Juís 14:1-20
14 Tuirmai Sansão laʼo tun ba Timna, no iha Timna, nia haree feto Filístia ida.
2 Nuneʼe nia fila no hatete ba ninia inan-aman: “Iha Timna, haʼu haree feto Filístia ida, no haʼu hakarak imi hili nia atu sai haʼu-nia feen.”
3 Maibé ninia aman no inan hatete ba nia: “Tanbasá ó la buka feto ida husi ó-nia família sira no husi ita-nia povu sira?+ Tanbasá mak ó tenke bá hili feen husi ema Filístia neʼebé la hetan sirkunsizaun?”* Maibé Sansão hatete ba ninia aman: “Hili nia mai haʼu, tanba nia mak diʼak ba haʼu.”*
4 Ninia inan-aman la hatene katak ida-neʼe mai husi Jeová, tanba Nia buka oportunidade atu kontra ema Filístia neʼebé ukun Izraél iha tempu neʼebá.+
5 Entaun Sansão hamutuk ho ninia inan-aman tun ba Timna. Bainhira nia toʼo iha toʼos-uvas iha Timna, leaun-aman ida mai no hasai lian hasoru nia.
6 Tuirmai Jeová nia espíritu fó kbiit ba nia,+ no nia lees leaun-aman neʼe fahe ba rua, hanesan ema ida lees bibi-timur oan ba rua ho ninia liman-tanan. Maibé nia la fó-hatene ba ninia inan-aman kona-ba buat neʼebé nia halo ona.
7 Depois neʼe, nia bá koʼalia ho feto neʼe, no Sansão sei gosta hela feto neʼe.+
8 Liutiha tempu balu, bainhira Sansão fila daudaun atu lori feto neʼe ba ninia uma,+ nia haree leaun neʼebé nia oho, no iha bani no bani-been mak iha leaun neʼe nia mate-isin.
9 Entaun nia koi bani-been ho nia liman no han ida-neʼe nuʼudar nia laʼo. Bainhira nia toman ninia inan-aman, nia fó balu ba sira atu han. Maibé nia la fó-hatene ba sira katak nia foti bani-been neʼe husi leaun nia mate-isin.
10 Ninia aman tun bá hasoru feto neʼe, no Sansão halo festa iha neʼebá, tanba neʼe mak toman neʼebé mane joven sira sempre halo.
11 Bainhira ema haree Sansão, sira lori mane naʼin-30 atu akompaña Sansão neʼebé nuʼudar noivu.
12 Tuirmai Sansão hatete ba sira: “Favór ida, rona ba haʼu-nia ai-sasiʼik neʼe. Se imi bele hetan resposta ba ida-neʼe durante loron hitu festa nian no fó-hatene mai haʼu, haʼu sei fó imi roupa tahan 30 neʼebé halo husi hena-liñu no roupa pár 30.
13 Maibé se imi labele fó sai ninia resposta ba haʼu, imi tenke fó mai haʼu roupa tahan 30 neʼebé halo husi hena-liñu no roupa pár 30.” Nuneʼe sira dehan: “Konta ó-nia ai-sasiʼik bá. Ami hakarak rona.”
14 Entaun nia dehan ba sira:
“Iha ai-han neʼebé mosu husi ida neʼebé han,No iha buat midar neʼebé mosu husi ida neʼebé forte.”+
No ba loron tolu, sira labele hetan resposta ba ai-sasiʼik neʼe.
15 Iha loron haat, sira hatete ba Sansão nia feen: “Lohi ó-nia laʼen+ atu nuneʼe nia bele fó-hatene resposta husi ai-sasiʼik neʼe ba ami. Se lae, ami sei sunu ó no ó-nia aman nia umakain. Ó konvida ami mai iha neʼe atu foti ami-nia sasán sira ka?”
16 Entaun Sansão nia feen tanis ba nia no dehan: “Karik ó odi haʼu. Ó la hadomi haʼu.+ Ó konta ai-sasiʼik ida ba haʼu-nia povu, maibé ó la fó sai resposta ba haʼu.” Ho ida-neʼe, nia hatán: “Tuir loloos, haʼu mós la konta neʼe ba haʼu-nia inan-aman rasik! Entaun, tanbasá mak haʼu tenke konta neʼe ba ó?”
17 Maibé feto neʼe kontinua tanis ba Sansão durante loron hitu festa nian. Ikusmai nia fó sai resposta ba feto neʼe iha loron hitu, tanba feto neʼe obriga nia. Tuirmai feto neʼe fó sai resposta husi ai-sasiʼik neʼe ba ninia povu.+
18 Entaun antes loro-matan monu* iha loron hitu, mane sira iha sidade neʼe hatete ba Sansão:
“Saida mak midar liu fali bani-been?No saida mak forte liu fali leaun?”+
Sansão hatán ba sira:
“Se imi la fila rai ho haʼu-nia karau-oan,+Imi sei labele hetan resposta ba ai-sasiʼik neʼe.”
19 Tuirmai Jeová nia espíritu fó kbiit ba Sansão,+ no nia tun ba Askelon+ no oho sira-nia ema naʼin-30 no foti sira-nia roupa hodi fó ba ema neʼebé hatán ai-sasiʼik neʼe.+ Nia fila fali ba ninia aman nia uma ho hirus.
20 Tuirmai sira entrega Sansão nia feen+ ba mane ida neʼebé uluk akompaña Sansão neʼebé nuʼudar noivu.+
