Apóstolu 23:1-35
23 Paulo hateke didiʼak ba Sinédriu no dehan: “Maun-alin sira, toʼo agora haʼu sempre moris ho konxiénsia neʼebé moos+ iha Maromak nia oin.”
2 Ho ida-neʼe, amlulik boot Ananias haruka sira neʼebé hamriik besik nia atu baku Paulo nia ibun.
3 Tuirmai Paulo dehan ba nia: “Maromak mós sei baku ó, ó ema laran-makerek.* Ó tuur atu tesi-lia ba haʼu tuir Ukun-Fuan ka? Maibé ó rasik kontra Ukun-Fuan hodi haruka ema baku haʼu.”
4 Sira neʼebé hamriik besik dehan: “Ó koʼalia aat hasoru Maromak nia amlulik boot ka?”
5 Paulo dehan: “Maun-alin sira, haʼu la hatene katak nia mak amlulik boot. Tanba hakerek nanis ona: ‘Imi labele koʼalia aat hasoru ukun-naʼin ida iha imi-nia povu nia leet.’”+
6 Kuandu Paulo hatene katak membru Sinédriu balu mak ema Saduseu no balu seluk mak ema Farizeu, nia hahú koʼalia ho lian makaʼas iha Sinédriu, hodi dehan: “Maun-alin sira, haʼu ema Farizeu ida,+ no ema Farizeu nia oan. Ohin haʼu hetan tesi-lia tanba haʼu fiar katak ema mate sira sei moris hiʼas.”
7 Tanba nia dehan ida-neʼe, ema Farizeu no Saduseu sira haksesuk malu, no ema-lubun neʼe fahe malu.
8 Tanba ema Saduseu dehan katak la iha moris-hiʼas, anju, ka kriatura espíritu, maibé ema Farizeu sira fiar* buat sira-neʼe.+
9 Entaun, ema barak hahú hakilar ho lian makaʼas, no eskriba balu husi grupu Farizeu hamriik no koʼalia ho hirus dehan: “Ami la hetan sala ida iha ema neʼe; karik tanba kriatura espíritu ida ka anju ida mak koʼalia ba nia.”+
10 Kuandu sira haksesuk malu makaʼas liután, komandante tropa nian sai taʼuk katak sira sei oho Paulo, tan neʼe nia haruka tropa sira hodi tun no foti Paulo husi sira-nia leet no lori nia ba fatin tropa nian.
11 Maibé iha kalan neʼe, Naʼi hamriik iha Paulo nia sorin no dehan: “Aten-brani bá!+ Tanba hanesan ó fó sasin ho didiʼak kona-ba haʼu iha Jeruzalein, ó mós tenke fó sasin kona-ba haʼu iha Roma.”+
12 Kuandu rai naroman ona, ema Judeu sira halo planu no jura katak sira sei hetan malisan se sira han ka hemu buat ruma bainhira sira seidauk oho Paulo.
13 Iha mane naʼin-40 liu mak jura atu halo ida-neʼe.
14 Mane sira-neʼe bá hasoru ulun-naʼin amlulik sira no katuas sira hodi dehan: “Ami jura ona katak ami tenke hetan malisan se ami han buat ruma bainhira ami seidauk oho Paulo.
15 Entaun agora imi hamutuk ho Sinédriu tenke fó sai ba komandante tropa nian katak nia tenke lori Paulo tun mai imi, hodi halo finje katak imi hakarak buka-hatene didiʼak kona-ba nia. Maibé antes nia besik, ami sei prontu atu oho nia.”
16 Maibé, Paulo nia feton nia oan-mane rona kona-ba sira-nia planu atu oho Paulo, entaun nia bá hodi tama fatin tropa nian no fó-hatene ba Paulo.
17 Tuirmai Paulo bolu xefe tropa nian ida no dehan: “Lori mane joven neʼe bá hasoru komandante tanba nia iha buat ruma atu fó-hatene ba komandante.”
