Apóstolu 22:1-30
22 “Maun-alin no aman sira, rona haʼu bá, agora haʼu sei esplika ba imi hodi defende haʼu-nia an.”+
2 Kuandu sira rona nia koʼalia ba sira ho lian Ebraiku, sira hotu sai hakmatek liután no nia dehan:
3 “Haʼu ema Judeu,+ haʼu moris iha Tarsu iha Silísia,+ maibé haʼu simu hanorin iha sidade neʼe, no Gamaliel+ rasik mak hanorin haʼu. Haʼu simu hanorin atu halo tuir ho loloos ita-nia beiʼala sira-nia Ukun-Fuan,+ no haʼu hatudu laran-manas ba Maromak hanesan imi hotu mós hatudu agora.+
4 Haʼu kesi mane no feto neʼebé tuir Naʼi nia Dalan* no hatama sira ba komarka, no haʼu haterus sira toʼo mate.+
5 Amlulik boot no povu nia katuas hotu bele sai sasin kona-ba neʼe. Haʼu mós simu karta husi sira hodi lori ba maun-alin sira iha Damasku, no haʼu laʼo ba fatin neʼebá hodi kesi sira no lori mai iha Jeruzalein atu hetan kastigu.
6 “Maibé, maizumenus iha meiudia, kuandu haʼu laʼo daudaun no besik ona ba Damasku, derrepente deʼit naroman ida sai husi lalehan no nabilan haleʼu haʼu,+
7 no haʼu monu ba rai no rona lian ida dehan mai haʼu: ‘Saul, Saul, tanbasá mak ó fó-terus ba haʼu?’
8 Haʼu hatán: ‘Sé mak Ita, Naʼi?’ Nia dehan ba haʼu: ‘Haʼu mak Jesus ema Nazaré, neʼebé ó fó-terus daudaun.’
9 Ema sira neʼebé hamutuk ho haʼu bele haree naroman neʼe, maibé sira labele rona lian neʼebé koʼalia ba haʼu.
10 Ho ida-neʼe, haʼu dehan: ‘Saida mak haʼu tenke halo, Naʼi?’ Naʼi dehan ba haʼu: ‘Hamriik, tama ba Damasku, no iha neʼebá haʼu sei fó-hatene ó kona-ba buat hotu neʼebé ó tenke halo.’+
11 Maibé tanba naroman neʼe nabilan tebes, haʼu labele ona haree buat ida, entaun sira neʼebé hamutuk ho haʼu kaer haʼu-nia liman hodi lori haʼu ba Damasku.
12 “Iha neʼebá, iha mane ida naran Ananias. Nia mak ema neʼebé hamtaʼuk Maromak no halo tuir Ukun-Fuan, no ema Judeu hotu neʼebé hela iha fatin neʼebá koʼalia diʼak kona-ba nia.
13 Nia mai hasoru haʼu, no hamriik besik haʼu, hodi dehan: ‘Saul haʼu-nia maun, haree fali bá!’ No iha momentu neʼe kedas haʼu bele haree fali no hateke ba nia.+
14 Nia dehan: ‘Ita-nia beiʼala sira-nia Maromak hili ona ó atu hatene ninia hakarak, no atu haree ida neʼebé laran-loos,+ no atu rona ninia lian,
15 tanba nia hili ona ó atu fó sasin ba ema hotu kona-ba buat sira neʼebé ó haree no rona ona husi nia.+
16 Agora, tanbasá mak ó demora? Hamriik hodi hetan batizmu no hamoos ó-nia sala+ hodi bolu ninia naran.’+
17 “Maibé kuandu haʼu fila fali ba Jeruzalein+ no halo hela orasaun iha templu, haʼu hetan vizaun ida,
18 no haʼu haree Jesus dehan ba haʼu: ‘Lalais, sai kedas husi Jeruzalein, tanba sira sei la simu ó-nia sasin kona-ba haʼu.’+
19 No haʼu dehan: ‘Naʼi, sira rasik hatene ho didiʼak katak uluk haʼu sempre laʼo husi sinagoga ida ba sinagoga seluk hodi hatama ema sira neʼebé fiar Ita ba komarka no baku sira.+
20 No kuandu ema oho Ita-Boot nia sasin Estevão, haʼu rasik mós apoia, no haʼu hamriik besik hodi tau matan ba roupa husi ema sira neʼebé oho nia.’+
21 Maibé nia dehan ba haʼu: ‘Hamriik no laʼo bá, tanba haʼu sei haruka ó ba nasaun sira neʼebé dook.’”+
22 Sira kontinua rona nia toʼo liafuan ida-neʼe. Tuirmai sira hakilar dehan: “Halakon tiha mane neʼe husi rai, tanba nia la merese atu moris!”
23 Sira hakilar no soe sira-nia roupa no soe rai-rahun ba leten,+
24 tan neʼe komandante tropa nian haruka tropa atu lori Paulo ba fatin tropa nian no haruka sira atu baku nia ho xikote hodi buka-hatene loloos tanbasá mak ema-lubun hakilar kontra Paulo.
25 Maibé kuandu sira kesi tiha nia atu baku nia ho xikote, Paulo dehan ba xefe tropa nian neʼebé hamriik besik: “Tuir lei, imi bele baku ema Roma* maski la iha sala* ka lae?”+
26 Kuandu xefe tropa nian rona ida-neʼe, nia bá fó-hatene komandante dehan: “Saida mak Ita hakarak halo ba nia? Tanba mane neʼe mak ema Roma.”
27 Entaun, komandante neʼe hakbesik ba Paulo no dehan: “Fó-hatene mai haʼu, ó ema Roma ka?” Nia hatán: “Loos.”
28 Komandante tropa nian hatete: “Haʼu selu osan barak atu hetan direitu hodi sai sidadaun Roma.” Paulo hatán: “Haʼu moris mai nuʼudar sidadaun Roma.”+
29 Tan neʼe, mane sira neʼebé atu baku Paulo hasees an kedas husi nia. No kuandu komandante neʼe rona katak Paulo mak ema Roma ida, nia sai taʼuk tanba nia mak haruka ema kesi Paulo ho korrente.+
30 Entaun, loron tuirmai, tanba nia hakarak hatene ho loloos tanbasá mak ema Judeu sira duun Paulo, nia kore Paulo no haruka ulun-naʼin amlulik sira no Sinédriu tomak atu halibur hamutuk. Tuirmai, nia lori Paulo no haruka nia hamriik iha sira-nia klaran.+
Nota-rodapé
^ Haree “Naʼi nia Dalan” iha Glosáriu.
^ Ka “sidadaun Roma”.
^ Ka “maski seidauk hetan tesi-lia”.
