Josué 6:1-27
6 Sidade Jerikó nia portaun taka metin loos tanba ema Izraél; la iha ema ida mak sai no la iha ema ida mak tama ba sidade neʼe.+
2 Entaun Jeová dehan ba Josué: “Haree bá, haʼu entrega ona ba ó sidade Jerikó, ninia liurai no mós ninia funu-naʼin sira neʼebé kbiit boot.+
3 Imi tropa hotu tenke marxa haleʼu sidade neʼe dala ida. Imi tenke halo nuneʼe ba loron neen.
4 Haruka amlulik naʼin-hitu atu lori bibi-malae aman nia dikur hitu hodi laʼo iha Arka nia oin. Maibé iha loron hitu, imi tenke marxa haleʼu sidade neʼe ba dala hitu no amlulik sira tenke huu dikur sira-neʼe.+
5 Bainhira imi rona dikur lian,* tropa hotu tenke hakilar kedas ho lian funu nian. Tuirmai sidade neʼe nia moru sei monu tun toʼo rai,+ no tropa ida-idak tenke halai loos ba sidade laran.”
6 Entaun, Nun nia oan-mane Josué halibur amlulik sira no dehan ba sira: “Foti Arka Aliansa nian, no amlulik naʼin-hitu tenke lori bibi-malae aman nia dikur hitu hodi laʼo iha Jeová nia Arka oin.”+
7 Tuirmai nia hatete ba tropa sira: “Laʼo bá, marxa haleʼu sidade neʼe, no tropa sira neʼebé lori armas+ tenke laʼo uluk iha Jeová nia Arka oin.”
8 Entaun hodi halo tuir buat neʼebé Josué hatete, amlulik naʼin-hitu neʼebé lori bibi-malae aman nia dikur hitu laʼo iha Jeová nia oin. Sira huu dikur no Jeová nia Arka Aliansa nian tuir sira.
9 Tropa neʼebé kaer armas laʼo uluk no amlulik sira neʼebé huu dikur laʼo tuir sira. Tropa sira seluk laʼo iha kotuk hodi tuir Arka neʼe no amlulik sira kontinua huu dikur.
10 Josué fó mandamentu ba tropa sira, hodi dehan: “Keta hakilar ka hasai lian. Liafuan ida mós labele sai husi imi-nia ibun toʼo loron neʼebé haʼu dehan ba imi: ‘Hakilar!’ Depois mak imi bele hakilar.”
11 Nia haruka sira hulan Jeová nia Arka haleʼu sidade neʼe, sira haleʼu dala ida, depois neʼe, sira fila fali ba sira-nia hela-fatin no toba kalan neʼe iha neʼebá.
12 Dadeer tuirmai Josué hadeer sedu, no amlulik sira hulan Jeová nia Arka,+
13 no amlulik naʼin-hitu neʼebé lori bibi-malae aman nia dikur laʼo iha Jeová nia Arka oin no nafatin huu dikur. Tropa neʼebé kaer armas laʼo iha sira-nia oin maibé tropa sira seluk laʼo iha kotuk hodi tuir Jeová nia Arka neʼe no amlulik sira nafatin huu dikur.
14 Iha loron segundu, sira marxa haleʼu sidade ba dala ida, depois neʼe, sira fila fali ba sira-nia hela-fatin. Sira halo nuneʼe durante loron neen.+
15 Iha loron hitu, sira hadeer sedu bainhira rai besik naroman ona, no sira marxa haleʼu sidade neʼe ba dala hitu iha dalan neʼebé hanesan. Iha loron neʼe deʼit mak sira marxa haleʼu sidade neʼe ba dala hitu.+
16 Bainhira sira marxa haleʼu ba dala hitu, amlulik sira huu dikur, no Josué hatete ba tropa sira: “Hakilar bá,+ tanba Jeová entrega ona sidade neʼe ba imi!
17 Imi tenke harahun hotu sidade neʼe no buat hotu neʼebé iha sidade laran;+ buat hotu neʼe mak Jeová nian. Só feto-aat* Raab+ deʼit mak bele moris, nia no ema hotu neʼebé hamutuk ho nia iha ninia uma laran, tanba uluk nia subar ita-nia ema sira neʼebé hafuhu rai neʼe.+
18 Maibé imi presiza hadook an husi buat neʼebé tenke harahun tiha,+ atu nuneʼe imi labele kaan buat sira-neʼe no foti,+ tanba neʼe sei halo ema Izraél nia hela-fatin sai fali buat neʼebé tenke harahun no lori susar ba fatin neʼe.+
19 Maibé osan-mutin no osan-mean hotu no sasán sira husi riti no besi mak buat neʼebé santu ba Jeová.+ Imi tenke tau buat sira-neʼe iha osan-fatin iha Jeová nia uma.”+
20 Depois neʼe, tropa sira hakilar bainhira amlulik sira huu dikur.+ Bainhira tropa sira rona dikur lian no hakilar lian funu nian, moru neʼe monu tun kedas toʼo rai.+ Tuirmai, tropa sira tama ba sidade neʼe, sira ida-idak halai loos ba oin, no sira manán sidade neʼe.
21 Sira halakon tiha buat hotu iha sidade neʼe ho surik, mane no feto, joven no ferik-katuas, karau, bibi no kuda-burru.+
22 Josué hatete ba mane naʼin-rua neʼebé uluk hafuhu rai neʼe, hodi dehan: “Tama ba feto-aat neʼe nia uma no lori sai feto neʼe no sira hotu neʼebé hamutuk ho nia, hanesan imi jura ona ba nia.”+
23 Entaun mane joven sira neʼebé uluk hafuhu rai neʼe tama no lori sai Raab hamutuk ho ninia aman, inan, maun-alin sira, no sira seluk hotu neʼebé hamutuk ho nia. Sira lori sai ninia família tomak,+ no sira lori sai ema hotu neʼe ba fatin ida iha Izraél nia hela-fatin nia liʼur.
24 Tuirmai, sira sunu sidade neʼe no buat hotu neʼebé iha sidade laran. Maibé osan-mutin, osan-mean, sasán husi riti no besi, sira tau neʼe iha osan-fatin iha Jeová nia uma.+
25 Só feto-aat Raab no ninia aman nia umakain no sira hotu neʼebé hamutuk ho nia mak Josué salva;+ no Raab hela iha rai-Izraél toʼo ohin loron,+ tanba nia subar ema sira neʼebé Josué haruka atu hafuhu Jerikó.+
26 Iha tempu neʼebá, Josué fó sai juramentu* tuirmai neʼe: “Iha Jeová nia oin, ema neʼebé koko atu harii fali sidade Jerikó sei hetan malisan. Bainhira nia tau sidade nia fundasaun, ninia oan primeiru sei mate, no bainhira nia tau sidade nia portaun, ninia oan-ikun sei mate.”+
27 Nuneʼe Jeová hamutuk ho Josué,+ no ninia naran-boot habelar iha mundu tomak.+
Nota-rodapé
^ Ka “ema huu dikur lian neʼebé naruk”.
^ Ka “prostituta”.
^ Ka karik “Josué haruka povu fó sai juramentu”.
