Deuteronómio 28:1-68
28 “Se imi rona duni ba Jeová, imi-nia Maromak, nia lian hodi halo tuir ho didiʼak ninia mandamentu hotu neʼebé haʼu fó sai ba imi ohin, Jeová, imi-nia Maromak, sei foti duni imi aas liu fali nasaun sira seluk hotu iha rai.+
2 Bensaun hotu tuirmai neʼe sei toʼo ba imi no toman imi,+ tanba imi kontinua rona ba Jeová, imi-nia Maromak, nia lian:
3 “Bensaun sei toʼo ba imi iha sidade laran, no bensaun sei toʼo ba imi iha rai-luan.+
4 “Bensaun sei toʼo ba imi-nia oan sira+ no ba rezultadu husi imi-nia toʼos no bensaun sei toʼo ba imi-nia animál-hakiak nia oan sira, imi-nia karau-oan no bibi-oan sira.+
5 “Bensaun sei toʼo ba imi-nia raga*+ no ba imi-nia basia deʼut trigu nian.+
6 “Bensaun sei toʼo ba imi iha fatin hotu neʼebé imi bá, no bensaun sei toʼo ba imi iha buat hotu neʼebé imi halo.
7 “Jeová sei halo imi-nia inimigu sira neʼebé kontra imi atu lakon husi imi-nia oin.+ Sira sei mai hamutuk atu ataka imi, maibé sira sei halai namkari husi imi-nia oin.+
8 Jeová sei fó bensaun ba imi-nia armazén+ no ba buat hotu neʼebé imi halo, no nia sei haraik duni bensaun ba imi iha rai neʼebé Jeová, imi-nia Maromak, sei fó ba imi.
9 Jeová sei halo imi sai nuʼudar povu santu ba ninia an,+ hodi tuir buat neʼebé nia jura ona ba imi,+ tanba imi kontinua halo tuir mandamentu husi Jeová, imi-nia Maromak, no laʼo iha ninia dalan sira.
10 Povu hotu iha rai tomak sei haree katak imi lori Jeová nia naran,+ no sira sei sai taʼuk ba imi.+
11 “Jeová sei halo imi atu iha oan barak, iha animál-hakiak barak no iha hahán barak husi imi-nia toʼos,+ iha rai neʼebé Jeová jura ona ba imi-nia beiʼala sira atu fó ba imi.+
12 Jeová sei loke lalehan hanesan ema ida loke armazén neʼebé nakonu, atu fó udan ba imi-nia rai tuir nia tempu+ no haraik bensaun ba buat hotu neʼebé imi halo. Imi sei fó-empresta ba nasaun barak, maibé imi rasik sei la presiza empresta.+
13 Jeová sei halo imi sai nuʼudar ulun, laʼós nuʼudar ikun; no imi sei iha leten,+ laʼós iha okos, se imi nafatin halo tuir Jeová, imi-nia Maromak, nia mandamentu neʼebé haʼu fó sai ba imi ohin atu halo tuir no kumpre.
14 Imi labele laʼo sees husi liafuan hotu neʼebé haʼu fó sai ba imi ohin, imi labele laʼo sees ba liman-loos ka ba liman-karuk,+ hodi laʼo tuir fali maromak sira seluk no serbí sira.+
15 “Maibé se imi la rona ba Jeová, imi-nia Maromak, nia lian hodi la halo tuir ninia mandamentu no ukun-fuan hotu neʼebé haʼu fó sai ba imi ohin, malisan hotu tuirmai neʼe sei toʼo ba imi no toman imi:+
16 “Malisan sei toʼo ba imi iha sidade laran, no malisan sei toʼo ba imi iha rai-luan.+
17 “Malisan sei toʼo ba imi-nia raga+ no ba imi-nia basia deʼut trigu nian.+
18 “Malisan sei toʼo ba imi-nia oan sira,+ ba rezultadu husi imi-nia toʼos no mós ba imi-nia karau-oan no bibi-oan sira.+
19 “Malisan sei toʼo ba imi iha fatin hotu neʼebé imi bá, no malisan sei toʼo ba imi iha buat hotu neʼebé imi halo.
