Segundu Pedro 3:1-18
3 Maluk doben sira, ida-neʼe mak karta segundu neʼebé haʼu hakerek ba imi, no hanesan haʼu-nia karta ida primeiru, haʼu hakarak fó-hanoin ba imi kona-ba buat ida atu ajuda imi iha hanoin neʼebé loos,+
2 katak imi tenke hanoin-hetan liafuan sira neʼebé uluk fó sai ona* liuhusi profeta santu sira no mós hanoin-hetan mandamentu husi Naʼi no Salvadór neʼebé fó sai ona liuhusi imi-nia apóstolu sira.
3 Ulukliu, hatene bá katak iha loron ikus sira sei mosu gozadór sira neʼebé koʼalia aat kona-ba buat neʼebé diʼak, sira halo tuir deʼit sira-nia hakarak rasik+
4 no dehan: “Nia promete katak nia sei mai fali,* maibé nia iha neʼebé?+ Husi tempu neʼebé ita-nia beiʼala sira mate,* buat hotu kontinua hanesan deʼit ho tempu neʼebé Maromak kria ema.”+
5 Ho neon, sira nega realidade katak horiuluk kedas lalehan iha ona, no rai neʼebé metin mosu sai husi bee no iha bee nia klaran tanba Maromak nia liafuan.+
6 No liuhusi buat sira-neʼe mak mundu iha tempu neʼebá lakon bainhira rai-nabeen taka mundu tomak.+
7 Maibé liuhusi liafuan neʼebé hanesan mak lalehan no mundu neʼebé iha agora deside tiha ona atu halakon ho ahi no rai hela toʼo loron tesi-lia nian no loron atu halakon ema aat.+
8 Maibé maluk doben sira, keta haluha buat tuirmai neʼe: Ba Jeová* loron ida mak hanesan tinan rihun ida no tinan rihun ida mak hanesan loron ida.+
9 Jeová* la demora atu kumpre ninia promesa,+ hanesan ema balu hanoin katak nia demora, maibé nia hatudu pasiénsia ba imi tanba nia lakohi ema ida lakon maibé nia hakarak ema hotu atu arrepende sala.+
10 Jeová* nia loron+ sei mai hanesan naʼok-teen ida,+ iha loron neʼe lalehan sei lakon+ derrepente deʼit ho tarutu makaʼas, maibé buat sira neʼebé iha lalehan no rai sei nabeen tanba manas makaʼas, no rai ho buat neʼebé iha rai sei hatudu sai tiha.*+
11 Tanba buat sira-neʼe hotu sei lakon iha dalan hanesan neʼe, imi hanoin didiʼak bá imi tenke sai ema hanesan saida. Imi tenke hatudu hahalok santu no laran-metin ba Maromak,*
12 nuʼudar imi hein no hanoin-hetan nafatin kona-ba Jeová* nia loron neʼebé atu mai.*+ Iha loron neʼebá lalehan sei halakon tiha+ iha ahi, no buat sira iha lalehan no rai sei nabeen tanba manas makaʼas.
13 Maibé tuir Maromak nia promesa, ita hein lalehan foun no rai foun,+ no iha neʼebá buat hotu sei tuir justisa.+
14 Neʼe duni, maluk doben sira, tanba imi hein hela buat sira-neʼe, hakaʼas an liután atu ikusmai Maromak haree imi nuʼudar ema neʼebé moos, sala-laek no iha dame ho Maromak.+
15 Liután neʼe, haree ita-nia Naʼi nia pasiénsia nuʼudar salvasaun, hanesan ita-nia maluk doben Paulo mós hakerek ba imi tuir matenek neʼebé fó ona ba nia.+
16 Tuir loloos, nia hakerek ona kona-ba buat sira-neʼe iha ninia karta hotu. Maibé iha karta sira-neʼe, iha buat balu neʼebé susar atu komprende, no ema neʼebé laran namlele neʼebé la komprende* buat sira-neʼe, sira bobar lia kona-ba neʼe, hanesan sira mós halo ba Eskritura sira seluk, no neʼe sei halo sira lakon.
17 Tan neʼe, maluk doben sira, tanba imi hatene nanis ona kona-ba buat sira-neʼe, entaun kuidadu imi-nia an bá, atu nuneʼe ema aat sira neʼebé kontra lei sei la lori lakon imi tuir sira-nia sala no imi lakon* imi-nia laran-metin.+
18 Maibé, kontinua simu ita-nia Naʼi no Salvadór Jesus Kristu nia laran-diʼak neʼebé boot no koñesimentu kona-ba nia. Nia mak merese simu glória agora no ba nafatin. Amen.
Nota-rodapé
^ Ka “fó sai nanis ona”.
^ Haree “Parousia” iha Glosáriu.
^ Orj., “toba”.
^ Neʼe katak hatudu sai atu ahi han.
^ Ka “no devosaun ba Maromak”. Haree “Devosaun ba Maromak” iha Glosáriu.
^ Ka “no imi hakarak tebes Jeová nia loron atu mai”. Orj., “no imi halo Jeová nia loron toʼo lalais”.
^ Ka “seidauk aprende”.
^ Ka “imi monu husi”.
