Deuteronómio 9:1-29
9 “Rona bá, oh ema Izraél, ohin imi sei hakur Mota Jordaun+ atu tama ba rai neʼe no duni sai nasaun sira neʼebé boot liu no forte liu fali imi,+ nasaun sira neʼebé iha sidade boot sira ho moru neʼebé aas toʼo lalehan,+
2 no mós iha povu neʼebé isin-boot no ain-aas, ema Anac nia oan-mane sira,+ neʼebé imi hatene no rona ema dehan: ‘Sé mak bele hamriik hasoru Anac nia oan-mane sira?’
3 Tan neʼe, iha loron neʼe, imi tenke hatene katak Jeová, imi-nia Maromak, sei hakur uluk iha imi-nia oin.+ Nia mak hanesan ahi neʼebé han mohu buat hotu,+ no nia sei halakon tiha sira. Nia sei manán sira iha imi-nia oin atu imi duni sai sira lalais no halakon sira, hanesan Jeová promete ona ba imi.+
4 “Bainhira Jeová, imi-nia Maromak, duni sai tiha sira husi imi-nia oin, imi keta hanoin iha imi-nia laran: ‘Tanba haʼu-nia hahalok loos mak Jeová lori haʼu tama atu foti rai neʼe.’+ Tuir loloos, laʼós hanesan neʼe. Jeová duni sai nasaun sira-neʼe husi imi-nia oin tanba sira-nia hahalok aat.+
5 Laʼós tanba imi-nia hahalok loos ka laran-loos mak imi tama atu foti sira-nia rai. Maibé, tanba nasaun sira-neʼe nia hahalok aat mak Jeová, imi-nia Maromak, duni sai sira husi imi-nia oin,+ no hodi kumpre liafuan neʼebé Jeová jura ona ba imi-nia beiʼala sira, Abraão,+ Isaac+ no Jacob.+
6 Neʼe duni, hatene bá katak laʼós tanba imi-nia hahalok loos mak Jeová, imi-nia Maromak, entrega rai diʼak neʼe ba imi atu foti, tanba loloos imi mak povu neʼebé ulun-toos.*+
7 “Hanoin-hetan bá no keta haluha kona-ba oinsá imi halo Jeová, imi-nia Maromak, sai hirus iha rai-fuik.+ Husi loron neʼebé imi sai husi rai-Ejitu toʼo imi mai iha fatin neʼe, imi kontra beibeik Jeová.+
8 Iha Horeb imi provoka Jeová, no Jeová sai hirus tebes ba imi toʼo nia hakarak atu halakon imi.+
9 Bainhira haʼu saʼe ba foho leten atu simu fatuk-belar sira,+ katak fatuk-belar aliansa nian neʼebé Jeová halo ho imi,+ haʼu hela iha foho neʼe durante loron 40 no kalan 40,+ haʼu la han ai-han ida no la hemu bee.
10 Tuirmai Maromak Jeová fó ba haʼu fatuk-belar rua neʼe. Iha fatuk sira-neʼe Jeová hakerek liafuan ho ninia liman-fuan rasik, katak liafuan hotu neʼebé nia koʼalia ona ba imi husi ahi laran iha foho, iha tempu neʼebé povu halibur hamutuk.+
11 No iha loron 40 no kalan 40 nia rohan, Jeová fó fatuk-belar rua neʼe ba haʼu, katak fatuk-belar aliansa nian,
12 no Jeová dehan ba haʼu: ‘Hamriik bá, tun lalais husi neʼe, tanba ó-nia povu neʼebé ó lori sai husi rai-Ejitu halo ona buat neʼebé foʼer.+ No lalais deʼit sira sees ona husi dalan neʼebé haʼu haruka sira atu laʼo tuir. Sira halo ona estátua besi ba sira-nia an.’+
13 Tuirmai Jeová dehan ba haʼu: ‘Haʼu haree ona povu neʼe, no loloos, sira mak povu neʼebé ulun-toos* duni.+
14 Keta hanetik haʼu; haʼu sei halakon sira no hamoos sira-nia naran husi mundu,* no husik haʼu halo ó sai nasaun ida neʼebé forte liu no barak liu fali sira.’+
15 “Tuirmai haʼu fila no tun husi foho neʼe nuʼudar ahi sei lakan hela iha foho neʼe,+ no haʼu kaer hela fatuk-belar aliansa nian rua iha haʼu-nia liman sorin-sorin.+
16 Depois neʼe, haʼu foti matan no haree katak imi halo ona sala hasoru Jeová, imi-nia Maromak! Imi halo karau-oan ida husi besi ba imi-nia an. Nuneʼe lalais deʼit imi sees husi dalan neʼebé Jeová haruka imi atu laʼo tuir.+
17 Entaun haʼu kaer fatuk-belar rua neʼe no soe no harahun tiha iha imi-nia oin.+
18 Tuirmai haʼu hakneʼak no hakruʼuk ho oin ba rai iha Jeová nia oin durante loron 40 no kalan 40, hanesan haʼu halo uluk. Haʼu la han ai-han ida no la hemu bee,+ tanba imi-nia sala hotu neʼebé imi halo hodi halo buat aat tuir Jeová nia haree no halo nia laran-kanek.