20 “Jeová sei haruka malisan ba imi, sei lori kastigu no halo runguranga buat hotu neʼebé imi halo toʼo imi mate hotu no lakon lalais, tanba imi-nia hahalok aat hodi nega nia.*+
21 Jeová sei halo moras belit ba imi toʼo nia halakon tiha imi husi rai neʼebé imi sei foti nuʼudar imi-nian.+
22 Jeová sei kastigu imi ho meʼar-raan,* isin-manas makaʼas,+ bubu, manas, surik,+ anin neʼebé manas loos, no kulapur sei estraga imi-nia ai-horis sira;+ no buat sira-neʼe sei duni tuir imi toʼo imi lakon mohu.
23 No lalehan iha imi-nia leten sei sai hanesan riti, no rai sei sai hanesan besi.+
24 Jeová sei halo rai-uut hanesan udan iha imi-nia rai no rai-rahun mak sei tun ba imi husi lalehan toʼo imi lakon mohu tiha.
25 Jeová sei halo imi lakon iha imi-nia inimigu nia oin.+ Imi sei bá ataka sira, maibé imi sei halai namkari husi sira-nia oin; nasaun hotu iha mundu tomak sei sai taʼuk bainhira sira haree buat aat neʼebé mosu ba imi.+
26 No imi-nia mate-isin sei sai ai-han ba manu sira iha lalehan no animál sira iha rai, no la iha ema ida mak halo sira taʼuk no duni sai sira.+
27 “Jeová sei fó kastigu ba imi ho fisur husi rai-Ejitu, emorroidas,* moras kulit,* no isin-katar, neʼebé labele kura.
28 Jeová sei fó kastigu ba imi hodi halo imi sai bulak, matan-delek+ no bilán.
29 Maski iha loron, imi sei laʼo bá-mai la hatene dalan, hanesan ema matan-delek laʼo bá-mai iha nakukun laran,+ no imi sei la hetan susesu ho buat hotu neʼebé imi halo; no ema sei nafatin lohi hodi hamatak imi no naʼok husi imi, no la iha ema ida atu salva imi.+
30 Imi sei prenda ho feto ida, maibé mane seluk mak sei estraga nia. Imi sei harii uma, maibé imi sei la hela iha laran.+ Imi sei kuda uvas iha toʼos, maibé imi sei la kuʼu nia fuan.+
31 Ema sei oho imi-nia karau iha imi-nia oin, maibé imi sei la han nia naʼan ida. Ema sei naʼok imi-nia kuda-burru iha imi-nia oin kedas, maibé imi sei la hetan fali. Imi-nia inimigu sei foti imi-nia bibi-malae sira, maibé la iha ema ida atu salva imi.
32 Ema sei foti imi-nia oan-mane no oan-feto+ maski imi hateke hela, no imi sei nafatin hanoin tebes sira, maibé imi-nia liman sei la iha kbiit atu halo buat ida.
33 Ema neʼebé imi la koñese mak sei han ai-han husi imi-nia toʼos no buat hotu neʼebé imi hetan,+ no ema sei kontinua hamatak imi no halo susar ba imi.
34 Imi sei sai bulak tanba buat neʼebé imi haree ho imi-nia matan rasik.
35 “Jeová sei fó kastigu ba imi hodi hamosu fisur neʼebé halo moras tebes no labele kura iha imi-nia ain-tuur no kelen. Fisur sei nakonu iha imi-nia ulun toʼo ain.
36 Jeová sei duni sai imi no mós liurai neʼebé imi hili ba imi-nia an, no nia sei lori imi ba nasaun ida neʼebé imi no imi-nia beiʼala sira la hatene,+ no iha neʼebá mak imi sei serbí maromak sira seluk, maromak neʼebé halo husi ai no fatuk.+
37 No iha rai neʼebé Jeová lori imi bá, ema sei sai taʼuk no goza imi* tanba buat aat neʼebé mosu ba imi, no imi sei sai buat neʼebé ema goza no hatún iha nasaun hotu nia leet.+
38 “Imi sei kuda fini barak iha toʼos, maibé imi sei halibur uitoan deʼit,+ tanba gafañotu mak sei han mohu tiha.
