Josué 22:1-34
22 Tuirmai Josué bolu suku Ruben, suku Gad, no suku Manasés nia sorin balu,
2 no dehan ba sira: “Imi halo tuir ona mandamentu hotu neʼebé Jeová nia atan Moisés fó ba imi,+ no imi mós halo tuir haʼu-nia liafuan hotu.+
3 Durante neʼe, imi la husik imi-nia maun-alin sira toʼo ohin loron,+ no imi kumpre ona imi-nia obrigasaun hodi halo tuir mandamentu husi Jeová, imi-nia Maromak.+
4 Agora Jeová, imi-nia Maromak, fó ona moris hakmatek ba imi-nia maun-alin sira, hanesan nia promete ona ba sira.+ Entaun agora, imi bele fila fali ba imi-nia hela-fatin iha rai neʼebé Jeová nia atan Moisés fó ona ba imi nuʼudar imi-nian iha Mota Jordaun nia sorin seluk.*+
5 Maibé imi tenke halo tuir ho didiʼak mandamentu no Ukun-Fuan neʼebé Jeová nia atan Moisés fó ba imi,+ hodi hadomi Jeová, imi-nia Maromak,+ hodi laʼo iha ninia dalan hotu,+ hodi halo tuir ninia mandamentu sira,+ hodi laran-metin ba nia,+ no hodi serbí nia+ ho imi-nia laran tomak no ho imi-nia moris* tomak.”+
6 Tuirmai Josué haraik bensaun ba sira no haruka sira bá, no sira fila fali ba sira-nia hela-fatin.
7 Kona-ba suku Manasés nia sorin balu, Moisés fó ona liman-rohan iha Basan ba sira.+ Maibé kona-ba suku neʼe nia sorin balu seluk, Josué fó rai neʼebé iha Mota Jordaun+ nia sorin parte oeste ba sira, atu sira bele hela hamutuk ho sira-nia maun-alin sira. Liután neʼe, bainhira Josué haruka sira fila ba sira-nia hela-fatin, nia haraik bensaun ba sira
8 no dehan ba sira: “Fila fali ba imi-nia hela-fatin ho rikusoin barak, animál-hakiak barak tebes, osan-mutin no osan-mean, riti no besi, no ho roupa neʼebé barak tebes.+ Lori sasán neʼebé imi foti ona+ husi inimigu sira no fahe ho imi-nia maun-alin sira.”
9 Depois neʼe, suku Ruben, suku Gad, no suku Manasés nia sorin balu husik hela ema Izraél sira seluk. Sira sai husi Silo iha rai-Kanaan hodi fila fali ba rai-Gilead,+ rai neʼebé sira simu ona nuʼudar sira-nian, hodi halo tuir Jeová nia orden liuhusi Moisés.+
10 Bainhira suku Ruben, suku Gad, no suku Manasés nia sorin balu toʼo iha área Mota Jordaun nian iha rai-Kanaan, sira harii altár ida neʼebé boot no furak iha neʼebá besik Mota Jordaun.
11 Liutiha tempu balu, ema Izraél seluk rona liafuan+ neʼebé dehan: “Suku Ruben, suku Gad, no suku Manasés nia sorin balu harii ona altár ida iha rai-Kanaan nia fronteira iha área Mota Jordaun iha sorin parte oeste neʼebé nuʼudar ema Izraél nia rai.”
12 Bainhira ema Izraél rona kona-ba neʼe, povu Izraél hotu halibur hamutuk iha Silo+ atu bá halo funu hasoru sira.
13 Tuirmai ema Izraél haruka amlulik Eleazar nia oan-mane Fineias+ bá hasoru suku Ruben, suku Gad, no suku Manasés nia sorin balu iha rai-Gilead.
14 Xefe naʼin-sanulu mós bá hamutuk ho Fineias; xefe ida-idak reprezenta suku ida husi Izraél no sira hotu mak ulun-naʼin iha sira-nia aman nia umakain, iha ema Izraél rihun ba rihun nia leet.+
15 Bainhira sira hasoru suku Ruben, suku Gad, no suku Manasés nia sorin balu iha rai-Gilead, sira dehan:
16 “Jeová nia povu tomak dehan nuneʼe: ‘Tanbasá mak imi la hatudu laran-metin+ ba Izraél nia Maromak? Ohin imi fila kotuk ba Jeová tanba imi harii altár ba imi-nia an no kontra Jeová.+
17 Sala neʼebé uluk ita halo iha Peor mak kiʼik deʼit ka? Imi haluha ona malisan neʼebé kona Jeová nia povu+ tanba sala neʼe ka? Toʼo agora ita seidauk hamoos an husi sala neʼe.
18 No agora imi fila kotuk tan ba Jeová! Se imi kontra Jeová ohin, entaun aban nia sei sai hirus hasoru povu Izraél tomak.+
19 Nuneʼe se imi hanoin katak rai neʼebé imi hela bá mak la moos, mai hodi hela iha rai neʼebé Jeová nian,+ rai neʼebé iha Jeová nia tenda santu,*+ no mai hela iha ami-nia leet. Maibé keta kontra hasoru Jeová no halo ami mós kontra fali nia tanba imi harii altár ida tan ba imi-nia an, katak altár neʼebé kontra Jeová, ita-nia Maromak, nia altár.+
20 Uluk Acan,+ neʼebé husi Zerá nia umakain, la hatudu laran-metin kona-ba buat neʼebé tenke harahun tiha, no Maromak sai hirus hasoru povu Izraél tomak, loos ka lae?+ Iha tempu neʼebá laʼós nia deʼit mak mate tanba ninia sala.’”+
21 Ho ida-neʼe, suku Ruben, suku Gad, no suku Manasés nia sorin balu hatán ba ema Izraél nia ulun-naʼin sira,*+ hodi dehan:
22 “Jeová mak Maromak neʼebé aas liu maromak sira seluk! Nia mak hatene. Jeová mak Maromak neʼebé aas liu maromak sira seluk!+ Nia mak hatene, no ema Izraél mós sei hatene. Se ami kontra no la hatudu laran-metin ba Jeová, entaun nia lalika salva ami agora.
