Primeiru Samuel 28:1-25
-
Saul bá hasoru feto ida iha En-Dor (1-25)
28 Iha tempu neʼebá, ema Filístia halibur sira-nia tropa atu halo funu hasoru ema Izraél.+ Entaun Aquis hatete ba David: “Ó hatene katak ó no ó-nia ema sira tenke bá funu hamutuk ho haʼu.”+
2 David hatán ba Aquis: “Ita rasik hatene saida mak Ita-nia atan neʼe sei halo.” Aquis hatán ba David: “Tan neʼe mak haʼu sei hili ó nuʼudar haʼu-nia guarda ba nafatin.”*+
3 Iha tempu neʼebá Samuel mate ona, no ema Izraél tomak tanis ba nia no hakoi nia iha ninia sidade Ramá.+ No Saul halakon ona ema neʼebé koko atu koʼalia ho ema mate no ema neʼebé siʼik futuru husi rai neʼe.+
4 Ema Filístia halibur hamutuk no bá harii tropa nia hela-fatin iha Sunem.+ Entaun Saul halibur tropa Izraél hotu, no sira bá harii tropa nia hela-fatin iha Foho Gilboa nia leten.+
5 Bainhira Saul haree tropa Filístia nia hela-fatin, nia sai taʼuk no laran-nakdedar tebes.+
6 Saul husu beibeik matadalan husi Jeová,+ maibé Jeová nunka hatán ba nia maski liuhusi mehi ka liuhusi Urim*+ ka liuhusi profeta sira mós lae.
7 Ikusmai Saul dehan ba ninia atan sira: “Buka feto neʼebé bele koʼalia ho ema mate,+ no haʼu sei bá husu nia.” Ninia atan sira hatán: “Loloos iha feto ida iha En-Dor neʼebé dehan nia bele koʼalia ho ema mate.”+
8 Entaun Saul hatais fali roupa seluk atu ema labele koñese nia no nia bá hasoru feto neʼe iha kalan hamutuk ho ninia atan naʼin-rua. Nia dehan: “Favór ida, uza ó-nia kbiit atu bele koʼalia ho ema mate hodi fó sai mai haʼu kona-ba futuru,+ no hamosu ema neʼebé haʼu husu.”
9 Maibé feto neʼe dehan ba nia: “Ita rasik hatene buat neʼebé Saul halo ona. Nia halakon ema neʼebé koko atu koʼalia ho ema mate no ema neʼebé siʼik futuru husi rai neʼe.+ Tanbasá mak Ita koko atu lasu haʼu no lori haʼu ba mate?”+
10 Entaun Saul jura ba feto neʼe hodi Jeová nia naran no dehan: “Haʼu jura hodi Jeová, Maromak neʼebé moris, katak ó sei la hetan sala ida kona-ba neʼe!”
11 Feto neʼe hatete: “Sé mak haʼu sei hamosu?” Saul hatán: “Hamosu Samuel.”
12 Bainhira feto neʼe haree “Samuel”,*+ nia hakilar ho lian makaʼas no hatete ba Saul: “Tanbasá mak Ita lohi haʼu? Ita mak Saul!”
13 Liurai hatete ba nia: “Keta taʼuk, saida mak ó haree?” Feto neʼe hatán ba Saul: “Haʼu haree buat ida hanesan maromak mosu husi rai.”
14 Saul husu kedas ba nia: “Nia haree hanesan saida?” Feto neʼe hatán: “Katuas ida mak sai mai, no nia hatais roupa neʼebé la iha liman.”+ Ho ida-neʼe, Saul hatene katak neʼe mak “Samuel”, no Saul hakneʼak no hakruʼuk ho oin ba rai.
15 Tuirmai “Samuel” hatete ba Saul: “Tanbasá mak ó bolu haʼu atu sai mai?” Saul hatán: “Haʼu iha susar boot nia laran. Ema Filístia halo funu hasoru haʼu, no Maromak husik ona haʼu no la hatán ba haʼu, maski liuhusi profeta ka liuhusi mehi+ mós lae. Tan neʼe mak haʼu bolu Ita atu fó-hatene mai haʼu saida mak haʼu tenke halo.”+
16 “Samuel” dehan: “Tanbasá mak agora ó husu haʼu se Jeová husik ona ó+ no sai ona ó-nia inimigu?
17 Jeová rasik sei kumpre liafuan neʼebé nia fó sai nanis ona liuhusi haʼu: Jeová sei hasai ukun husi ó-nia liman no entrega ba ó-nia maluk David.+
18 Tanba ó la halo tuir Jeová nia liafuan no ó la oho ema Amalec+ hodi hatudu sai Jeová nia hirus, entaun agora nia halo nuneʼe ba ó.
19 Jeová sei entrega ó no ema Izraél ba ema Filístia nia liman,+ no aban ó+ no ó-nia oan-mane sira+ sei hamutuk ho haʼu.* Jeová mós sei entrega tropa Izraél ba ema Filístia nia liman.”+
20 Ho ida-neʼe, Saul monu latan kedas ba rai no sai taʼuk tebes tanba “Samuel” nia liafuan. No nia la iha tan forsa, tanba nia la han buat ida ba loron tomak no kalan tomak.
21 Bainhira feto neʼe hakbesik ba Saul no haree katak nia sente laran-susar tebes, feto neʼe dehan ba nia: “Ita-nia atan neʼe halo tuir ona Ita-nia liafuan, no haʼu tau haʼu-nia moris iha perigu laran+ hodi halo buat neʼebé Ita haruka haʼu atu halo.
22 Agora, favór ida, rona ba buat neʼebé Ita-nia atan hatete. Husik haʼu tau paun rohan ida iha Ita-nia oin, atu nuneʼe Ita bele han no iha fali forsa hodi kontinua Ita-nia viajen.”
23 Maski nuneʼe, nia lakohi no dehan: “Haʼu sei la han.” Maibé ninia atan sira no mós feto neʼe kontinua obriga nia. Ikusmai nia rona ba sira no hamriik husi rai hodi tuur iha kama leten.
24 Feto neʼe iha karau-oan neʼebé bokur iha ninia uma, entaun nia oho lalais karau neʼe* no nia foti trigu uut hodi deʼut atu halo paun neʼebé la iha fermentu no tunu paun neʼe.
25 Nia lori hahán sira-neʼe ba Saul no ninia atan sira, no sira han. Depois neʼe, sira hamriik no fila iha kalan neʼe.+
Nota-rodapé
^ Orj., “nuʼudar guarda ba haʼu-nia ulun ba loron sira hotu”.
^ Haree “Urim no Tumim” iha Glosáriu.
^ Istória neʼe konta akontesimentu neʼebé feto neʼe haree, no anju aat ida finje katak nia mak Samuel hodi lohi feto neʼe.
^ Neʼe katak sira sei mate hanesan Samuel.
^ Ka “nia hasaʼe lalais karau neʼe nuʼudar sakrifísiu”.
