Apóstolu 17:1-34
17 Sira laʼo liuhusi Anfípolis no Apolónia no toʼo iha Tesalónika.+ Iha neʼebá iha ema Judeu sira-nia sinagoga ida.
2 Entaun, tuir Paulo nia toman,+ nia tama ba sinagoga iha loron Sábadu tolu tuituir malu hodi hanorin sira kona-ba Eskritura.+
3 Nia esplika no uza eskritura sira atu hatudu katak Kristu presiza hetan terus+ no moris-hiʼas husi mate,+ no nia dehan: “Kristu neʼe mak Jesus neʼebé haʼu haklaken daudaun ba imi.”
4 Ho ida-neʼe, sira balu sai fiar-naʼin no halibur hamutuk ho Paulo no Silas.+ No ema Gregu barak neʼebé hamtaʼuk Maromak no feto balu neʼebé naran-boot, sira mós sai fiar-naʼin.
5 Maibé, ema Judeu sira sai laran-moras,+ no sira halibur hamutuk ema aat balu neʼebé badiu deʼit iha merkadu no sira sai grupu boot ida no hahú halo sidade sai runguranga. Sira ataka Jason nia uma no buka atu lori sai Paulo no Silas ba ema grupu boot neʼe.
6 Kuandu sira la hetan Paulo no Silas, sira lori Jason no maun-alin balu ba ukun-naʼin sidade nian, no hakilar dehan: “Mane sira neʼebé hamosu problema iha mundu tomak mai ona iha neʼe,+
7 no Jason simu ona ema sira-neʼe nuʼudar bainaka. Mane sira-neʼe hotu kontra César* nia ukun-fuan, tanba sira dehan katak iha liurai seluk, katak Jesus.”+
8 Kuandu ema-lubun no mós ukun-naʼin sidade nian rona ida-neʼe, sira-nia laran la hakmatek.
9 Maibé bainhira ukun-naʼin sira-neʼe haruka Jason no sira seluk selu tiha osan seguransa nian, ukun-naʼin sira-neʼe husik sira bá.
10 Kuandu rai kalan ona, maun-alin sira haruka kedas Paulo no Silas atu bá Bereia. Bainhira sira toʼo iha neʼebá, sira tama ba ema Judeu nia sinagoga.
11 Ema Judeu sira iha Bereia matenek liu fali ema sira iha Tesalónika, tanba ema Bereia sira hakarak tebes atu aprende Maromak nia liafuan, sira simu Maromak nia liafuan ho laran-manas, no loroloron sira buka-hatene didiʼak Eskritura atu haree se buat sira-neʼe loos ka lae.
12 Tan neʼe, sira barak sai fiar-naʼin. Feto no mane Gregu balu neʼebé naran-boot mós sai fiar-naʼin.
13 Maibé kuandu ema Judeu sira iha Tesalónika rona katak Paulo haklaken mós Maromak nia liafuan iha Bereia, ema Judeu mai hodi book no soran ema-lubun atu kontra sira.+
14 Tuirmai, maun-alin sira haruka kedas Paulo atu tun ba tasi-ibun,+ maibé Silas no Timóteo hela nafatin.
15 Maibé sira balu laʼo hamutuk ho Paulo no lori nia toʼo Atenas. Tuirmai, sira fila no lori lia-menon ba Silas no Timóteo+ atu bá lalais hasoru Paulo.
16 Bainhira Paulo hein hela sira iha Atenas, nia sente la kontente iha laran* tanba nia haree katak sidade neʼe nakonu ho estátua.*
17 Tan neʼe nia tama iha sinagoga no hahú hanorin* ema Judeu sira no ema seluk neʼebé adora Maromak. Loroloron nia mós hanorin ema sira neʼebé nia hasoru iha merkadu.
