Josué 2:1-24
2 Tuirmai Nun nia oan-mane Josué haruka subasubar espiaun naʼin-rua sai husi Sitim+ atu bá hafuhu rai neʼe. Nia dehan ba sira: “Bá buka-hatene rai neʼe, liuliu Jerikó.” Nuneʼe sira bá no toʼo iha feto-aat* ida naran Raab nia uma,+ no sira hela iha neʼebá.
2 Ema fó-hatene ba liurai Jerikó, hodi dehan: “Kalan neʼe, mane Izraél sira mai ona iha neʼe atu hafuhu rai neʼe.”
3 Ho ida-neʼe, liurai Jerikó haruka lia-menon ba Raab dehan: “Lori sai mane sira neʼebé mai no hela iha ó-nia uma, tanba sira mai atu hafuhu rai tomak neʼe.”
4 Maibé Raab lori mane sira-neʼe hodi subar sira. Tuirmai nia dehan: “Sin, mane sira-neʼe mai duni iha neʼe hasoru haʼu, maibé haʼu la hatene sira mai husi neʼebé.
5 Bainhira nakukun ona no sidade nia portaun besik atu taka, mane sira-neʼe sai. Haʼu la hatene sira bá neʼebé, maibé se imi duni tuir sira lalais, imi bele toman sira.”
6 Maibé tuir loloos, nia lori ona mane sira-neʼe ba uma-kakuluk no subar sira iha duʼut-liñu* kain nia leet neʼebé rai iha uma nia kakuluk.
7 Entaun, liurai nia ema sira duni tuir mane sira-neʼe tuir dalan neʼebé atu hakur Mota Jordaun,+ no bainhira ema sira-neʼe sai, sidade nia portaun taka kedas.
8 Antes mane naʼin-rua neʼe toba, Raab saʼe ba uma-kakuluk hodi haree sira.
9 Nia hatete ba mane sira-neʼe: “Haʼu hatene katak Jeová sei fó rai neʼe ba imi,+ no ami hotu sai taʼuk tebes ba imi.+ Ema hotu iha rai neʼe lakon aten-brani tanba imi,+
10 tanba ami rona ona oinsá Jeová halo maran Tasi Mean iha imi-nia oin bainhira imi sai husi rai-Ejitu+ no mós buat neʼebé imi halo ba ema Amoreu nia liurai naʼin-rua, Sihon+ no Og,+ neʼebé imi halakon ona iha Mota Jordaun nia sorin seluk.*
11 Bainhira ami rona kona-ba neʼe, ami sai taʼuk,* no la iha ema ida mak brani* atu kontra imi, tanba Jeová, imi-nia Maromak, mak Maromak iha lalehan no iha rai.+
12 Agora, favór ida, jura ba haʼu hodi Jeová nia naran, tanba haʼu hatudu ona domin neʼebé laran-metin ba imi, imi mós sei hatudu domin neʼebé laran-metin ba haʼu-nia aman nia umakain; no imi tenke fó sinál* ida neʼebé haʼu bele tau fiar.
13 Imi tenke proteje haʼu-nia inan-aman nia moris, haʼu-nia maun-alin no biin-alin sira-nia moris, no proteje ema hotu neʼebé sira-nian, no imi tenke salva ami* husi mate.”+
14 Nuneʼe, mane sira-neʼe dehan ba Raab: “Ami sei entrega ami-nia moris hodi troka ho imi-nian!* Se ó la fó sai kona-ba ami-nia knaar, ami mós sei hatudu domin boot* no laran-metin ba ó bainhira Jeová fó rai neʼe ba ami.”
15 Depois neʼe, Raab husik sira tun ho tali liuhusi janela, tanba ninia uma mak iha sidade nia moru leten.+
16 Tuirmai nia dehan ba sira: “Imi bá área foho nian no subar iha neʼebá toʼo loron tolu, atu nuneʼe ema neʼebé duni tuir imi labele hetan imi. No bainhira ema sira-neʼe fila ona, imi bele bá fali imi-nia fatin.”
17 Mane sira-neʼe dehan ba Raab: “Ami sei kumpre juramentu neʼebé ó haruka ami atu jura+ se ó halo buat tuirmai neʼe:
18 Bainhira ami tama iha rai neʼe, ó tenke kesi tali mean neʼe iha ó-nia janela neʼebé ó husik ami tun. Ó tenke halibur ó-nia aman, inan, maun-alin no ó-nia aman nia umakain tomak iha ó-nia uma laran.+
19 Se ema ida sai husi ó-nia uma nia odamatan hodi bá liʼur, nia sei lori todan ba ninia raan rasik,* no ami sei livre husi sala. Maibé se ema ruma neʼebé hamutuk ho ó iha uma laran mak mate, ami sei lori todan ba ninia raan.*
20 Maibé se ó fó sai kona-ba ami-nia knaar,+ ami sei sai livre husi sala kona-ba juramentu neʼebé ó haruka ami atu jura.”
21 Raab hatán: “Diʼak, haʼu sei halo tuir duni buat neʼebé imi hatete.”
Nuneʼe Raab haruka mane sira-neʼe bá. Depois neʼe, nia kesi tali mean neʼe iha ninia janela.
22 Entaun sira sai no bá área foho nian no hela iha neʼebá durante loron tolu, toʼo ema neʼebé duni tuir sira fila ona. Liurai nia ema sira buka sira iha dalan hotu maibé la hetan sira.
23 Tuirmai mane naʼin-rua neʼe tun husi área foho nian no hakur mota no sira bá hasoru Nun nia oan-mane Josué. Sira konta ba Josué kona-ba buat hotu neʼebé akontese ba sira.
24 Depois neʼe, sira dehan ba Josué: “Jeová entrega ona rai tomak neʼe ba ita.+ Tuir loloos, ema hotu iha rai neʼebá lakon aten-brani tanba ita.”+
Nota-rodapé
^ Ka “prostituta”.
^ Neʼe mak ai-horis neʼebé kuda iha tempu uluk kedas. Ema uza kabas husi duʼut neʼe atu halo hena-liñu.
^ Neʼe katak sorin parte leste.
^ Orj., “ami-nia fuan sai nabeen”.
^ Orj., “iha espíritu”. Haree “Ruah” iha Glosáriu.
^ Ka karik “promesa”.
^ Haree “Nefes” iha Glosáriu.
^ Ka “imi-nia moris”. Haree “Nefes” iha Glosáriu.
^ Orj., “ninia raan sei iha ninia ulun leten”.
^ Orj., “ninia raan sei iha ami-nia ulun leten”.
