Deuteronómio 15:1-23
15 “Kada tinan hitu nia rohan, imi tenke halo ema livre husi ninia tusan sira.+
2 Iha dalan tuirmai neʼe mak imi sei husik livre ema nia tusan sira: Ema neʼebé fó debe tenke halo ninia maluk livre husi tusan neʼe. Ema neʼe labele husu ninia maluk ka ninia maun-alin atu selu fali, tanba imi sei fó sai katak ema sai livre ona husi tusan sira iha Jeová nia oin.+
3 Imi bele husu ema estranjeiru atu selu ninia debe sira,+ maibé imi tenke husik livre buat hotu neʼebé imi-nia maun-alin debe.
4 Maski nuneʼe, la iha ema ida iha imi-nia leet mak sei sai kiak, tanba Jeová sei haraik duni bensaun ba imi+ iha rai neʼebé Jeová, imi-nia Maromak, sei fó ba imi atu foti nuʼudar imi-nia liman-rohan,
5 maibé nia sei haraik bensaun neʼe só deʼit se imi rona ba Jeová, imi-nia Maromak, nia lian no halo tuir ho didiʼak ninia mandamentu hotu neʼebé haʼu hatoʼo ba imi ohin.+
6 Tanba Jeová, imi-nia Maromak, sei haraik bensaun ba imi hanesan nia promete ona ba imi, no imi sei fó-empresta ba nasaun barak, maibé imi rasik sei la presiza empresta;+ no imi sei domina nasaun barak, maibé sira sei la domina imi.+
7 “Se imi-nia maun-alin ida sai kiak iha imi-nia leet iha sidade ida iha rai neʼebé Jeová, imi-nia Maromak, sei fó ba imi, keta halo toos imi-nia laran ka karak* ba imi-nia maun-alin neʼebé kiak neʼe.+
8 Tanba imi tenke loke imi-nia liman ho laran-luak ba nia+ no ho laran fó-empresta buat naran deʼit neʼebé nia presiza ka falta.
9 Kuidadu bá atu labele iha hanoin aat neʼe iha imi-nia laran, hodi dehan: ‘Tinan hitu, tinan livre nian, besik ona’,+ no imi sai karak ba imi-nia maun-alin neʼebé kiak neʼe no la fó buat ida ba nia. Se nia halerik ba Jeová kona-ba imi, entaun imi rasik sei hetan sala.+
10 Imi labele fó ho laran-todan, imi tenke fó ba nia ho laran-luak,+ tanba ho ida-neʼe mak Jeová, imi-nia Maromak, sei haraik bensaun ba imi-nia hahalok hotu no buat hotu neʼebé imi halo.+
11 Tanba ema kiak sei iha nafatin iha imi-nia rai.+ Tan neʼe mak haʼu fó mandamentu ba imi, hodi dehan: ‘Imi tenke loke imi-nia liman ho laran-luak ba imi-nia maun-alin neʼebé hetan terus no sai kiak iha imi-nia rai.’+
12 “Se imi-nia maun-alin ida, mane ka feto Ebreu ida, faʼan nia an ba imi nuʼudar atan no nia serbí ona imi ba tinan neen, entaun iha tinan hitu imi tenke husik nia livre.+
13 No se imi husik nia livre, keta haruka nia sai ho liman-mamuk.
14 Ho laran-luak imi tenke fó buat ruma ba nia husi imi-nia bibi-lubun, husi imi-nia fatin sama trigu nian, no husi imi-nia fatin halo mina no tua-uvas nian. Imi tenke fó ba nia tuir bensaun neʼebé Jeová, imi-nia Maromak, fó ona ba imi.
15 Hanoin-hetan bá katak uluk imi sai atan iha rai-Ejitu, no Jeová, imi-nia Maromak, sosa fali imi. Tan neʼe mak ohin haʼu haruka imi atu halo ida-neʼe.
16 “Maibé se nia dehan ba ó: ‘Haʼu sei la husik hela Ita!’ tanba nia hadomi ó no ó-nia umakain, no nia kontente bainhira hamutuk ho ó,+
17 entaun ó tenke foti daun ida no ó tenke lori nia besik odamatan no tuu ninia tilun ho daun neʼe, nuneʼe nia sei sai ó-nia atan durante ninia moris tomak. Ó tenke halo hanesan neʼe mós ba ó-nia atan-feto.
18 Keta sente laran-todan bainhira ó husik nia livre no nia husik hela ó, tanba ninia serbisu ba ó ba tinan neen, neʼe iha folin dala rua boot liu fali serbisu-naʼin neʼebé ó selu, no Jeová, ó-nia Maromak, haraik ona bensaun ba ó iha buat hotu neʼebé ó halo.
19 “Imi tenke halo santu karau-oan no bibi-oan* primeiru hotu husi imi-nia karau-lubun no bibi-lubun ba Jeová, imi-nia Maromak.+ Imi labele uza imi-nia karau-oan primeiru atu halo serbisu ka tesi bibi-oan primeiru nia fulun.
20 Tinan-tinan, imi no imi-nia umakain tenke han naʼan husi animál sira-neʼe iha Jeová, imi-nia Maromak, nia oin iha fatin neʼebé Jeová sei hili.+
21 Maibé se animál neʼe iha moras ruma, hanesan ain-kudeʼik, matan-aat, ka iha moras seluk, imi labele hasaʼe ida-neʼe nuʼudar sakrifísiu ba Jeová, imi-nia Maromak.+
22 Imi tenke han naʼan neʼe iha imi-nia sidade laran,* ema neʼebé moos* no la moos* bele han, hanesan imi han naʼan husi bibi-rusa.*+
23 Maibé imi labele han ninia raan;+ imi tenke fakar sai ninia raan ba rai hanesan bee.+
Nota-rodapé
^ Orj., “taka imi-nia liman”.
^ Ka “karau-oan no bibi-oan neʼebé aman”.
^ Orj., “portaun laran”.
^ Haree “La moos” iha Glosáriu.
^ Orj., “naʼan husi bibi-rusa gazela ka bibi-rusa”.
