Primeiru Samuel 30:1-31
30 Bainhira David no ninia ema sira toʼo Ziklag+ iha loron terseiru, ema Amalec+ ataka ona rai iha parte súl.* Sira mós ataka Ziklag no sunu ona sidade neʼe.
2 Sira lori feto sira+ no mós ema hotu husi kiʼik toʼo boot iha sidade laran hodi sai nuʼudar dadur. Sira la oho ema ida, maibé sira kaer ema sira-neʼe no kontinua laʼo.
3 Bainhira David no ninia ema sira toʼo sidade neʼe, sira haree katak sidade neʼe motuk ona. Ema lori tiha ona sira-nia feen sira no oan-mane ho oan-feto sira nuʼudar dadur.
4 Entaun David no ema sira neʼebé hamutuk ho nia komesa tanis makaʼas toʼo sira la iha tan forsa atu tanis.
5 Ema Amalec mós lori David nia feen naʼin-rua nuʼudar dadur, neʼe mak Ahinoam ema Jezreel, no Abigail neʼebé kaben ho David bainhira Nabal, ema Karmel, mate ona.+
6 David sente laran-susar tebes, tanba ema hotu neʼebé hamutuk ho nia sai hirus loos* tanba lakon sira-nia oan-mane ho oan-feto, no sira koʼalia hamutuk ona atu tuda David. Maibé David hametin ninia an hodi sadere ba Jeová, ninia Maromak.+
7 Tuirmai David dehan ba Ahimelec nia oan-mane Abiatar+ neʼebé serbí nuʼudar amlulik: “Favór ida, lori efod* mai.”+ Entaun Abiatar lori efod ba David.
8 David husu ba Jeová:+ “Haʼu tenke duni tuir grupu naʼok-teen neʼebé mai ataka ka lae? Haʼu sei toman sira ka lae?” Maromak hatán: “Duni tuir sira bá, tanba ó sei toman sira, no ó sei foti fali buat hotu neʼebé sira hadau.”+
9 David bá kedas hamutuk ho ninia ema naʼin-600,+ no sira bá toʼo Mota* Besor, no ninia ema balu hela deʼit iha neʼebá.
10 David kontinua duni tuir sira hamutuk ho ninia ema naʼin-400, maibé ema naʼin-200 kole loos toʼo labele hakur liu Mota* Besor, sira hela deʼit iha fatin neʼe.+
11 Sira hetan mane Ejitu ida iha rai-luan no lori nia ba David. Sira fó ai-han ba nia atu han no bee atu hemu.
12 Sira mós fó dose husi figeira-maran* pedasuk ida ba nia no mós dose rua husi uvas-maran. Bainhira nia han tiha, nia iha fali forsa, tanba nia la han no la hemu buat ida ba loron tolu no kalan tolu ona.
13 David husu ba nia: “Ó-nia naʼi mak sé? Ó husi neʼebé?” Nia hatán: “Haʼu mak ema Ejitu, no atan ba ema Amalec ida, maibé haʼu-nia naʼi husik hela haʼu tanba loron tolu liubá haʼu sai moras.
14 Ami ataka parte súl* husi ema Kereti+ nia rai no área Judá, no mós ataka parte súl* husi Caleb nia rai,+ no ami sunu sidade Ziklag.”
15 Ho ida-neʼe, David dehan: “Ó sei lori haʼu ba grupu naʼok-teen neʼe ka lae?” Nia hatán: “Se Ita jura ba haʼu hodi Maromak katak Ita sei la oho haʼu no la entrega fali haʼu ba haʼu-nia naʼi, haʼu sei lori Ita ba grupu naʼok-teen neʼe.”
16 Entaun mane neʼe lori David tun ba fatin neʼebé ema sira-neʼe namkari hodi han, hemu no halo festa tanba sira hadau ona buat barak tebes husi ema Filístia nia rai no husi rai-Judá.
17 Depois neʼe, David oho sira husi dadeer-saan nakukun toʼo kalan. La iha mane ida mak halai,+ só deʼit mane naʼin-400 mak halai hodi saʼe kuda-kamelu.
18 David foti fali buat hotu neʼebé ema Amalec hadau,+ no David salva ninia feen naʼin-rua.
19 La iha buat ida mak lakon, husi buat kiʼik toʼo boot. Sira foti fali sira-nia oan-mane no oan-feto sira, no mós sasán sira neʼebé ema hadau ona.+ David foti fali buat hotu neʼebé ema Amalec hadau ona.
20 Entaun David foti ema Amalec nia bibi no karau hotu, no sira lori neʼe hamutuk ho sira-nia animál rasik. Sira dehan: “Neʼe mak David nian.”
21 Tuirmai David toʼo fali ba mane naʼin-200 neʼebé hela deʼit besik Mota* Besor+ tanba kole loos atu kontinua laʼo hamutuk ho David, no sira sai mai hasoru David ho ninia ema sira neʼebé hamutuk ho nia. Bainhira David hakbesik ba mane sira-neʼe, nia husu sira diʼak ka lae.
22 Maibé, mane hotu neʼebé aat no folin-laek neʼebé bá hamutuk ho David dehan: “Tanba sira la bá ho ita, ita sei la fó sira sasán ida neʼebé ita foti fali. Entrega deʼit sira-nia feen no oan sira no haruka sira bá.”
23 Maibé David hatete: “Haʼu-nia maun-alin sira, imi labele halo hanesan neʼe ho buat neʼebé Jeová fó ona ba ita. Nia proteje ita no entrega ba ita grupu naʼok-teen neʼebé mai ataka ita.+
24 Sé mak sei apoia imi-nia liafuan neʼe? Ema neʼebé bá halo funu sei simu parte neʼebé hanesan deʼit ho ema neʼebé tuur hodi hein sasán sira.+ Ema hotu sei simu parte neʼebé hanesan.”+
25 Hahú husi loron neʼebá, nia halo ida-neʼe nuʼudar ukun-fuan no lei ba Izraél toʼo ohin loron.
26 Bainhira David fila fali ba Ziklag, nia haruka sasán balu neʼebé sira hadau ba Judá nia katuas sira neʼebé mak ninia belun, hodi dehan: “Neʼe mak prezente* ba imi, neʼebé ami foti husi Jeová nia inimigu.”
27 Nia haruka prezente neʼe ba sira neʼebé iha Betel,+ ba sira neʼebé iha Ramot neʼebé iha área Negeb,* ba sira neʼebé iha Jatir,+
28 ba sira neʼebé iha Aroer, ba sira neʼebé iha Sifmot, ba sira neʼebé iha Estemoa,+
29 ba sira neʼebé iha Rakal, ba sira neʼebé iha ema Jerameel nia sidade sira,+ ba sira neʼebé iha ema Keneu nia sidade sira,+
30 ba sira neʼebé iha Horma,+ ba sira neʼebé iha Borasan, ba sira neʼebé iha Atak,
31 ba sira neʼebé iha Hebron,+ no ba fatin hotu neʼebé David ho ninia ema sira vizita beibeik ona.
Nota-rodapé
^ Ka “área Negeb”.
^ Ka “sente moruk loos”.
^ Ka “husi figeira-maran neʼebé buti hamutuk”.
^ Ka “área Negeb”.
^ Ka “área Negeb”.
^ Orj., “bensaun”.
^ Ka “parte súl”.