18 Maibé ema balu neʼebé fiar filozofia Epikureu no Estoiku nian, sira hahú diskute malu ho nia, no sira balu dehan: “Saida mak manu-loriku neʼe hakarak fó sai ba ita?” Sira seluk dehan: “Nia haklaken kona-ba maromak rai seluk nian.” Sira dehan nuneʼe tanba Paulo fó sai liafuan diʼak kona-ba Jesus no moris-hiʼas.+
19 Entaun, sira kaer nia no lori nia ba Areópago no dehan: “Ó bele fó-hatene ami kona-ba hanorin foun neʼebé ó fó sai daudaun ka lae?
20 Tanba ó koʼalia kona-ba buat neʼebé foun ba ami, no ami hakarak hatene buat sira-neʼe katak sá.”
21 Tuir loloos, ema Atenas hotu no mós ema estranjeiru neʼebé hela* iha neʼebá, iha toman atu uza deʼit sira-nia tempu deskansa hodi konta ka rona ba buat ruma neʼebé foun.
22 Paulo hamriik iha Areópago nia klaran+ no dehan:
“Ema Atenas sira, haʼu haree katak iha buat hotu imi hamtaʼuk maromak sira* liu fali ema seluk.+
23 Porezemplu, kuandu haʼu laʼo haleʼu sidade, haʼu haree didiʼak buat sira neʼebé imi adora, no haʼu mós haree altár ida neʼebé hakerek dehan: ‘Ba Maromak neʼebé ami la hatene.’ Tan neʼe, buat neʼebé imi adora maski la hatene, kona-ba neʼe mak agora haʼu atu haklaken ba imi.
24 Maromak neʼebé kria mundu no buat hotu neʼebé iha mundu, Maromak neʼe la hela iha templu+ neʼebé ema nia liman mak halo tanba nia mak Naʼi ba lalehan no rai.+
25 Nia la presiza ema nia liman atu ajuda nia tanba nia la falta buat ida,+ tanba nia rasik mak fó iis, fó moris+ no buat hotu ba ema.
26 Husi ema ida deʼit+ mak nia halo nasaun hotu atu hela iha mundu tomak,+ no nia halo desizaun kona-ba tempu sira no kona-ba fatin neʼebé ema sei hela bá,+
27 atu nuneʼe ema bele buka Maromak. Se karik ema hakaʼas an atu buka nia,+ sira sei hetan duni nia, maski tuir loloos nia la dook husi ita ida-idak.
28 Tanba liuhusi nia mak ita hetan moris, book an no iha, hanesan hakerek-naʼin balu iha imi-nia leet mós dehan ona: ‘Ita hotu mak ninia oan sira.’
29 “Entaun tanba ita mak Maromak nia oan sira,+ ita keta hanoin katak Maromak neʼe mak hanesan osan-mean, osan-mutin ka fatuk, neʼebé ema nia liman mak halo hodi tuir sira-nia hanoin.+
30 Uluk Maromak husik deʼit hahalok sira hanesan neʼe,+ maibé agora nia fó sai ba ema iha fatin hotu katak sira tenke arrepende sira-nia sala.
31 Tanba nia hili tiha ona loron ida neʼebé nia hakarak atu tesi-lia+ ho loloos ba ema hotu iha mundu tomak. Nia sei tesi-lia liuhusi mane ida neʼebé nia hili tiha ona, no nia fó ona garantia ba ema hotu kona-ba ida-neʼe hodi fó moris-hiʼas ba mane neʼe.”+
32 Kuandu povu rona kona-ba moris-hiʼas husi mate, sira balu hahú goza nia,+ maibé balu seluk dehan: “Tempu seluk ami hakarak rona tan husi ó kona-ba neʼe.”
33 Entaun, Paulo sai husi sira-nia leet,
34 maibé ema balu tuir nia no sai fiar-naʼin. Ema sira-neʼe balu mak Dionísio neʼebé nuʼudar juís ida iha Areópago, no feto ida naran Damaris, no mós ema seluk tan.
Nota-rodapé
^ Haree “Pneuma” iha Glosáriu.
^ Ka “halo diskusaun ho; troka hanoin ho”.
^ Ka “vizita”.
^ Ka “imi relijiozu”.
