Primeiru Samuel 4:1-22
4 Samuel kontinua fó sai liafuan neʼe ba ema Izraél hotu.
Tuirmai ema Izraél bá halo funu hasoru ema Filístia. Tropa Izraél halibur iha Ebenezer, no tropa Filístia halibur iha Afek.
2 Tropa Filístia forma hodi halo funu hasoru ema Izraél, maibé funu neʼe la diʼak ba ema Izraél. Ema Filístia manán no sira oho tropa Izraél naʼin-4.000 iha fatin funu nian.
3 Bainhira tropa sira fila fali ba sira-nia fatin, Izraél nia katuas sira hatete: “Tanbasá mak Jeová husik ita lakon funu ho* ema Filístia ohin?+ Mai ita foti Jeová nia Arka Aliansa nian husi Silo,+ atu nuneʼe Arka neʼe bele hamutuk ho ita no salva ita husi ita-nia inimigu nia liman.”
4 Entaun sira haruka ema ba Silo, no lori Arka Aliansa nian husi neʼebá, katak Maromak Jeová nia Arka, Maromak neʼebé ukun tropa lalehan nian, neʼebé tuur iha ninia kadunan iha kerubín sira-nia leten.*+ Eli nia oan-mane naʼin-rua, Hofni no Fineias,+ mós hamutuk ho Maromak loos nia Arka Aliansa nian.
5 Bainhira Jeová nia Arka Aliansa nian toʼo iha tropa nia fatin, ema Izraél hotu hakilar ho lian makaʼas, toʼo halo rai nakdoko.
6 Bainhira rona tiha lian hakilar nian, ema Filístia sira dehan: “Tanbasá mak ema Ebreu hakilar ho lian makaʼas iha sira-nia fatin?” Ikusmai sira hatene katak Jeová nia Arka toʼo ona iha fatin neʼe.
7 Ema Filístia sai taʼuk, tanba sira dehan: “Maromak mai ona iha fatin neʼe!”+ Entaun sira hatete: “Susar boot sei kona ita, tanba seidauk akontese buat ida hanesan neʼe!
8 Susar boot sei kona ita! Sé mak sei salva ita husi Maromak kmanek neʼe nia liman? Neʼe mak Maromak neʼebé oho ema Ejitu ho kastigu oioin iha rai-fuik.+
9 Sai aten-brani bá hanesan mane forte, oh imi ema Filístia sira, atu nuneʼe imi labele serbí ema Ebreu hanesan sira serbí imi.+ Halo funu bá hanesan mane forte!”
10 Entaun ema Filístia halo funu no ema Izraél lakon,+ no sira ida-idak halai fali ba sira-nia fatin. Ema Filístia oho ema barak tebes. Sira oho Izraél nia tropa neʼebé laʼo ain hamutuk naʼin-30.000.
11 Liután neʼe, ema Filístia mós foti Maromak nia Arka, no Eli nia oan-mane naʼin-rua, Hofni no Fineias, mate.+
12 Iha loron neʼe, mane Benjamim ida halai husi fatin funu nian hodi toʼo iha Silo. Mane neʼe lees ona ninia roupa no tau rai-rahun iha nia ulun.+
13 Bainhira mane neʼe toʼo, Eli tuur hela iha kadeira besik dalan ninin hodi haree, tanba nia laran-nakdedar tebes kona-ba Maromak loos nia Arka.+ Mane neʼe tama ba sidade hodi konta buat neʼebé akontese ona, no sidade tomak komesa tanis halerik.
14 Bainhira Eli rona lian tanis halerik, nia husu: “Tanbasá mak ema barullu hanesan neʼe?” Mane Benjamim neʼe tama lalais hodi konta ba Eli buat neʼebé akontese.
15 Iha tempu neʼe, Eli tinan 98 ona, ninia matan haree la moos ona.+
16 Mane neʼe hatete ba Eli: “Haʼu foin mai husi fatin funu nian! Haʼu halai husi neʼebá.” Ho ida-neʼe, Eli husu: “Haʼu-nia oan, saida mak akontese?”
17 Mane neʼebé lori lia-menon neʼe dehan: “Ema Izraél halai husi ema Filístia, no sira barak mate.+ Ita-nia oan naʼin-rua, Hofni no Fineias, mós mate ona,+ no ema Filístia hadau tiha Maromak loos nia Arka.”+
18 Bainhira mane neʼe temi kona-ba Maromak loos nia Arka, Eli monu ba kotuk husi ninia kadeira besik portaun neʼe, no ninia kakorok tohar no nia mate, tanba nia katuas liu ona no isin todan. Nia tesi-lia iha Izraél ba tinan 40 ona.
19 Eli nia feto-foun, Fineias nia feen, isin-rua hela no besik atu tuur-ahi. Bainhira nia rona lia-menon kona-ba ema Filístia hadau ona Maromak loos nia Arka no rona katak ninia banin-mane no ninia laʼen mate ona, nia hakruʼuk no derrepente deʼit nia tuur-ahi.
20 Bainhira nia besik atu mate, feto sira neʼebé hamriik iha nia sorin dehan: “Keta taʼuk, tanba ó tuur-ahi ona oan-mane ida.” Feto neʼe la hatán buat ida no la tau atensaun ba sira.
21 Maibé feto neʼe hanaran labarik-mane neʼe Ikabod,*+ tanba nia dehan: “Glória lakon ona iha Izraél hodi bá dadur.”+ Nia hatete nuneʼe tanba ema Filístia hadau ona Maromak loos nia Arka no tanba buat neʼebé akontese ba ninia banin-mane no ninia laʼen.+
22 Nia hatete: “Glória lakon ona iha Izraél hodi bá dadur, tanba ema hadau ona Maromak loos nia Arka.”+
Nota-rodapé
^ Orj., “Tanbasá mak Jeová manán ita liuhusi”.
^ Ka karik “kerubín sira-nia leet”.
^ Naran neʼe katak “Glória iha neʼebé?”