19 Haʼu taʼuk loos tanba Jeová hirus makaʼas hasoru imi+ toʼo nia hakarak atu halakon imi. Maibé, iha tempu neʼebá mós Jeová rona mai haʼu.+
20 “Jeová sai hirus tebes ba Arão toʼo nia hakarak atu halakon Arão,+ maibé iha tempu neʼebá haʼu mós harohan ba Arão nia diʼak.
21 Tuirmai haʼu foti karau-oan neʼe,+ neʼebé sala ba imi atu halo, no sunu ida-neʼe; depois neʼe, haʼu baku rahun ida-neʼe no halo rahun toʼo uut loos hanesan rai-rahun, no haʼu soe ba mota neʼebé suli tun husi foho.+
22 “Liután neʼe, iha Tabera,+ iha Massá+ no iha Kibrot-Hatava,+ imi mós halo Jeová sai hirus.
23 Bainhira Jeová haruka imi sai husi Kades-Barnea+ no dehan: ‘Saʼe bá, foti rai neʼebé haʼu sei fó ba imi!’ dala ida tan imi kontra hasoru orden husi Jeová, imi-nia Maromak,+ no imi la hatudu fiar+ ba nia no la halo tuir nia.
24 Imi sempre kontra Jeová husi tempu neʼebé haʼu koñese imi.
25 “Entaun haʼu kontinua hakneʼak no hakruʼuk ho oin ba rai iha Jeová nia oin durante loron 40 no kalan 40,+ haʼu halo nuneʼe tanba Jeová dehan ona katak nia hakarak atu halakon imi.
26 Haʼu komesa harohan ba Jeová, hodi dehan: ‘Oh Jeová, Naʼi Ukun-Naʼin Boot Liu, keta halakon Ita-nia povu. Sira mak Ita-nia liman-rohan rasik,+ neʼebé Ita sosa fali ona ho Ita-nia kbiit boot no Ita lori sira sai husi rai-Ejitu ho liman neʼebé forte.+
27 Hanoin-hetan Ita-nia atan Abraão, Isaac no Jacob.+ Keta haree deʼit ba povu neʼe nia hahalok ulun-toos, hahalok aat no sira-nia sala.+
28 Se lae karik, povu husi rai neʼebé Ita lori ami sai sei dehan: “Jeová la iha kbiit atu lori sira tama ba rai neʼebé nia promete ona ba sira, no tanba nia odi sira mak nia lori sira sai atu oho sira iha rai-fuik.”+
29 Sira mak Ita-nia povu no Ita-nia liman-rohan,+ neʼebé Ita lori sai ho Ita-nia kbiit boot no Ita-nia liman neʼebé forte.’+
Nota-rodapé
^ Orj., “neʼebé halo imi-nia kakorok toos”.
^ Orj., “neʼebé halo sira-nia kakorok toos”.
^ Orj., “husi lalehan okos”.
