Josué 3:1-17
-
Izraél hakur Mota Jordaun (1-17)
3 Tuirmai, Josué hadeer sedu iha dadeer-saan, no nia hamutuk ho ema Izraél hotu sai husi Sitim+ no laʼo toʼo Mota Jordaun. Sira hela kalan iha neʼebá antes hakur mota neʼe.
2 Liutiha loron tolu, ulun-naʼin sira+ laʼo liu povu nia hela-fatin
3 no fó mandamentu ba povu neʼe, hodi dehan: “Bainhira imi haree amlulik Levi sira lori Jeová, imi-nia Maromak, nia Arka Aliansa nian,+ imi mós tenke sai husi imi-nia fatin no laʼo tuir Arka neʼe.
4 Maibé imi tenke laʼo dook uitoan husi Arka neʼe maizumenus kilómetru ida;* keta laʼo besik liu Arka, atu nuneʼe imi bele hatene dalan neʼebé imi sei laʼo bá, tanba imi seidauk laʼo iha dalan neʼe.”
5 Josué hatete ba povu neʼe: “Halo santu* imi-nia an bá,+ tanba aban Jeová sei halo buat kmanek iha imi-nia leet.”+
6 Tuirmai Josué dehan ba amlulik sira: “Hulan Arka+ Aliansa nian no laʼo uluk iha povu neʼe nia oin.” Entaun, sira hulan Arka Aliansa nian no laʼo uluk iha povu nia oin.
7 Tuirmai Jeová dehan ba Josué: “Ohin haʼu sei komesa atu foti aas ó iha ema Izraél hotu nia oin,+ atu nuneʼe sira bele hatene katak haʼu sei hamutuk ho ó+ hanesan uluk haʼu hamutuk ho Moisés.+
8 Ó tenke fó mandamentu neʼe ba amlulik sira neʼebé hulan hela Arka Aliansa nian, hodi dehan: ‘Bainhira imi toʼo Mota Jordaun nia ninin, imi tenke tama ba bee laran no hamriik nafatin.’”+
9 Josué dehan ba ema Izraél: “Hakbesik mai no rona ba Jeová, imi-nia Maromak, nia liafuan.”
10 Tuirmai Josué hatete: “Ho ida-neʼe mak imi sei hatene katak Maromak neʼebé moris mak iha imi-nia leet,+ no katak nia sei duni sai ema Kanaan, ema Hetes, ema Heveu, ema Perizeu, ema Girgaseu, ema Amoreu no ema Jebus husi imi-nia oin.+
11 Haree bá! Naʼi ba mundu tomak nia Arka Aliansa nian laʼo uluk iha imi-nia oin hodi tama ba Mota Jordaun.
12 Agora hili mane naʼin-12 husi Izraél nia suku sira, mane ida ba suku ida,+
13 no bainhira amlulik sira-nia ain sama bee iha Mota Jordaun, katak amlulik neʼebé hulan hela Jeová, Naʼi ba mundu tomak, nia Arka, bee iha Mota Jordaun neʼebé suli tun husi mota-ulun sei para kedas, no sei sai hanesan didin-lolon ida.”+
14 Bainhira povu sai husi sira-nia hela-fatin antes hakur Mota Jordaun, amlulik sira neʼebé hulan hela Arka+ Aliansa nian laʼo uluk iha povu neʼe nia oin.
15 Tempu neʼe mak tempu koʼa nian, no bee iha Mota Jordaun sempre sai nakonu toʼo liu mota ninin. Bainhira amlulik sira neʼebé hulan hela Arka neʼe toʼo iha Mota Jordaun no sira-nia ain sama bee iha mota ninin,+
16 bee neʼebé suli tun husi mota-ulun para kedas. Bee neʼe saʼe hanesan didin-lolon ida dook loos husi sira, iha sidade Adão neʼebé besik Zaretan, no bee neʼebé suli tun ba Tasi Araba, katak Tasi Masin,* maran tiha. Bee neʼe para, no povu sira hakur mota iha Jerikó nia oin.
17 Amlulik sira neʼebé hulan hela Jeová nia Arka Aliansa nian kontinua hamriik nafatin iha rai maran+ iha Mota Jordaun nia klaran, no ema Izraél hotu hakur liuhusi rai maran+ toʼo nasaun tomak hakur tiha Mota Jordaun.
