Segundu Samuel 24:1-25
24 Jeová sai hirus tebes hasoru ema Izraél+ tanba iha ida* neʼebé soran David, hodi dehan: “Bá, sura+ ema Izraél no ema Judá.”+
2 Entaun liurai hatete ba Joab,+ xefe tropa nian, neʼebé hamutuk ho nia, hodi dehan: “Favór ida, laʼo haleʼu Izraél nia suku sira hotu husi Dan toʼo Beer-Seba,+ no halo rejistu ba povu neʼe, atu nuneʼe haʼu bele hatene povu neʼe hamutuk hira.”
3 Maibé Joab hatete ba liurai: “Haʼu hein katak Jeová, Ita-nia Maromak, sei aumenta povu neʼe ba dala 100, no haʼu-nia naʼi liurai nia matan sei haree ida-neʼe. Maibé tanbasá mak haʼu-nia naʼi liurai hakarak atu halo ida-neʼe?”
4 Maibé liurai nia liafuan manán Joab nian no xefe tropa sira-nian. Entaun Joab no xefe tropa sira sai husi liurai nia oin hodi bá halo rejistu povu Izraél.+
5 Sira hakur Mota Jordaun no hela iha Aroer,+ no sira mós hela besik* sidade neʼebé iha foho-leet* nia klaran, no sira bá ema Gad nia rai no tuirmai sira kontinua ba Jazer.+
6 Depois neʼe, sira kontinua bá Gilead+ no bá rai Tatim-Hodsi no bá tan Dan-Jaan no fila hodi bá Sidon.+
7 Tuirmai sira bá sidade Tiro+ neʼebé metin no bá iha ema Heveu+ no ema Kanaan nia sidade sira hotu, no ikusmai sira toʼo Beer-Seba+ neʼebé iha área Negeb+ iha rai-Judá.
8 Ho ida-neʼe, sira laʼo haleʼu rai-Izraél tomak durante fulan sia no loron 20, depois neʼe, sira toʼo fali iha Jeruzalein.
9 Joab fó sai ba liurai númeru ba povu neʼebé rejistu ona. Izraél nia funu-naʼin sira neʼebé kaer surik hamutuk naʼin-800.000, no mane Judá hamutuk naʼin-500.000.+
10 Maibé David nia laran* fó-sala ba nia+ bainhira nia sura tiha povu neʼe. Tuirmai David dehan ba Jeová: “Haʼu halo ona sala+ boot hodi rejistu povu neʼe. Agora Jeová, favór ida fó perdua ba Ita-nia atan nia sala,+ tanba haʼu halo ona hahalok neʼebé beik tebes.”+
11 Bainhira David hadeer iha dadeer-saan, Jeová koʼalia ho Gad,+ profeta neʼebé fó sai vizaun husi Maromak ba David, hodi dehan:
12 “Bá hatete ba David: ‘Jeová dehan nuneʼe: “Haʼu fó sai kastigu tolu ba ó. Hili kastigu ida-neʼebé mak haʼu sei halo ba ó.”’”+
13 Entaun Gad bá hasoru David no hatete: “Ó tenke hili kastigu ida husi kastigu tolu tuirmai neʼe: Ba tinan hitu rai-hamlaha kona ó-nia rai?+ Ka ba fulan tolu ó halai subar husi ó-nia inimigu neʼebé duni tuir ó?+ Ka ba loron tolu mosu moras-peste* iha ó-nia rai?+ Agora hanoin didiʼak no fó-hatene haʼu saida mak haʼu sei hatán fali ba Ida neʼebé haruka haʼu mai.”
14 Entaun David hatete ba Gad: “Neʼe halo haʼu neon-susar tebes. Favór ida, husik ita monu ba Jeová nia liman+ tanba ninia laran-sadiʼa mak boot tebes.+ Maibé keta husik haʼu monu ba ema nia liman.”+
15 Tuirmai Jeová lori moras-peste+ ida ba ema Izraél husi dadeer toʼo tempu neʼebé deside ona, ho ida-neʼe povu naʼin-70.000 mate+ husi Dan toʼo Beer-Seba.+
16 Bainhira anju neʼe lolo ninia liman ba Jeruzalein atu halakon sidade neʼe, Jeová sente triste kona-ba susar neʼe,+ no nia hatete kedas ba anju neʼebé lori susar iha povu nia leet: “Toʼo ona! Agora hatún ó-nia liman.” Iha tempu neʼebá Jeová nia anju besik Arauna+ ema Jebus+ nia fatin sama trigu nian.
17 Bainhira David haree anju neʼebé oho povu neʼe, David dehan ba Jeová: “Haʼu mak halo sala, no haʼu mak halo buat aat. Maibé kona-ba bibi sira-neʼe,+ sala saida mak sira halo ona? Favór ida, foti Ita-nia liman hasoru haʼu no haʼu-nia aman nia umakain.”+
18 Entaun Gad bá hasoru David iha loron neʼebá no dehan ba nia: “Saʼe bá, harii altár ida ba Jeová iha Arauna ema Jebus+ nia fatin sama trigu nian.”
19 Nuneʼe David bá halo tuir Gad nia liafuan, neʼebé tuir Jeová nia mandamentu.
20 Bainhira Arauna hateke tun no haree liurai no ninia atan sira mai daudaun, Arauna sai kedas no hakneʼak hodi hakruʼuk ho oin ba rai iha liurai nia oin.
21 Arauna husu: “Tanbasá mak haʼu-nia naʼi liurai mai hasoru Ita-nia atan?” David hatán: “Haʼu mai atu sosa ó-nia fatin sama trigu nian atu haʼu bele harii altár ida ba Jeová, hodi nuneʼe moras-peste neʼebé kona povu neʼe bele para tiha.”+
22 Maibé Arauna hatete ba David: “Haʼu-nia naʼi liurai, foti deʼit fatin neʼe no hasaʼe buat neʼebé Ita-Boot hanoin mak diʼak. Ita bele foti karau sira-neʼe hodi hasaʼe nuʼudar sakrifísiu sunu nian, no Ita bele foti ai-kabelak neʼebé uza atu sama trigu no mós ai seluk neʼebé baibain tau iha karau sira-neʼe, atu uza nuʼudar ai sunu nian.
23 Oh liurai, buat hotu neʼe Arauna fó ba liurai.” Tuirmai Arauna mós dehan ba liurai: “Haʼu hein katak Jeová, Ita-nia Maromak, sei haraik bensaun ba Ita-Boot.”
24 Maibé liurai hatete ba Arauna: “Lae, haʼu tenke sosa neʼe tuir folin neʼebé loos. Haʼu labele hasaʼe sakrifísiu sunu nian ba Jeová, haʼu-nia Maromak, hodi la selu buat ida.” Entaun David sosa fatin sama trigu nian neʼe no mós karau sira-neʼe ho osan-mutin 50.*+
25 David harii altár ida+ iha fatin neʼe ba Jeová no hasaʼe sakrifísiu sunu nian no sakrifísiu dame nian. Tuirmai Jeová rona sira-nia halerik kona-ba rai neʼe,+ no hapara moras-peste neʼebé kona ema Izraél.
