Deuteronómio 1:1-46
1 Tuirmai neʼe mak liafuan neʼebé Moisés koʼalia ba ema Izraél hotu iha área Mota Jordaun nian iha rai-fuik, katak iha rai-tetuk maran iha Suf nia oin, entre Paran, Tofel, Labão, Hazerot no Dizahab.
2 Husi Horeb bá Kades-Barnea,+ presiza laʼo loron 11 liuhusi dalan Foho Seir nian.
3 Iha loron primeiru fulan-11 tinan 40,*+ Moisés koʼalia ba ema Izraél hodi tuir buat hotu neʼebé Jeová haruka nia atu hatete ba sira.
4 Moisés hatoʼo liafuan sira-neʼe bainhira nia manán tiha ema Amoreu nia liurai Sihon,+ neʼebé uluk hela iha Hesbon, no Liurai Og+ husi Basan neʼebé uluk hela iha Astarot iha Edrei.+
5 Iha área Mota Jordaun iha rai-Moab, Moisés hahú esplika Ukun-Fuan neʼe,+ hodi dehan:
6 “Jeová, ita-nia Maromak, dehan ona ba ita iha Horeb: ‘Imi hela kleur ona iha área foho nian neʼe.+
7 Entaun hamriik bá, sai hodi bá área foho ema Amoreu nian,+ no bá área hotu neʼebé besik neʼebá, hanesan: área Araba,+ área foho nian, área Sefela, área Negeb, área tasi nian,+ ema Kanaan nia rai, no Líbanu,*+ toʼo mota boot, katak Mota Eufrates.+
8 Haree bá, haʼu fó ona rai neʼe ba imi. Tama bá no foti rai neʼe nuʼudar imi-nian, katak rai neʼebé Jeová jura ona ba imi-nia aman sira, Abraão, Isaac+ no Jacob,+ atu fó ba sira no ba sira-nia bei-oan.’+
9 “Iha tempu neʼebá haʼu dehan ba imi: ‘Haʼu mesak la iha kbiit atu lori imi.+
10 Jeová, imi-nia Maromak, halo imi sai barak loos, no ohin loron imi sai barak ona hanesan fitun iha lalehan.+
11 Haʼu harohan katak Jeová, imi-nia beiʼala nia Maromak, sei halo imi sai barak+ dala rihun ida liu fali agora, no nia sei haraik bensaun ba imi hanesan nia promete ona ba imi.+
12 Oinsá mak haʼu mesak bele lori imi nuʼudar naha todan no lori imi-nia problema sira no tahan imi-nia liafuan muramura sira?+
13 Hili mane sira neʼebé matenek no iha esperiénsia husi imi-nia suku sira, no haʼu sei fó knaar ba sira nuʼudar ulun-naʼin ba imi.’+
14 Nuneʼe imi hatán mai haʼu dehan: ‘Buat neʼebé Ita hatete ba ami atu halo mak diʼak.’
15 Entaun haʼu lori ulun-naʼin sira husi imi-nia suku, katak mane sira neʼebé matenek no iha esperiénsia, no foti sira nuʼudar ulun-naʼin ba imi: xefe ba ema naʼin-1.000, xefe ba ema naʼin-100, xefe ba ema naʼin-50, xefe ba ema naʼin-10, no xefe seluk iha imi-nia suku sira.+
16 “Iha tempu neʼebá haʼu fó mandamentu ba imi-nia juís sira, hodi dehan: ‘Kuandu imi rona kazu ruma entre imi-nia maun-alin sira, imi tenke tesi-lia ho loloos+ entre mane ida ho ninia maun-alin, ka ho ema estranjeiru neʼebé hela iha imi-nia leet.+
17 Imi labele todan ba sorin kuandu imi tesi-lia.+ Imi tenke rona ba ema kiʼik hanesan imi rona ba ema-boot.+ Imi labele sai taʼuk ba ema,+ tanba imi tesi-lia hodi reprezenta Maromak;*+ no se kazu ruma mak susar tebes ba imi, imi tenke lori kazu neʼe mai haʼu, no haʼu mak sei rona kazu neʼe.’+
18 Iha tempu neʼebá haʼu hanorin imi kona-ba buat hotu neʼebé imi tenke halo.
19 “Tuirmai ita sai husi Horeb no laʼo liuhusi rai-fuik neʼebé luan no hamosu taʼuk,+ rai-fuik neʼebé imi haree ona bainhira imi laʼo iha dalan ba área foho ema Amoreu nian,+ hodi halo tuir buat neʼebé Jeová, ita-nia Maromak, haruka ita atu halo, no ikusmai ita toʼo iha Kades-Barnea.+
20 Depois neʼe, haʼu hatete ba imi: ‘Imi toʼo ona iha área foho ema Amoreu nian, neʼebé Jeová, ita-nia Maromak, entrega ona mai ita.
21 Haree bá! Jeová, imi-nia Maromak, fó ona rai neʼe ba imi. Saʼe bá, foti rai neʼe, hodi halo tuir buat neʼebé Jeová, imi-nia beiʼala nia Maromak, hatete ona ba imi.+ Keta taʼuk ka nakdedar.’