39 Imi sei kuda uvas iha toʼos, maibé imi sei la hemu tua-uvas no la halibur buat ida,+ tanba ular kiʼik mak sei han mohu tiha.
40 Imi sei iha ai-oliveira iha imi-nia rai hotu, maibé imi sei la kose imi-nia an ho mina-oliveira, tanba imi-nia oliveira-fuan sei monu hotu.
41 Imi sei iha oan-mane no oan-feto sira, maibé sira sei la sai imi-nian ba nafatin, tanba ema sei lori sira sai dadur.+
42 Insetu lubun mak sei han mohu imi-nia ai-hun hotu no mós han rezultadu husi imi-nia toʼos.
43 Ema estranjeiru neʼebé hela iha imi-nia leet sei kontinua sai boot liu imi, no imi rasik sei kontinua sai kiʼik liután.
44 Nia sei fó-empresta ba imi, maibé imi sei la fó-empresta ba nia.+ Nia sei sai nuʼudar ulun, no imi rasik sei sai nuʼudar ikun.+
45 “Malisan hotu neʼe+ sei toʼo ba imi no duni tuir imi no toman imi toʼo imi lakon mohu tiha,+ tanba imi la rona ba Jeová, imi-nia Maromak, nia lian hodi halo tuir ninia mandamentu no ukun-fuan sira neʼebé nia fó sai ba imi.+
46 No malisan sira-neʼe sei toʼo duni ba imi no imi-nia bei-oan sira no sei sai nafatin nuʼudar sinál no avizu ba ema hotu,+
47 tanba imi la serbí Jeová, imi-nia Maromak, ho kontente no laran-haksolok bainhira imi hetan ona buat diʼak barak.+
48 Jeová sei haruka imi-nia inimigu sira atu kontra imi, no imi sei serbí sira+ maski imi hamlaha,+ hamrook, iha roupa neʼebé uitoan deʼit, no falta buat hotu. Inimigu sei tau besi-lolon* iha imi-nia kabaas toʼo nia halakon tiha imi.
49 “Jeová sei haruka nasaun dook ida+ husi rai neʼebé dook tebes atu ataka imi, no sira sei ataka imi hanesan manu-makikit.+ Nasaun neʼe nia língua imi la komprende,+
50 no nasaun neʼe nia oin siʼak loos no la hanoin ferik-katuas sira no la hatudu laran-diʼak ba labarik sira.+
51 Sira sei han imi-nia animál-hakiak nia oan sira no han rezultadu husi imi-nia toʼos toʼo imi lakon mohu tiha. Sira sei la husik hela ai-han ida, ka tua-uvas foun, ka mina, ka karau-oan ka bibi-oan toʼo sira halakon tiha imi.+
52 Sira sei halo serku haleʼu imi, no sulan imi iha imi-nia sidade* hotu nia laran iha imi-nia rai, toʼo ikusmai imi-nia moru neʼebé aas, metin no neʼebé imi tau fiar bá monu tiha. Sin, sira sei haleʼu hodi ataka imi iha imi-nia sidade hotu nia laran iha imi-nia rai tomak, katak rai neʼebé Jeová, imi-nia Maromak, fó ona ba imi.+
53 Tuirmai imi sei han imi-nia oan rasik, sin, imi-nia oan-mane no oan-feto nia isin,+ katak oan sira neʼebé Jeová, imi-nia Maromak, fó ona ba imi, tanba inimigu nia serku neʼe makaʼas tebes no lori terus boot ba imi.
