Primeiru Samuel 26:1-25
26 Liutiha tempu balu, mane sira husi Zif+ mai hasoru Saul iha Gibea+ no dehan: “David subar hela iha foho-oan iha Hakila neʼebé hateke ba Jesimon.”*+
2 Entaun Saul hamriik no tun ba rai-fuik Zif hamutuk ho tropa Izraél naʼin-3.000 neʼebé diʼak liu hodi buka David iha rai-fuik Zif.+
3 Saul hela besik dalan neʼebé iha foho-oan leten iha Hakila neʼebé hateke ba Jesimon. Maibé iha tempu neʼebá David hela iha rai-fuik, no nia rona katak Saul duni tuir ona nia toʼo rai-fuik.
4 Entaun David haruka espiaun sira atu buka-hatene se Saul mai duni ka lae.
5 Depois neʼe, David laʼo ba fatin neʼebé Saul hela, no David haree fatin neʼebé Saul ho Abner+ toba. Abner mak Ner nia oan-mane, no nia mak xefe ba Saul nia tropa. Saul toba hela iha tropa nia hela-fatin, no tropa sira hela haleʼu nia.
6 Entaun David koʼalia ba Ahimelec, ema Hetes,+ no ba Zeruia+ nia oan-mane Abisai,+ Joab nia maun, hodi dehan: “Sé mak sei tun hamutuk ho haʼu ba Saul nia hela-fatin?” Abisai hatán: “Haʼu sei bá hamutuk ho Ita.”
7 Nuneʼe David no Abisai laʼo ba tropa nia hela-fatin durante kalan, no sira haree Saul toba hela iha neʼebá no ninia diman fai metin hela iha rai besik ninia ulun. Abner no tropa sira seluk toba haleʼu nia.
8 Abisai hatete ba David: “Ohin Maromak entrega ona Ita-nia inimigu ba Ita-nia liman.+ Favór ida, agora husik haʼu sona rabat nia ba rai ho diman dala ida deʼit, no haʼu la presiza sona tan ba dala rua.”
9 Maibé David hatete ba Abisai: “Keta halo aat ba nia, tanba sé mak bele foti liman hasoru ema neʼebé Jeová hili* ona+ no la simu sala kona-ba neʼe?”+
10 David hatutan tan: “Haʼu jura hodi Jeová, Maromak neʼebé moris, katak Jeová rasik mak sei oho nia,+ ka ninia loron sei toʼo mai+ no nia sei mate, ka nia sei mate iha funu.+
11 Tuir Jeová nia hanoin, haʼu labele duni atu foti liman hasoru ema neʼebé Jeová hili* ona!+ Agora favór ida, foti diman neʼebé besik ninia ulun no foti buli bee nian, no mai ita fila.”
12 Entaun David foti diman no buli bee nian neʼebé besik Saul nia ulun, no sira bá. La iha ema ida mak haree+ ka hatene no la iha ema ida mak hadeer, sira hotu toba, tanba Jeová mak halo sira toba-dukur loos.
13 Tuirmai David bá foho-leet nia sorin no hamriik iha foho leten dook uitoan husi Saul.
14 David bolu tropa sira no Ner nia oan-mane Abner+ ho lian makaʼas, dehan: “Abner, ó rona haʼu ka lae?” Abner hatán: “Ó mak sé hodi ó bolu liurai?”
15 David hatete ba Abner: “Ó mak asuwaʼin ida, loos ka lae? Sé mak hanesan ó iha Izraél? Entaun tanbasá mak ó la tau matan ba ó-nia naʼi liurai? Tanba tropa ida tama ona atu oho ó-nia naʼi liurai.+
16 Buat neʼebé ó halo mak la diʼak. Haʼu jura hodi Jeová, Maromak neʼebé moris, ó merese mate, tanba ó la tau matan ba ó-nia naʼi neʼebé Jeová hili* ona.+ Agora buka toʼok bá! Liurai nia diman no buli bee nian+ neʼebé tau besik ninia ulun iha neʼebé?”
17 Saul rekoñese David nia lian no dehan: “Neʼe mak ó-nia lian ka, haʼu-nia oan David?”+ David hatán: “Sin, haʼu-nia naʼi liurai, neʼe mak haʼu.”
18 Nia hatutan tan: “Tanbasá mak haʼu-nia naʼi duni tuir Ita-nia atan?+ Haʼu halo ona saida? Sala saida mak haʼu halo?+
19 Favór ida, haʼu-nia naʼi liurai, rona ba Ita-nia atan nia liafuan: Se Jeová mak hakarak Ita atu kontra haʼu, husik nia simu* haʼu-nia sakrifísiu trigu* nian. Maibé se ema mak soran Ita atu kontra haʼu,+ sira sei hetan malisan iha Jeová nia oin, tanba sira la husik haʼu atu hela iha rai neʼebé Jeová fó nuʼudar liman-rohan,+ no dehan: ‘Bá, serbí maromak sira seluk!’
20 Agora Ita labele husik haʼu-nia raan suli iha rai neʼebé dook husi Jeová nia oin, tanba liurai Izraél bá ona atu buka tuir asu-kutun ida,+ hanesan buka tuir manu-fuik* ida iha foho sira.”
21 Ho ida-neʼe, Saul dehan: “Haʼu halo ona sala.+ Fila fali mai, haʼu-nia oan David, haʼu sei la halo aat ba ó, tanba ohin ó haree haʼu-nia moris nuʼudar buat folin-boot.+ Sin, haʼu halo ona hahalok beik no sala boot.”
22 David hatán: “Neʼe mak liurai nia diman. Haruka mane joven ida mai atu foti.
23 Jeová sei selu fali ema ida-idak tuir ninia hahalok loos+ no hahalok laran-metin, tanba ohin Jeová entrega Ita ba haʼu-nia liman, maibé haʼu lakohi foti liman hasoru ema neʼebé Jeová hili* ona.+
24 Hanesan ohin haʼu hafolin Ita-nia moris, entaun haʼu hein katak Jeová mós sei hafolin haʼu-nia moris, no nia sei salva haʼu husi susar hotu.”+
25 Saul hatán ba David: “Haʼu-nia oan David, haʼu hein katak ó sei hetan bensaun. Ó sei halo duni buat boot sira, no ó sei hetan susesu iha buat hotu neʼebé ó halo.”+ Tuirmai David bá, no Saul fila fali ba ninia fatin.+
Nota-rodapé
^ Ka karik “rai-fuik”.
^ Orj., “fui mina”. Haree “Fui mina” iha Glosáriu.
^ Orj., “fui mina”. Haree “Fui mina” iha Glosáriu.
^ Orj., “fui mina”. Haree “Fui mina” iha Glosáriu.
^ Orj., “horon”.
^ Neʼe bele refere mós ba sevada. Haree “Sakrifísiu trigu nian” iha Glosáriu.
^ Ka “manu-perdiz”.
^ Orj., “fui mina”. Haree “Fui mina” iha Glosáriu.