22 “Maibé, imi hotu hakbesik mai haʼu no dehan: ‘Mai ita haruka uluk mane balu atu buka-hatene rai neʼe no lori fali lia-menon ba ita kona-ba dalan neʼebé ita tenke laʼo liu no kona-ba sidade hanesan saida mak ita sei hasoru.’+
23 Haʼu hanoin buat neʼebé imi hatete mak diʼak, entaun haʼu hili mane naʼin-12, mane ida husi suku ida-idak.+
24 Depois neʼe, sira saʼe ba área foho nian+ no toʼo iha Mota* Eskol hodi hafuhu rai neʼe.
25 Sira foti ai-fuan balu husi rai neʼebá no lori mai ita; sira mós lori lia-menon mai ita, hodi dehan: ‘Rai neʼebé Jeová, ita-nia Maromak, fó ba ita mak diʼak.’+
26 Maibé imi lakohi saʼe ba fatin neʼe, no imi kontra orden husi Jeová, imi-nia Maromak.+
27 Imi kontinua muramura iha imi-nia tenda laran, hodi dehan: ‘Tanba Jeová odi ita mak nia lori ita sai husi rai-Ejitu hodi entrega ita ba ema Amoreu nia liman atu halakon ita.
28 Oinsá mak ita bele tama ba rai neʼe? Ita-nia maun-alin sira halo ona ita-nia laran sai taʼuk,*+ hodi dehan: “Sira mak povu neʼebé forte no ain-aas liu fali ita, no sira-nia sidade sira boot ho moru neʼebé aas toʼo lalehan,+ no ami haree ema Anac+ nia oan-mane sira iha neʼebá.”’
29 “Tan neʼe haʼu dehan ba imi: ‘Keta nakdedar ka sai taʼuk tanba sira.+
30 Jeová, imi-nia Maromak, mak sei laʼo iha imi-nia oin no sei halo funu ba imi,+ hanesan imi haree nia halo ona iha rai-Ejitu.+
31 No iha rai-fuik, imi haree ona oinsá Jeová, imi-nia Maromak, koʼus imi hanesan aman ida koʼus ninia oan-mane, nia halo nuneʼe iha fatin hotu toʼo imi mai iha fatin neʼe.’
32 Maski nuneʼe, imi la tau fiar ba Jeová, imi-nia Maromak,+
33 neʼebé laʼo ulukliu imi iha dalan, atu buka fatin ida ba imi hodi hela. Nia mosu ba imi liuhusi ahi iha kalan no liuhusi kalohan iha loron atu hatudu dalan neʼebé imi tenke laʼo bá.+
34 “Durante neʼe, Jeová rona buat hotu neʼebé imi hatete no nia sai hirus no jura,+ hodi dehan:
35 ‘Ema hotu husi jerasaun aat neʼe sei la haree rai diʼak neʼebé haʼu jura ona atu fó ba imi-nia aman sira,+
36 só deʼit Jefuné nia oan-mane Caleb. Nia sei haree duni rai neʼebé nia sama ona, no haʼu sei fó rai neʼe ba nia no ninia oan-mane sira, tanba nia halo tuir ona Jeová ho laran tomak.+
37 Maibé Jeová sai hirus ho haʼu tanba imi, no nia dehan: “Ó mós sei la tama ba rai neʼe.+
38 Nun nia oan-mane Josué, neʼebé hamriik iha ó-nia oin,+ mak sei tama ba rai neʼe.+ Ó tenke hametin nia,*+ tanba nia sei lori ema Izraél atu foti rai neʼe nuʼudar liman-rohan.”
39 Liután neʼe, imi-nia oan sira neʼebé imi dehan sei sai dadur+ no imi-nia oan-mane sira neʼebé agora la hatene saida mak diʼak ka aat, sira mak sei tama, no haʼu sei fó rai neʼe ba sira nuʼudar sira-nian.+
40 Maibé kona-ba imi, fila fali no laʼo ba rai-fuik liuhusi dalan Tasi Mean nian.’+
41 “Ho ida-neʼe, imi hatete ba haʼu: ‘Ami halo ona sala kontra Jeová. Agora ami sei saʼe bá halo funu, hodi halo tuir Jeová, ami-nia Maromak, nia mandamentu ba ami!’ Depois neʼe, imi ida-idak kesi imi-nia armas funu nian, no imi hanoin katak fasil deʼit ba imi atu saʼe ba foho neʼe.+
42 Maibé Jeová dehan ba haʼu: ‘Hatete ba sira: “Imi keta saʼe ba fatin neʼe hodi halo funu, tanba haʼu sei la hamutuk ho imi.+ Se imi bá, imi-nia inimigu sei manán imi.”’
43 Tan neʼe, haʼu koʼalia ba imi, maibé imi la rona. Imi kontra Jeová nia mandamentu no ho ulun-toos no foti an* koko atu saʼe ba foho neʼe.
44 Tuirmai ema Amoreu sira neʼebé hela iha foho neʼe sai mai hasoru imi no sira duni imi hanesan bani, no sira halo imi halai namkari iha Seir toʼo Horma.
45 Nuneʼe imi fila fali no komesa tanis iha Jeová nia oin, maibé Jeová la rona no la see tilun ba imi.
46 Tan neʼe mak imi hela tempu kleur iha Kades.
Nota-rodapé
^ Neʼe katak tinan 40 sura husi tempu neʼebé ema Izraél sai husi rai-Ejitu.
^ Karik neʼe refere ba área foho Líbanu.
^ Ka “tanba tesi-lia neʼe mak Maromak nian”.
^ Orj., “halo ita-nia laran sai nabeen”.
^ Ka karik “Maromak halo ona nia sai forte”.
