
^ Ka “hakarak fó salvasaun ba ita”.
^ Neʼe katak rai nia luan neʼebé karau rua bele fila iha loron ida.
^ Orj., “Dada fali ó-nia liman”.
^ Orj., “paun”.
^ Orj., “rai hotu”.
^ Haree “Urim no Tumim” iha Glosáriu.
^ Haree “Dada sorteiu” iha Glosáriu.
^ Ka “hetan salvasaun”.
^ Orj., “sosa fali”.
