Deuteronómio 34:1-12
34 Tuirmai Moisés sai husi rai-tetuk maran Moab nian hodi saʼe Foho Nebo,+ toʼo Pisga nia tutun,+ neʼebé hateke ba Jerikó.+ No Jeová hatudu ba nia rai hotu neʼe, husi Gilead toʼo Dan,+
2 no rai-Naftali tomak no rai-Efraim, rai-Manasés, no rai-Judá tomak toʼo tasi parte oeste,*+
3 no área Negeb,+ área Jordaun,+ rai-tetuk Jerikó, sidade ai-palmeira nian toʼo Zoar.+
4 Tuirmai Jeová dehan ba nia: “Neʼe mak rai neʼebé haʼu jura ona ba Abraão, Isaac no Jacob, hodi dehan: ‘Haʼu sei fó rai neʼe ba ó-nia bei-oan sira.’+ Haʼu husik ó haree rai neʼe ho ó-nia matan rasik, maibé ó sei la tama ba rai neʼe.”+
5 Depois neʼe, Jeová nia atan Moisés mate iha rai-Moab hodi tuir buat neʼebé Jeová hatete ona.+
6 Nia hakoi Moisés iha rai-tetuk iha rai-Moab, iha Bet-Peor nia oin, no la iha ema ida mak hatene ninia rate toʼo ohin loron.+
7 Moisés tinan 120 bainhira nia mate.+ Ninia matan seidauk aat, no nia sei iha hela kbiit.
8 Povu Izraél tanis ba Moisés iha rai-tetuk maran Moab nian durante loron 30.+ Tuirmai loron tanis no triste nian ba Moisés remata ona.
9 Nun nia oan-mane Josué sai nakonu ho matenek,* tanba Moisés tau ona liman ba nia;+ no ema Izraél hahú rona ba nia, no sira halo tuir duni mandamentu neʼebé Jeová fó sai ona ba Moisés.+
10 Maibé la mosu tan profeta ida iha Izraél hanesan Moisés,+ neʼebé Jeová koñese oin ba oin.+
11 Moisés halo sinál no milagre hotu neʼebé Jeová haruka nia atu halo iha rai-Ejitu ba Faraó no ninia atan sira hotu no ba ninia rai tomak,+
12 no Moisés mós hatudu liman neʼebé forte no kbiit boot iha ema Izraél hotu nia oin.+
Nota-rodapé
^ Neʼe katak Tasi Boot ka Tasi Mediterráneu.
^ Ka “nakonu ho matenek neʼebé Maromak nia kbiit fó ba nia”.
