Josué 10:1-43
10 Liurai Adoni-Zedek husi Jeruzalein rona katak Josué manán ona sidade Ai no harahun tiha ona sidade neʼe, no katak Josué halo ba sidade Ai ho ninia liurai+ hanesan nia halo ona ba sidade Jerikó ho ninia liurai.+ Liurai mós rona katak ema Gibeão halo dame ona ho ema Izraél+ no hela ho sira.
2 Ho ida-neʼe, Liurai Adoni-Zedek sai taʼuk tebes,+ tanba sidade Gibeão boot tebes, hanesan sidade sira neʼebé liurai mak ukun. Sidade Gibeão mak boot liu fali sidade Ai,+ no mane hotu iha sidade Gibeão mak funu-naʼin.
3 Entaun Liurai Adoni-Zedek husi Jeruzalein haruka lia-menon tuirmai neʼe ba Liurai Hoham husi Hebron,+ Liurai Piram husi Jarmut, Liurai Jafia husi Lakis no Liurai Debir husi Eglon,+ hodi dehan:
4 “Mai ajuda haʼu, mai ita bá ataka Gibeão, tanba sira halo dame ona ho Josué no ema Izraél.”+
5 Nuneʼe ema Amoreu nia liurai naʼin-lima,+ katak liurai husi Jeruzalein, liurai husi Hebron, liurai husi Jarmut, liurai husi Lakis no liurai husi Eglon, halibur hamutuk ho sira-nia tropa hodi bá haleʼu Gibeão no halo funu hasoru sidade neʼe.
6 Tuirmai ema Gibeão sira haruka lia-menon ba Josué iha ema Izraél nia hela-fatin iha Gilgal,+ hodi dehan: “Keta husik Ita-Boot nia atan sira-neʼe mesak.+ Mai lalais! Salva ami no ajuda ami! Ema Amoreu nia liurai hotu husi área foho nian halibur hamutuk ona atu mai ataka ami.”
7 Entaun Josué sai husi Gilgal hodi saʼe bá neʼebá hamutuk ho tropa sira no funu-naʼin hotu neʼebé kbiit boot.+
8 Tuirmai Jeová dehan ba Josué: “Keta taʼuk ba sira,+ tanba haʼu entrega ona sira ba ó.+ Sira ida mós sei la iha kbiit atu hamriik hasoru ó.”+
9 Josué laʼo husi Gilgal durante kalan tomak, no ataka sira-nia inimigu derrepente deʼit.
10 Jeová halo sira runguranga iha ema Izraél nia oin,+ no ema Izraél oho sira barak tebes iha sidade Gibeão. Ema Izraél duni tuir sira liuhusi dalan atu saʼe ba Bet-Horom no kontinua oho sira toʼo iha Azeka no Makedá.
11 Bainhira sira halai husi ema Izraél no tun daudaun husi Bet-Horom, Jeová halo udan jelu-fatuk boot husi lalehan tun ba sira toʼo iha Azeka, no sira mate. Tuir loloos, ema barak liu mate tanba jelu-fatuk duké mate ho ema Izraél nia surik.
12 Nuneʼe, iha loron neʼebé Jeová manán ema Amoreu iha ema Izraél nia oin, Josué hatete ba Jeová iha ema Izraél nia oin:
“Loro-matan, para metin+ bá iha Gibeão nia leten,+Fulan, para metin bá iha Rai-Tetuk Aijalon nia leten!”
13 Entaun loro-matan para metin duni no fulan mós la book an toʼo nasaun neʼe manán tiha ninia inimigu sira. Neʼe hakerek ona iha livru Jasar,+ loos ka lae? Loro-matan para metin iha lalehan klaran no la tun lalais ba loron tomak.
14 La iha loron seluk hanesan loron neʼe, antes ka depois loron neʼe, bainhira Jeová rona ba ema nia lian+ iha dalan hanesan neʼe, tanba Jeová rasik mak halo funu ba Izraél.+
15 Depois neʼe, Josué hamutuk ho tropa Izraél hotu fila fali ba sira-nia hela-fatin iha Gilgal.+
16 Iha tempu neʼebá, liurai naʼin-lima neʼe halai no subar an iha fatuk-kuak iha sidade Makedá.+
17 Tuirmai ema fó-hatene ba Josué, hodi dehan: “Liurai naʼin-lima neʼe subar hela iha fatuk-kuak iha Makedá.”+
18 Entaun Josué hatete: “Duir fatuk boot sira ba kuak neʼe nia ibun no haruka ema balu atu hein sira.
19 Maibé imi seluk labele para. Duni tuir imi-nia inimigu no oho sira husi kotuk.+ Keta husik sira fila ba sira-nia sidade, tanba Jeová, imi-nia Maromak, entrega ona sira ba imi-nia liman.”
20 Josué no ema Izraél oho inimigu barak loos toʼo besik halakon sira hotu, só ema balu deʼit mak halai no fila ba sira-nia sidade neʼebé iha moru aas.
21 Depois neʼe, tropa hotu fila fali ba Josué iha sira-nia hela-fatin iha Makedá ho seguru. La iha ema ida mak brani atu koʼalia* hasoru ema Izraél.
