Apóstolu 12:1-25
12 Iha tempu neʼebá Liurai Herodes hahú fó-terus ba sira balu husi kongregasaun.+
2 Nia oho João+ nia maun* Tiago ho surik.+
3 Kuandu nia haree katak ema Judeu sira kontente ho ida-neʼe, nia mós kaer Pedro. Nia halo nuneʼe durante Festa Paun Fermentu-Laek nian.*+
4 Nia kaer Pedro no hatama ba komarka.+ Nia tau guarda grupu haat hodi troka malu atu hein nia. Grupu ida-idak iha tropa naʼin-haat. Nia hakarak atu hatudu sai Pedro* iha povu nia oin depois Páskua.*
5 Kuandu Pedro iha hela komarka, kongregasaun halo orasaun ho laran-manas ba Maromak kona-ba nia.+
6 Iha kalan antes Herodes atu hatudu sai Pedro ba povu, Pedro toba hela iha komarka no ema kesi nia ho korrente entre tropa naʼin-rua, no iha mós guarda sira neʼebé hein iha odamatan oin.
7 Maibé, Jeová* nia anju hamriik besik,+ no naroman nabilan iha komarka laran. Anju neʼe book Pedro no fanu nia, hodi dehan: “Hadeer lalais!” No korrente monu sai husi Pedro nia liman.+
8 Anju neʼe dehan ba nia: “Prepara ó-nia an* no tau ó-nia sandálias.” Nia halo nuneʼe duni. Ikusmai, anju neʼe dehan tan ba nia: “Tau ó-nia roupa no laʼo tuir haʼu.”
9 Nia sai no kontinua laʼo tuir anju neʼe, maibé nia la hatene katak buat neʼebé akontese daudaun liuhusi anju neʼe mak realidade duni. Nia hanoin katak buat neʼebé nia haree mak vizaun deʼit.
10 Depois laʼo liu tiha guarda primeiru no segundu, sira toʼo portaun besi neʼebé atu sai husi komarka hodi tama ba sidade, no portaun neʼe nakloke mesak ba sira. Kuandu sira sai tiha, sira laʼo hamutuk iha dalan, no derrepente deʼit anju neʼe husik hela nia.
11 Bainhira Pedro foin komprende kona-ba neʼe, nia dehan: “Agora haʼu hatene ho didiʼak katak Jeová* haruka ninia anju atu salva haʼu husi Herodes nia liman no husi buat hotu neʼebé ema Judeu sira hakarak atu halo ba haʼu.”+
12 Bainhira Pedro komprende ona ida-neʼe, nia laʼo ba Maria nia uma. Maria mak João, neʼebé ema bolu Marcos,+ nia inan. Iha uma neʼe iha dixípulu balu neʼebé halibur hamutuk no halo hela orasaun.
13 Kuandu nia dere portaun, atan-feto ida naran Rode sai atu haree sé mak iha portaun.
14 Bainhira nia rona Pedro nia lian, nia haksolok tebetebes toʼo haluha loke portaun, no nia halai tama ba laran hodi fó-hatene katak Pedro mak hamriik iha portaun.
15 Sira dehan ba nia: “Ó bulak ona.” Maibé nia dehan nafatin katak Pedro mai duni. Sira hatete: “Neʼe mak ninia anju.”
16 Maibé Pedro kontinua dere no kuandu sira loke portaun, sira haree nia no hakfodak.
17 Maibé nia halo sinál ba sira ho nia liman atu nonook no nia konta ba sira oinsá Jeová* hasai nia husi komarka, no nia dehan: “Fó-hatene buat sira-neʼe ba Tiago+ no maun-alin sira seluk.” Depois neʼe, nia sai no laʼo fali ba fatin seluk.
18 Kuandu rai loron ona, tropa sira hanoin barak kona-ba Pedro bá tiha neʼebé.
19 Herodes haruka atu buka nia ho didiʼak, no kuandu la hetan nia, Herodes husu guarda sira kona-ba neʼe, no haruka ema atu lori guarda sira-neʼe bá hodi hetan kastigu.+ Herodes tun husi Judeia hodi bá Sezareia no hela iha neʼebá ba loron balu.
20 Herodes hirus tebes ho ema Tiro no Sidon. Entaun, ema sira-neʼe hotu ho hanoin ida deʼit mai hasoru Herodes. Ulukliu sira halo Blasto apoia sira, nia mak mane neʼebé tau matan ba liurai nia umakain.* Tuirmai sira hahú buka dame ho liurai, tanba sira-nia nasaun hetan ai-han husi rai neʼebé liurai ukun.
21 Maibé iha loron-boot ida, Herodes hatais roupa liurai nian no tuur iha kadeira tesi-lia nian no hahú koʼalia ba sira hotu.
22 Tuirmai ema sira neʼebé halibur hamutuk hahú hakilar dehan: “Neʼe maromak ida nia lian, laʼós ema nian!”
23 Iha momentu neʼe kedas, Jeová* nia anju fó moras ba nia, tanba nia la fó glória ba Maromak, no ular-oan han nia no nia mate.
24 Maibé Jeová* nia liafuan kontinua habelar no ema barak liután sai fiar-naʼin.+
25 Kona-ba Barnabé+ no Saul, bainhira sira halaʼo hotu ona sira-nia knaar hodi fó ajuda iha Jeruzalein,+ sira fila fali no sira lori mós João,+ neʼebé mós ema bolu Marcos.
Nota-rodapé
^ Lian Gregu la esplika sé mak maun ka alin.
^ Ka “Nia hakarak lori sai Pedro atu hetan tesi-lia”.
^ Ka “Kesi ó-nia knotak”.
^ Orj., “liurai nia kuartu”.