54 “Maski mane neʼebé laran-maus no iha toman atu moris diʼak iha imi-nia leet, maibé nia sei la hanoin tan ninia maun ka alin ka ninia feen neʼebé nia hadomi ka ninia oan-mane sira neʼebé sei moris hela,
55 no tanba nia la iha tan buat ida atu han, entaun nia sei la fahe ninia oan nia isin ba sira, tanba inimigu nia serku neʼe makaʼas tebes no terus neʼe boot tebes iha imi-nia sidade sira.+
56 No feto neʼebé laran-maus no iha toman atu moris diʼak iha imi-nia leet, neʼebé lakohi tau ninia ain iha rai,+ nia sei la hanoin tan ninia laʼen neʼebé nia hadomi ka ninia oan-mane ka oan-feto,
57 no nia sei lakohi fahe isin balu husi ninia oan-mane neʼebé nia fó moris ka fahe kaʼan neʼebé sai husi ninia knotak. Nia sei han buat sira-neʼe hotu ho subasubar tanba inimigu nia serku neʼe makaʼas tebes no terus neʼe boot tebes iha imi-nia sidade sira.
58 “Se imi la halo tuir ho didiʼak liafuan hotu husi Ukun-Fuan neʼebé hakerek iha livru neʼe+ no imi la taʼuk ba imi-nia Maromak Jeová+ nia naran neʼebé iha glória boot no kmanek tebes,*+
59 Jeová sei lori kastigu makaʼas ba imi no imi-nia bei-oan sira, sin, kastigu boot neʼebé sei iha ba nafatin,+ no moras todan neʼebé sei hela ba nafatin.
60 Nia sei lori fali ba imi moras hotu husi rai-Ejitu neʼebé uluk imi taʼuk, no moras sira-neʼe sei belit duni ba imi.
61 Liután neʼe, Jeová sei fó ba imi moras oioin no kastigu neʼebé la hakerek iha livru Ukun-Fuan neʼe toʼo imi lakon mohu tiha.
62 Maski imi sai barak ona hanesan fitun iha lalehan,+ maibé ema uitoan deʼit husi imi mak sei hela,+ tanba imi la rona ba Jeová, imi-nia Maromak, nia lian.
63 “No hanesan uluk Jeová kontente atu halo imi riku no sai barak, nuneʼe mós Jeová sei sai kontente hodi halakon no hamohu imi; no nia sei hasai tiha imi husi rai neʼebé imi sei foti nuʼudar imi-nian.
64 “Jeová sei halo imi namkari iha nasaun sira hotu nia leet, husi rai nia rohan ida toʼo rai nia rohan seluk,+ no iha neʼebá mak imi sei serbí maromak sira neʼebé halo husi ai no fatuk, maromak neʼebé imi no imi-nia beiʼala sira la hatene.+
65 Imi sei la moris ho dame iha nasaun sira-neʼe nia leet+ no la iha fatin atu tau imi-nia ain. No Jeová sei halo imi laran-taridu+ no matan sai kole no sente la iha esperansa.+
66 Imi-nia moris sei iha perigu boot nia laran, no imi sei sente nakdedar loron no kalan; no imi la hatene se imi sei moris ka lae.
67 Iha dadeer imi sei dehan: ‘Diʼak liu se agora mak kalan!’ no iha kalan imi sei dehan: ‘Diʼak liu se agora mak dadeer!’ tanba imi sente laran-nakdedar no tanba buat neʼebé imi haree ho imi-nia matan rasik.
68 No Jeová sei lori imi fila fali ba rai-Ejitu ho ró, liuhusi dalan neʼebé haʼu dehan ona ba imi: ‘Imi sei nunka haree fali ida-neʼe’, no iha neʼebá imi sei faʼan imi-nia an ba imi-nia inimigu hodi sai nuʼudar atan-mane no atan-feto, maibé la iha ema ida mak sosa imi.”
Nota-rodapé
^ Neʼe katak sei nafatin iha ai-han iha sira-nia raga.
^ Orj., “haʼu”.
^ Ka “tuberkuloze”.
^ Neʼe mak moras iha kidun-matan tanba ninia uat sira bubu.
^ Ka “eczema”.
^ Orj., “no imi sei sai hanesan lia-dadolin”.
^ Ka “ai-leba husi besi”.
^ Orj., “portaun”.
^ Ka “no merese atu ema hamtaʼuk”.