18 Tan neʼe, xefe neʼe lori nia ba komandante tropa nian no dehan: “Paulo neʼebé iha dadur laran bolu haʼu no nia husu atu lori mane joven neʼe ba Ita tanba nia iha buat ruma atu fó-hatene Ita.”
19 Komandante tropa nian kaer nia liman no lori nia ketak hodi husu mesamesak ba nia dehan: “Saida mak ó hakarak fó-hatene mai haʼu?”
20 Nia dehan: “Ema Judeu sira koʼalia hamutuk ona atu husu Ita-Boot hodi lori tun Paulo ba Sinédriu aban hodi finje katak sira hakarak atu buka-hatene didiʼak buat ruma kona-ba ninia kazu.+
21 Maibé, keta fiar sira, tanba iha mane naʼin-40 liu hein hela nia iha dalan hodi ataka nia, no sira jura ba sira-nia an katak sira sei hetan malisan se sira han ka hemu buat ruma bainhira sira seidauk oho Paulo.+ Agora sira prontu ona hodi hein deʼit Ita-Boot nia desizaun.”
22 Entaun, komandante tropa nian husik mane joven neʼe bá, hodi dehan: “Keta fó-hatene ema ida katak ó fó sai ona buat neʼe mai haʼu.”
23 Nia bolu xefe tropa nian naʼin-rua no dehan: “Prepara tropa naʼin-200 atu laʼo ba Sezareia iha tuku 9* kalan, no prepara mós tropa naʼin-70 neʼebé saʼe kuda no tropa naʼin-200 neʼebé lori diman.
24 No mós prepara kuda ba Paulo atu saʼe hodi nuneʼe nia bele toʼo ba governadór Félix ho seguru.”
25 Nia hakerek karta tuirmai neʼe:
26 “Haʼu Cláudio Lísias, mak hakerek karta neʼe ba Ita-Boot, Governadór Félix, neʼebé kmanek liu: Haʼu hatoʼo kumprimentus ba Ita!
27 Ema Judeu sira kaer mane neʼe no besik atu oho nia, maibé haʼu toʼo lalais hamutuk ho tropa sira no salva nia,+ tanba haʼu rona katak nia ema Roma ida.+
28 No haʼu hakarak hatene loloos tanbasá mak sira duun nia, entaun haʼu lori tun nia ba sira-nia Sinédriu.+
29 No haʼu haree katak sira duun nia kona-ba sira-nia Ukun-Fuan,+ maibé la iha razaun ida neʼebé halo nia merese atu hetan kastigu-mate ka tama komarka.
30 Maibé tanba ema fó-hatene ona ba haʼu kona-ba sira-nia planu atu oho nia,+ haʼu haruka nia lalais ba Ita no haʼu fó-hatene ona ba sira neʼebé duun nia atu lori kazu neʼe ba Ita.”
31 Entaun, tropa sira-neʼe halo tuir komandante nia liafuan no lori Paulo+ iha kalan hodi bá Antipátride.
32 Loron tuirmai, tropa sira neʼebé saʼe kuda deʼit mak bá hamutuk ho Paulo, maibé tropa sira seluk fila fali ba sira-nia fatin.
33 Tropa sira neʼebé saʼe kuda toʼo iha Sezareia no fó karta ba governadór no mós entrega Paulo ba nia.
34 Bainhira governadór lee tiha karta neʼe, nia husu Paulo mai husi neʼebé, no tuirmai nia hatene katak Paulo mai husi Silísia.+
35 Nia dehan: “Haʼu sei rona didiʼak ba ó-nia kazu kuandu sira neʼebé duun ó toʼo mai.”+ No nia haruka guarda sira atu tau matan ba Paulo iha Herodes nia palásiu.*
Nota-rodapé
^ Orj., “ó didin neʼebé pinta mutin”.
^ Ka “haklaken iha ema nia oin kona-ba”.
^ Orj., “oras 3”. Neʼe katak sura oras 3 husi loro-matan monu.
^ Ka “pretória”.
