Josué 23:1-16
23 Tinan barak liutiha husi tempu neʼebé Jeová halo ema Izraél moris hakmatek+ husi inimigu neʼebé haleʼu sira no bainhira Josué katuas ona no besik atu mate,+
2 Josué bolu ema Izraél hotu,+ Izraél nia katuas sira, juís sira, xefe sira no ulun-naʼin sira,+ no nia hatete ba sira: “Haʼu katuas ona no besik atu mate.
3 Imi rasik haree ona buat hotu neʼebé Jeová, imi-nia Maromak, halo ba nasaun sira-neʼe hotu tanba imi. Imi-nia Maromak Jeová mak halo funu hodi ajuda imi.+
4 Haʼu duni sai tiha nasaun sira+ neʼebé hela iha parte oeste* hahú husi Mota Jordaun toʼo Tasi Boot* no haʼu fahe rai sira-neʼe ba imi liuhusi dada sorteiu.*+ Maski povu balu sei hela iha rai neʼe, maibé rai neʼe mak imi-nian.+
5 Jeová, imi-nia Maromak, hasai ona nasaun sira-neʼe husi imi-nia oin,+ no nia duni sai sira tanba imi, no imi foti ona sira-nia rai, hanesan Jeová, imi-nia Maromak, promete ona ba imi.+
6 “Agora imi tenke sai aten-brani tebes atu kumpre no halo tuir buat hotu neʼebé hakerek iha livru Moisés nia Ukun-Fuan+ no nunka laʼo sees husi ida-neʼe ba liman-loos ka ba liman-karuk,+
7 no nunka ransu ho nasaun sira+ neʼebé sei hela hamutuk ho imi. Imi labele temi ka jura hodi sira-nia maromak nia naran,+ no imi labele serbí sira ka hakruʼuk ba sira.+
8 Maibé imi tenke laran-metin ba Jeová, imi-nia Maromak,+ hanesan imi halo ona toʼo ohin loron.
9 Jeová sei hasai nasaun sira neʼebé boot no forte husi imi-nia oin,+ tanba la iha ema ida mak bele hamriik hasoru imi toʼo ohin loron.+
10 Mane ida deʼit husi imi sei duni tuir ema naʼin-rihun ida,+ tanba Jeová, imi-nia Maromak, mak halo funu hodi ajuda imi,+ hanesan nia promete ona ba imi.+
11 Entaun, imi tenke matan-moris nafatin+ hodi hadomi Jeová, imi-nia Maromak.+
12 “Maibé se karik imi fila kotuk no laran-metin fali ba ema restu husi nasaun sira+ neʼebé sei hela hamutuk ho imi, no imi kaben+ ho sira no ransu ho sira, no sira mós ransu ho imi,
13 imi tenke hatene bá katak Jeová, imi-nia Maromak, sei la apoia tan imi hodi duni sai nasaun sira-neʼe.+ Sira sei sai hanesan lasu, hanesan xikote neʼebé baku imi-nia kotuk+ no hanesan ai-tarak iha imi-nia matan toʼo imi lakon mohu tiha husi rai diʼak neʼebé Jeová, imi-nia Maromak, fó ona ba imi.
14 “Haree bá! Haʼu besik ona atu mate, no imi hatene didiʼak ho imi-nia laran tomak no ho imi-nia moris tomak katak Jeová, imi-nia Maromak, nia liafuan hotu neʼebé nia hatete ona sai loos duni. Ninia promesa diʼak hotu sai loos ba imi. Husi liafuan sira-neʼe hotu, la iha liafuan ida mak la sai loos.+
15 Maibé hanesan Jeová, imi-nia Maromak, nia promesa diʼak hotu neʼebé nia hatete ba imi sai loos duni,+ nuneʼe mós Jeová sei lori kastigu hotu* neʼebé nia promete ona ba imi no nia sei halakon imi husi rai diʼak neʼebé Jeová, imi-nia Maromak, fó ona ba imi.+
16 Se imi kontra Jeová, imi-nia Maromak, nia aliansa neʼebé nia haruka imi atu halo tuir no se imi bá adora maromak sira seluk no hakruʼuk ba sira, entaun Jeová sei sai hirus tebes hasoru imi+ no imi sei lakon mohu lalais husi rai diʼak neʼebé nia fó ona ba imi.”+
Nota-rodapé
^ Ka “loromonu”.
^ Neʼe katak Tasi Mediterráneu.
^ Haree “Dada sorteiu” iha Glosáriu.
^ Ka “liafuan malisan hotu”.
