Segundu Reis 9:1-37
9 Profeta Eliseu bolu profeta nia oan-mane ida,* hodi dehan: “Kesi ó-nia roupa iha ó-nia knotak, no lori mina iha buli ida-neʼe no bá lalais Ramot-Gilead.+
2 Bainhira ó toʼo iha neʼebá, buka Jeosafát nia oan-mane Jeú,+ Ninsi nia bei-oan. Ó tenke tama no haruka Jeú hamriik husi ninia maluk sira-nia leet no lori nia ba kuartu laran.
3 Tuirmai foti buli neʼebé iha mina no fui mina neʼe ba Jeú nia ulun no dehan: ‘Jeová dehan nuneʼe: “Haʼu hili* ona ó nuʼudar liurai ba Izraél.”’+ Tuirmai ó tenke loke odamatan no halai fila kedas.”
4 Ho ida-neʼe, profeta nia oan-mane* neʼe bá Ramot-Gilead.
5 Bainhira nia toʼo, xefe tropa nian sira tuur hela iha neʼebá. Nia dehan: “Oh xefe, haʼu lori lia-menon ba Ita.” Jeú husu: “Ba xefe ida-neʼebé?” Nia hatán: “Ba Ita-Boot.”
6 Entaun Jeú hamriik no tama ba uma laran. Profeta nia oan-mane* neʼe fui mina ba Jeú nia ulun no dehan: “Jeová, Izraél nia Maromak, dehan nuneʼe: ‘Haʼu hili* ona ó nuʼudar liurai ba Jeová nia povu Izraél.+
7 Ó tenke oho ema husi ó-nia naʼi Acab nia umakain, nuneʼe mak haʼu sei selu fali haʼu-nia atan profeta sira-nia raan no Jeová nia atan seluk hotu nia raan, katak sira hotu neʼebé mate iha Jezabel nia liman.+
8 Ema hotu iha Acab nia umakain tenke mate. Haʼu sei halakon mane hotu* husi Acab nia umakain, inklui mós ema neʼebé kbiit-laek no fraku iha Izraél.+
9 Haʼu sei halo Acab nia umakain sai hanesan Nebat nia oan-mane Jeroboão+ nia umakain no hanesan Ahias nia oan-mane Baasa nia umakain.+
10 Kona-ba Jezabel, asu sei han ninia isin iha toʼos laran iha Jezreel,+ no ema ida mós sei la hakoi nia.’” Tuirmai, profeta neʼe loke odamatan no halai.+
11 Bainhira Jeú fila fali ba ninia naʼi nia atan sira, sira husu nia: “Buat hotu diʼak ka lae? Tanbasá mak mane bulak neʼe mai hasoru ó?” Nia hatán ba sira: “Imi rasik hatene mane neʼe, nia koʼalia hanesan ema bulak.”
12 Maibé sira dehan: “Ó bosok! Favór ida, konta mai ami.” Tuirmai nia dehan: “Nia hatete nuneʼe mai haʼu, no nia hatutan tan: ‘Jeová dehan nuneʼe: “Haʼu hili* ona ó nuʼudar liurai ba Izraél.”’”+
13 Rona tiha neʼe, sira ida-idak foti lalais sira-nia roupa no nahe iha eskada hodi nia laʼo,+ no sira huu dikur, hodi dehan: “Jeú sai ona liurai!”+
14 Tuirmai Jeosafát nia oan-mane Jeú,+ Ninsi nia bei-oan, halo planu hodi kontra Jeorão.
Iha tempu neʼebá, Jeorão hamutuk ho tropa Izraél hotu iha Ramot-Gilead+ hodi defende rai-Izraél husi Liurai Hazael+ husi Síria.
15 Liutiha neʼe, Liurai Jeorão fila fali ba Jezreel+ atu bele sai diʼak fali husi kanek neʼebé nia hetan husi tropa Síria bainhira nia halo funu hasoru Liurai Hazael husi Síria.+
Jeú dehan: “Se imi apoia haʼu, keta husik ema ida halai sai husi sidade atu bá fó-hatene ida-neʼe iha Jezreel.”
16 Tuirmai Jeú saʼe ninia kuda-karreta no bá Jezreel, tanba Jeorão toba iha neʼebá no kanek hela, no mós Liurai Acazias husi Judá tun ona bá neʼebá atu haree Jeorão.
17 Bainhira guarda hamriik iha uma aas* leten iha Jezreel, nia haree Jeú nia tropa lubun hakbesik mai daudaun. Guarda neʼe hatete kedas: “Haʼu haree ema-lubun boot.” Jeorão dehan: “Bolu tropa ida no haruka nia saʼe kuda hodi bá hasoru sira, no husu ba sira: ‘Imi mai ho dame ka lae?’”
18 Entaun tropa neʼe saʼe kuda hodi bá hasoru Jeú no dehan: “Liurai husu nuneʼe: ‘Imi mai ho dame ka lae?’” Maibé Jeú hatán: “Ó hatene saida kona-ba ‘dame’? Laʼo tuir haʼu iha haʼu-nia kotuk!”
Tuirmai guarda dehan: “Tropa neʼe hasoru sira, maibé nia la fila fali.”
19 Ho ida-neʼe, Jeorão haruka tan tropa segundu neʼebé saʼe kuda, bainhira tropa neʼe hasoru sira, nia dehan: “Liurai husu nuneʼe: ‘Imi mai ho dame ka lae?’” Maibé Jeú hatán: “Ó hatene saida kona-ba ‘dame’? Laʼo tuir haʼu iha haʼu-nia kotuk!”
