Primeiru Samuel 7:1-17
7 Ho ida-neʼe, ema Kiriat-Jearim mai no foti Jeová nia Arka hodi lori saʼe ba Abinadab nia uma+ iha foho-oan nia leten, no sira hili* ninia oan-mane Eleazar atu tau matan ba Jeová nia Arka.
2 Tempu balu liutiha, katak liutiha tinan 20 husi tempu neʼebé Arka toʼo iha Kiriat-Jearim, umakain Izraél hotu komesa buka* Jeová.+
3 Tuirmai Samuel dehan ba umakain Izraél hotu: “Se imi hakarak fila fali ba Jeová ho imi-nia laran tomak,+ imi tenke hasai tiha maromak falsu*+ no hasai tiha estátua Astoret sira+ husi imi-nia leet, no fó imi-nia laran tomak ba Jeová hodi serbí deʼit nia,+ nuneʼe nia sei salva imi husi ema Filístia nia liman.”+
4 Rona tiha neʼe, ema Izraél hasai tiha Baal sira no estátua Astoret sira no serbí deʼit Jeová.+
5 Tuirmai Samuel hatete: “Halibur ema Izraél hotu iha Mizpa,+ no haʼu sei harohan ba Jeová kona-ba imi.”+
6 Entaun sira halibur hamutuk iha Mizpa, no sira kuru bee no fakar ba rai iha Jeová nia oin* no halo jejún iha loron neʼe.+ Tuirmai sira hatete: “Ami halo ona sala hasoru Jeová.”+ No Samuel hahú serbí nuʼudar juís+ ba ema Izraél iha Mizpa.
7 Bainhira ema Filístia rona katak ema Izraél halibur hamutuk ona iha Mizpa, ema Filístia nia naʼi-ulun sira+ bá halo funu hasoru ema Izraél. Bainhira ema Izraél rona kona-ba neʼe, sira sai taʼuk.
8 Tan neʼe, ema Izraél hatete ba Samuel: “Keta para atu husu ba Jeová, ita-nia Maromak, hodi ajuda ita+ no salva ita husi ema Filístia nia liman.”
9 Entaun Samuel foti bibi-malae oan ida no hasaʼe neʼe tomak nuʼudar sakrifísiu sunu nian+ ba Jeová. Samuel husu ba Jeová atu ajuda ema Izraél, no Jeová rona ba nia.+
10 Bainhira Samuel hasaʼe hela sakrifísiu sunu nian, ema Filístia hakbesik mai atu halo funu hasoru ema Izraél. Iha loron neʼe Jeová halo rai-tarutu makaʼas+ hasoru ema Filístia, no Nia halo sira runguranga,+ no sira lakon iha ema Izraél nia oin.+
11 Ho ida-neʼe, ema Izraél sai husi Mizpa hodi duni tuir ema Filístia, no kontinua oho sira toʼo Bet-Kar nia sorin parte súl.
12 Tuirmai Samuel foti fatuk ida+ no tau neʼe entre Mizpa no Jesana no hanaran neʼe Ebenezer,* tanba nia hatete: “Toʼo agora Jeová ajuda ona ita.”+
13 Ho ida-neʼe, ema Izraél manán ema Filístia, no sira la tama tan iha Izraél nia rai.+ No Jeová nia liman kontinua kontra hasoru ema Filístia durante Samuel nia moris tomak.+
14 No mós ema Izraél hetan fali sidade sira neʼebé uluk ema Filístia hadau, hahú husi Ekron toʼo Gat, no ema Izraél foti fali sira-nia rai husi ema Filístia nia liman.
No iha mós dame entre ema Izraél no ema Amoreu.+
15 Samuel kontinua tesi-lia ba ema Izraél durante ninia moris tomak.+
16 Tinan-tinan nia bá Betel,+ Gilgal+ no Mizpa,+ hodi tesi-lia ba ema Izraél iha fatin sira-neʼe hotu.
17 Maibé baibain nia fila fali ba Ramá,+ tanba ninia uma iha neʼebá, no nia mós tesi-lia ba ema Izraél iha neʼebá. Nia harii altár ida ba Jeová iha neʼebá.+
Nota-rodapé
^ Orj., “halo santu”. Haree “Halo santu” iha Glosáriu.
^ Ka “tanis ba”.
^ Ka “maromak husi rai seluk”.
^ Karik neʼe mak sira-nia toman atu hatudu katak sira arrepende an.
^ Naran neʼe katak “Fatuk ajuda nian”.