23 Se ami harii altár neʼe ba ami-nia an hodi fila kotuk ba Jeová no atu hasaʼe sakrifísiu sunu nian, sakrifísiu trigu* nian no sakrifísiu dame nian, entaun Jeová sei fó kastigu ba ami.+
24 Maibé ami halo altár neʼe ho razaun seluk, tanba ami dehan: ‘Iha futuru, imi-nia oan sira sei hatete ba ami-nia oan: “Imi iha direitu saida atu adora Jeová, Izraél nia Maromak, hamutuk ho ami?
25 Jeová tau Mota Jordaun nuʼudar baliza entre ami ho imi, suku Ruben no suku Gad. Imi la iha parte ida kona-ba Jeová.” Ho ida-neʼe, imi-nia oan sira sei hanetik ami-nia oan atu adora* Jeová.’
26 “Tan neʼe, ami hatete: ‘Mai ita harii altár ida ba ita-nia an, no altár neʼe sei la uza atu hasaʼe sakrifísiu sunu nian ka sakrifísiu sira seluk.
27 Maibé altár neʼe sei sai nuʼudar sasin entre imi ho ami+ no entre ita-nia oan sira,* katak ami sei kumpre ami-nia serbisu ba Jeová iha ninia oin hodi hasaʼe ami-nia sakrifísiu sunu nian no sakrifísiu dame nian no ami-nia sakrifísiu sira seluk,+ hodi nuneʼe imi-nia oan sira labele hatete ba ami-nia oan sira iha futuru, hodi dehan: “Imi la iha parte ida kona-ba Jeová.”’
28 Nuneʼe ami hatete: ‘Se sira koʼalia hanesan neʼe ba ita no ba ita-nia oan sira* iha futuru, entaun ita sei dehan: “Haree ba altár neʼebé ami-nia beiʼala sira halo, ninia modelu hanesan ho Jeová nia altár, no altár neʼe la uza atu hasaʼe sakrifísiu sunu nian ka sakrifísiu seluk, maibé atu sai nuʼudar sasin entre imi ho ami.”’
29 Ami nunka hanoin atu kontra Jeová no nunka fila kotuk ba Jeová+ hodi halo altár ida ba sakrifísiu sunu nian, sakrifísiu trigu* nian no sakrifísiu sira seluk, katak altár neʼebé kontra Jeová, ami-nia Maromak, nia altár neʼebé iha ninia tenda santu nia oin!”+
30 Bainhira amlulik Fineias, no povu nia xefe sira, katak ema Izraél nia ulun-naʼin sira,* rona liafuan sira neʼebé Ruben nia bei-oan, Gad nia bei-oan no Manasés nia bei-oan sira fó sai, sira kontente kona-ba neʼe.+
31 Ho ida-neʼe, amlulik Eleazar nia oan-mane Fineias, hatete ba Ruben nia bei-oan, Gad nia bei-oan no Manasés nia bei-oan sira, hodi dehan: “Ohin ami hatene katak Jeová iha ita-nia leet, tanba imi la halo buat neʼebé kontra Jeová. Agora imi salva ona ema Izraél husi Jeová nia liman.”
32 Tuirmai amlulik Eleazar nia oan-mane Fineias, no mós xefe sira fila ba rai-Kanaan hodi husik hela suku Ruben no suku Gad neʼebé iha rai-Gilead, no sira lori fali lia-menon ba ema Izraél sira seluk.
33 No ema Izraél kontente ho lia-menon neʼebé sira rona. Tuirmai ema Izraél fó hahiʼi ba Maromak, no sira la koʼalia tan kona-ba halo funu hasoru suku Ruben no suku Gad hodi harahun rai neʼebé ema sira-neʼe hela bá.
34 Entaun suku Ruben no suku Gad fó naran ba altár neʼe,* tanba “altár neʼe mak sasin entre ita katak Jeová mak Maromak loos”.
Nota-rodapé
^ Neʼe katak sorin parte leste.
^ Haree “Nefes” iha Glosáriu.
^ Ka “tabernákulu”.
^ Ka “ulun-naʼin ba sira-nia aman nia umakain husi ema Izraél rihun ba rihun”.
^ Neʼe bele refere mós ba sevada. Haree “Sakrifísiu trigu nian” iha Glosáriu.
^ Orj., “hamtaʼuk”.
^ Orj., “jerasaun sira”.
^ Orj., “jerasaun sira”.
^ Neʼe bele refere mós ba sevada. Haree “Sakrifísiu trigu nian” iha Glosáriu.
^ Ka “ulun-naʼin ba sira-nia aman nia umakain husi ema Izraél rihun ba rihun”.
^ Husi informasaun neʼebé fó sai iha neʼe, altár neʼe karik naran Testemuña ka Sasin.