20 Tuirmai guarda dehan: “Tropa neʼe hasoru sira, maibé nia la fila fali, no dalan neʼebé mane neʼe lori kuda-karreta mak hanesan Ninsi nia bei-oan* Jeú, tanba Jeú lori kuda-karreta hanesan ema bulak.”
21 Jeorão hatete: “Prepara kuda-karreta!” Entaun sira prepara ninia kuda-karreta funu nian. Tuirmai Liurai Jeorão husi Izraél ho Liurai Acazias+ husi Judá saʼe sira ida-idak nia kuda-karreta funu nian hodi bá hasoru Jeú. Sira hasoru nia iha Nabot+ ema Jezreel nia toʼos.
22 Bainhira Jeorão haree Jeú, nia dehan kedas: “Jeú, ó mai ho dame ka lae?” Maibé Jeú hatán: “Oinsá mak bele iha dame se ó-nia inan Jezabel moris hela?+ Ninia hahalok hanesan feto-aat* no ninia hahalok matan-dook nian mós barak tebes.”+
23 Jeorão fila kedas ninia kuda-karreta hodi halai, no nia hatete ba Acazias: “Acazias, nia lohi ona ita!”
24 Jeú foti ninia rama no hana kona Jeorão nia kotuk, no rama-oan tama borus ninia fuan, no nia mate iha ninia kuda-karreta laran.
25 Tuirmai Jeú hatete ba ninia ajudante ida naran Bidkar: “Foti nia hodi soe ba Nabot ema Jezreel nia toʼos.+ Hanoin-hetan, uluk haʼu no ó saʼe kuda-karreta hamutuk hodi tuir iha ninia aman Acab nia kotuk bainhira Jeová rasik fó sai liafuan kastigu neʼe kontra nia:+
26 ‘Jeová dehan: “Horiseik haʼu haree Nabot nia raan+ no ninia oan-mane sira-nia raan no haʼu sei selu fali+ duni ba ó kona-ba raan neʼe iha toʼos neʼe”, Jeová dehan.’ Tan neʼe, foti ninia mate-isin no soe ba rai neʼe, hodi tuir Jeová nia liafuan.”+
27 Bainhira Liurai Acazias+ husi Judá haree buat neʼebé akontese, nia halai liuhusi dalan neʼebé besik jardín boot.* Depois neʼe, Jeú duni tuir nia no dehan: “Oho mós nia!” Entaun sira ataka nia iha ninia kuda-karreta bainhira nia iha dalan atu bá Gur, neʼebé besik Ibleam.+ Maibé nia kontinua halai toʼo Megido no mate iha neʼebá.
28 Ninia atan sira lori nia iha kuda-karreta hodi bá Jeruzalein, no sira hakoi nia iha ninia rate hamutuk ho ninia beiʼala sira iha David nia Sidade.+
29 Iha tinan 11 husi Acab nia oan-mane Jeorão nia ukun mak Acazias+ sai liurai hodi ukun rai-Judá.
30 Bainhira Jeú mai toʼo Jezreel,+ Jezabel+ rona kona-ba neʼe. Entaun Jezabel pinta metan ninia matan-kulit no halo furak ninia fuuk no hateke tun husi janela.
31 Bainhira Jeú tama liuhusi portaun, Jezabel dehan: “Ó haluha ona buat neʼebé akontese ba Zimri neʼebé oho ninia naʼi ka?”+
32 Jeú hateke saʼe ba janela, no dehan: “Sé mak apoia haʼu? Sé?”+ Ema-boot naʼin-rua ka tolu neʼebé serbisu iha palásiu hateke tun kedas ba nia.
33 Jeú hatete: “Soe tun feto neʼe!” Entaun sira soe tun Jezabel, no ninia raan balu katiik ba didin no kuda sira, no Jeú nia kuda sama ninia mate-isin.
34 Depois neʼe, nia tama no han-hemu. Nia dehan: “Favór ida, haloot tiha feto neʼebé hetan malisan neʼe nia mate-isin no lori bá hakoi, tanba nia mak liurai nia oan-feto.”+
35 Maibé bainhira sira bá atu hakoi nia, sira hetan deʼit ulun-ruin no ninia ain-tanen ho liman-tanen sira.+
36 Bainhira sira fila fali no fó-hatene ba Jeú, Jeú hatete: “Neʼe kumpre Jeová nia liafuan+ neʼebé fó sai ona liuhusi ninia atan Elias ema Tisbe, hodi dehan: ‘Asu sei han Jezabel nia isin iha toʼos ida iha Jezreel.+
37 Jezabel nia mate-isin sei sai hanesan adubu* iha toʼos ida iha Jezreel, atu nuneʼe ema labele dehan: “Neʼe mak Jezabel.”’”
Nota-rodapé
^ Orj., “fui mina”. Haree “Fui mina” iha Glosáriu.
^ Ka “profeta nia ajudante”.
^ Ka “profeta nia ajudante”.
^ Orj., “fui mina”. Haree “Fui mina” iha Glosáriu.
^ Orj., “ema naran deʼit neʼebé mii iha moru-lolon”. Liafuan sira-neʼe refere ba mane no uza atu hatudu hakribi.
^ Orj., “fui mina”. Haree “Fui mina” iha Glosáriu.
^ Orj., “oan-mane”.
^ Ka “Nia halo prostituisaun”.
^ Orj., “uma jardín”.
^ Ka “estrume”.
