Segundu Samuel 11:1-27
11 Bainhira tinan foin komesa,* katak tempu neʼebé liurai sira baibain bá atu halo funu, David haruka Joab no ninia atan sira no tropa Izraél hotu atu bá halakon ema Ammon, no sira halo serku ba sidade Rabá,+ maibé David hela iha Jeruzalein.+
2 Iha kalan* ida David hadeer husi ninia kama no laʼo bá-mai iha liurai nia palásiu leten. No husi neʼebá nia haree feto ida hariis hela, feto neʼe bonita tebes.
3 David haruka ema atu husu kona-ba feto neʼe, no ema neʼe fó-hatene dehan: “Nia mak Eliam+ nia oan-feto Bat-Seba,+ Urias+ ema Hetes+ nia feen.”
4 Tuirmai David haruka ema atu lori feto neʼe mai.+ Entaun feto neʼe mai hasoru David no David halo relasaun ho nia.+ Neʼe akontese durante tempu neʼebé feto neʼe hamoos an hela husi ninia kondisaun foʼer.*+ Depois neʼe, feto neʼe fila fali ba ninia uma.
5 Feto neʼe sai isin-rua, no nia haruka lia-menon ba David, hodi dehan: “Haʼu isin-rua ona.”
6 Rona tiha neʼe, David haruka lia-menon ba Joab: “Haruka Urias ema Hetes mai.” Entaun Joab haruka Urias bá hasoru David.
7 Bainhira Urias toʼo, David husu Joab diʼak ka lae, no husu tropa sira diʼak ka lae, no mós husu oinsá ho funu neʼe.
8 Tuirmai David hatete ba Urias: “Tun ba ó-nia uma no deskansa.”* Bainhira Urias sai ona husi liurai nia palásiu, liurai haruka tuir prezente* ba Urias.
9 Maibé, Urias toba iha liurai nia palásiu oin hamutuk ho ninia naʼi nia atan seluk hotu, no nia la tun ba ninia uma rasik.
10 Entaun ema fó-hatene ba David, hodi dehan: “Urias la tun ba ninia uma rasik.” Ho ida-neʼe, David hatete ba Urias: “Ó foin fila husi fatin dook, loos ka lae? Tanbasá mak ó la tun ba ó-nia uma rasik?”
11 Urias hatán ba David: “Arka+ no tropa Izraél ho Judá hela iha tenda sira, no haʼu-nia naʼi Joab ho ninia ema sira mós hela iha rai-luan. Entaun oinsá mak haʼu bele tun ba haʼu-nia uma rasik atu han-hemu no toba ho haʼu-nia feen?+ Haʼu koʼalia loloos ba Ita katak,* haʼu sei nunka halo nuneʼe!”
12 Entaun David hatete ba Urias: “Ohin kalan hela tan iha neʼe, no aban haʼu sei haruka ó bá.” Entaun Urias hela iha Jeruzalein iha loron neʼe no loron tuirmai.
13 David mós bolu nia mai atu han-hemu ho nia, no David halo nia lanu. Maibé iha kalan, Urias bá toba iha ninia kama hamutuk ho ninia naʼi nia atan sira, no nia la tun ba ninia uma rasik.
14 Iha dadeer David hakerek karta ba Joab no haruka karta neʼe liuhusi Urias.
15 Iha karta neʼe David dehan: “Tau Urias hamutuk ho tropa sira neʼebé iha oin iha fatin neʼebé funu makaʼas liu. Tuirmai imi tenke hakiduk iha ninia kotuk, atu nuneʼe ema sei ataka hodi oho nia.”+
16 Joab hafuhu tiha ona sidade neʼe ho didiʼak, no nia tau Urias iha fatin neʼebé nia hatene katak iha funu-naʼin sira neʼebé kbiit boot.
17 Bainhira ema sira iha sidade neʼe sai mai atu ataka no halo funu hasoru Joab, ema sira-neʼe oho David nia atan balu, no oho mós Urias ema Hetes.+
18 Depois neʼe, Joab haruka lia-menon ba David kona-ba funu neʼe.
19 Nia fó mandamentu ba ema neʼebé lori lia-menon, hodi dehan: “Bainhira ó remata ona hodi koʼalia ba liurai kona-ba buat hotu neʼebé akontese iha funu neʼe,
20 karik liurai sei sai hirus no dehan ba ó: ‘Tanbasá mak imi hakbesik liu ba sidade neʼe atu halo funu? Imi la hatene katak sira sei hana imi husi moru leten ka?
21 Uluk sé mak oho Jerubeset+ nia oan-mane Abimelec?+ Neʼe mak feto ida neʼebé soe fatuk dulas trigu nian ba nia husi moru leten no halo nia mate iha Tebez, loos ka lae? Tanbasá mak imi tenke hakbesik liu ba moru?’ Se hanesan neʼe, ó tenke dehan: ‘Ita-nia atan Urias ema Hetes mós mate.’”
22 Entaun ema neʼe lori lia-menon bá no konta ba David liafuan hotu neʼebé Joab haruka nia atu fó sai.
23 Ema neʼe dehan ba David: “Inimigu sira forte liu ami, no sira sai mai hodi halo funu hasoru ami iha rai-luan, maibé ami duni fali sira ba sidade nia portaun.
24 Tropa sira hana Ita-nia atan sira husi moru leten, no liurai nia atan balu mate. Ita-nia atan Urias ema Hetes mós mate.”+
25 Rona tiha neʼe, David dehan ba nia: “Hatete ba Joab: ‘Keta sente laran-susar kona-ba neʼe, tanba ema naran deʼit bele mate iha funu. Entaun halo funu makaʼas liután hasoru sidade neʼe no manán sidade neʼe.’+ No fó aten-brani ba nia.”
26 Bainhira Urias nia feen rona katak ninia laʼen mate ona, nia komesa tanis ba ninia laʼen.
27 Bainhira tempu triste ba ninia laʼen remata ona, David haruka kedas ema bolu nia no lori nia ba David nia uma, no nia sai David nia feen+ no tuur-ahi oan-mane ida ba David. Maibé Jeová la kontente duni ho buat neʼebé David halo ona.*+
Nota-rodapé
^ Ka “rai-nakaras”.
^ Karik nia sai la moos iha ninia tempu menstruasaun.
^ Orj., “fase ó-nia ain”.
^ Ka “liurai nia parte”, neʼe mak parte neʼebé haruka ba bainaka neʼebé ema respeitu.
^ Ka “Tebes duni hanesan Ita-Boot moris”.
^ Orj., “David nia hahalok neʼe mak buat neʼebé aat iha Jeová nia matan”.