22 Tuirmai Josué hatete: “Loke fatuk-kuak nia ibun no lori sai liurai naʼin-lima neʼe mai haʼu.”
23 Entaun sira lori sai liurai naʼin-lima neʼe ba Josué. Liurai sira-neʼe mak liurai husi Jeruzalein, liurai husi Hebron, liurai husi Jarmut, liurai husi Lakis no liurai husi Eglon.+
24 Bainhira sira lori tiha liurai sira-neʼe ba Josué, nia bolu mane Izraél hotu no hatete ba tropa nia komandante sira neʼebé bá funu hamutuk ho nia, hodi dehan: “Hakat mai oin. Tau imi-nia ain iha liurai sira-neʼe nia kanuruk.” Entaun sira hakat ba oin no tau sira-nia ain iha liurai sira-neʼe nia kanuruk.+
25 Tuirmai Josué hatete ba sira: “Labele sai taʼuk ka nakdedar.+ Sai aten-brani no sai forte bá, tanba Jeová sei halo nuneʼe ba imi-nia inimigu hotu neʼebé funu hasoru imi.”+
26 Tuirmai Josué oho liurai naʼin-lima neʼe no tara sira iha ai-riin* lima, no husik sira tara hela iha ai-riin toʼo lokraik.
27 Bainhira loro-matan tun ona, Josué haruka ema atu hatún sira-nia mate-isin husi ai-riin leten+ no soe iha fatuk-kuak neʼebé uluk sira rasik subar bá. Tuirmai sira tau fatuk boot sira iha fatuk-kuak neʼe nia ibun, no neʼe sei iha toʼo ohin loron.
28 Iha loron neʼebá, Josué manán sidade Makedá+ no oho ema iha sidade neʼe ho surik. Nia halakon sidade neʼe nia liurai no ema* hotu iha sidade laran, hodi la husik ema ida moris.+ Nia halo ba liurai Makedá+ hanesan ho buat neʼebé nia halo ona ba liurai Jerikó.
29 Tuirmai Josué hamutuk ho tropa Izraél hotu sai husi Makedá hodi bá sidade Libna no halo funu hasoru Libna.+
30 Jeová mós entrega Libna no ninia liurai+ ba ema Izraél nia liman, no sira ataka sidade neʼe no oho ema* hotu ho surik, hodi la husik ema ida moris. Entaun sira halo ba liurai husi Libna hanesan ho buat neʼebé sira halo ona ba liurai Jerikó.+
31 Depois neʼe, Josué hamutuk ho tropa Izraél hotu sai husi Libna hodi bá toʼo sidade Lakis+ no sira hela iha neʼebá hodi halo funu hasoru sidade neʼe.
32 Jeová entrega Lakis ba ema Izraél nia liman, no sira manán sidade neʼe iha loron segundu. Sira ataka sidade neʼe no oho ema* hotu ho surik,+ hanesan ho buat neʼebé sira halo ona ba Libna.
33 Tuirmai Liurai Horam husi Gezer,+ saʼe bá atu ajuda Lakis, maibé Josué oho nia no ninia povu toʼo la iha ema ida mak moris.
34 Depois neʼe, Josué hamutuk ho tropa Izraél hotu sai husi Lakis hodi bá sidade Eglon+ no sira hela iha neʼebá hodi halo funu hasoru sidade neʼe.
35 Iha loron neʼe, sira manán sidade neʼe no oho ema hotu iha sidade laran ho surik. Sira halakon ema* hotu iha sidade neʼe, hanesan ho buat neʼebé sira halo ona ba Lakis.+
36 Tuirmai Josué hamutuk ho tropa Izraél hotu sai husi Eglon hodi bá toʼo sidade Hebron+ no halo funu hasoru sidade neʼe.
37 Sira ataka no manán sidade neʼe no knua sira neʼebé haleʼu, no oho ninia liurai no ema* hotu neʼebé hela iha neʼebá ho surik, hodi la husik ema ida moris. Nia harahun sidade neʼe no oho ema* hotu, hanesan ho buat neʼebé nia halo ona ba Eglon.
38 Ikusmai Josué hamutuk ho tropa Izraél hotu fila ba sidade Debir+ no halo funu hasoru sidade neʼe.
39 Nia manán sidade neʼe no knua sira hotu neʼebé haleʼu, no oho ninia liurai no ema hotu ho surik, no halakon ema* hotu iha sidade neʼe,+ hodi la husik ema ida moris.+ Nia halo ba Debir no ninia liurai hanesan ho buat neʼebé nia halo ona ba Hebron no Libna no ba sira-nia liurai.
40 Josué manán rai hotu iha área foho nian, área Negeb, área Sefela+ no foho-lolon sira, no nia manán sira-nia liurai hotu, hodi la husik ema ida moris; nia halakon buat hotu+ neʼebé dada iis hodi halo tuir Jeová, Izraél nia Maromak nia mandamentu.+
41 Josué manán sira husi Kades-Barnea+ toʼo Gaza+ no manán rai-Gosen+ tomak toʼo Gibeão.+
42 Josué manán liurai sira-neʼe hotu no sira-nia rai dala ida deʼit, tanba Jeová, Izraél nia Maromak, mak halo funu ba Izraél.+
43 Tuirmai, Josué hamutuk ho tropa Izraél hotu fila fali ba sira-nia hela-fatin iha Gilgal.+
Nota-rodapé
^ Orj., “mak halo kroʼat ninia nanál”.
^ Ka “ai-hun”.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
