Galásia 4:1-31
4 Haʼu dehan katak se ema neʼebé atu simu liman-rohan mak labarik kiʼik ida, nia hanesan deʼit ho atan ida, maski nia mak naʼi ba buat hotu,
2 maibé ema mak tau matan ba nia no ninia uma toʼo tempu neʼebé ninia aman deside ona.
3 Nuneʼe mós ho ita, kuandu ita sei labarik kiʼik, ita sai atan ba hanoin no hahalok mundu neʼe nian.+
4 Maibé kuandu tempu neʼe remata ona, Maromak haruka ninia Oan-Mane, neʼebé moris mai husi feto ida+ no mós moris mai iha ukun-fuan nia okos.+
5 Nia sosa fali ema neʼebé iha ukun-fuan nia okos hodi halo sira sai livre,+ atu nuneʼe Maromak bele simu ita nuʼudar oan-hakiak.+
6 Tanba imi mak Maromak nia oan sira, Maromak haruka ona ninia espíritu+ ba ita-nia laran, espíritu neʼe mak iha ninia Oan-Mane.+ Espíritu neʼe book ita atu hatete: “Abba,* Aman!”+
7 Entaun imi ida-idak laʼós tan atan, maibé oan, no se imi mak oan, entaun imi mós simu liman-rohan liuhusi Maromak.+
8 Maski nuneʼe, bainhira imi seidauk hatene Maromak, imi sai atan ba buat neʼebé laʼós maromak.
9 Maibé agora imi hatene ona Maromak, ka haʼu bele dehan katak Maromak hatene ona imi, entaun oinsá mak imi fila fali ba buat neʼebé fraku+ no buat neʼebé la iha folin iha mundu neʼe no hakarak sai atan fali ba buat sira-neʼe?+
10 Imi hakaʼas an atu selebra loron sira, fulan sira,+ tempu* no tinan sira.
11 Haʼu hanoin barak kona-ba imi, tanba karik haʼu-nia hakaʼas an atu ajuda imi mak saugati deʼit.
12 Maun-alin sira, haʼu husu imi atu sai hanesan haʼu, tanba uluk haʼu mós hanesan imi.+ Imi la halo sala ruma hasoru haʼu.
13 Maibé imi hatene katak tanba haʼu moras mak haʼu hetan oportunidade primeiru atu fó sai liafuan diʼak ba imi.
14 Maski haʼu-nia moras neʼe hanesan koko ida ba imi, maibé imi la odi ka hakribi haʼu,* maibé imi simu haʼu hanesan haʼu mak anju ida husi Maromak, ka hanesan Kristu Jesus.
15 Agora imi-nia ksolok neʼe iha neʼebé? Tanba haʼu fiar katak, uluk se imi bele, imi mós prontu atu hasai imi-nia matan no fó ba haʼu se neʼe ajuda haʼu.+
16 Entaun, haʼu sai ona imi-nia inimigu tanba haʼu fó-hatene lia-loos ba imi ka?
17 Ema sira-neʼe laran-manas atu manán imi-nia laran, maibé laʼós ba buat diʼak, sira hakarak atu haketak imi husi haʼu, atu nuneʼe imi bele laʼo tuir sira ho laran.
18 Maibé, se ema ida buka atu manán imi-nia laran ho laran-manas tanba razaun neʼebé loos, neʼe diʼak, no neʼe laʼós deʼit kuandu haʼu iha neʼebá hamutuk ho imi.
19 Haʼu-nia oan sira,+ dala ida tan haʼu sente moras tanba imi, moras hanesan ho inan neʼebé atu tuur-ahi, toʼo tempu neʼebé imi haleno Kristu nia hahalok.*
20 Haʼu hakarak atu hamutuk ho imi agora no koʼalia iha dalan seluk, tanba haʼu la hatene atu halo saida ba imi.
21 Imi neʼebé hakarak atu hela iha ukun-fuan nia okos, fó-hatene toʼok mai haʼu: Imi rasik rona Ukun-Fuan ka lae?
22 Porezemplu, hakerek nanis ona katak Abraão iha oan-mane naʼin-rua, ida husi atan-feto+ no ida husi feto neʼebé livre.+
23 Atan-feto nia oan moris mai tuir isin,*+ no feto neʼebé livre nia oan moris mai liuhusi promesa.+
24 Buat sira-neʼe mak istória neʼebé sai hanesan símbolu, tanba feto rua neʼe reprezenta aliansa rua, aliansa ida husi Foho Sinai,+ neʼe hanesan Agar neʼebé fó moris ba oan nuʼudar atan.
25 Agar reprezenta Sinai,+ foho ida iha Arábia, no nia hanesan ho Jeruzalein agora nian, tanba nia sai atan hamutuk ho ninia oan sira.
26 Maibé Jeruzalein lalehan nian mak livre, no nia mak ita-nia inan.
27 Tanba hakerek nanis ona: “Oh feto neʼebé labele iha oan, haksolok bá; oh feto neʼebé la sente moras tuur-ahi nian, haklalak bá ho haksolok; tanba feto neʼebé ninia laʼen soe hela, nia iha oan barak liu fali feto neʼebé iha laʼen.”+
28 Agora maun-alin sira, imi mak oan liuhusi promesa hanesan mós ho Isaac.+
29 Maibé hanesan iha tempu neʼebá, oan neʼebé moris mai tuir isin* hahú fó-terus ba oan neʼebé moris mai liuhusi Maromak nia espíritu,+ nuneʼe mós ho ohin loron.+
30 Maski nuneʼe, Eskritura dehan saida? “Duni sai atan-feto neʼe no ninia oan-mane, tanba atan-feto neʼe nia oan sei la simu liman-rohan hamutuk ho feto neʼebé livre nia oan-mane.”+
31 Tan neʼe, maun-alin sira, ita laʼós atan-feto neʼe nia oan, maibé feto neʼebé livre nia oan.
Nota-rodapé
^ Neʼe mak liafuan Ebraiku ka Aramaiku neʼebé signifika “aman”, maibé hatudu relasaun besik hanesan liafuan “apá”.
^ Neʼe katak tempu ba festa adorasaun nian.
^ Ka “tafui ba haʼu”.
^ Ka “tempu neʼebé Kristu forma ona iha imi”.
^ Ka “moris mai iha dalan naturál”.
^ Ka “moris mai iha dalan naturál”.
