Juís 21:1-25
-
Suku Benjamim la lakon mohu (1-25)
21 Iha tempu neʼebá, mane Izraél sira jura ona iha Mizpa+ dehan: “Ita ida mós sei la fó ita-nia oan-feto ba mane sira husi Benjamim nuʼudar feen.”+
2 Tan neʼe, povu Izraél bá Betel+ no tuur iha neʼebá iha Maromak loos nia oin toʼo kalan, sira tanis no halerik makaʼas.
3 Sira hatete: “Oh Jeová, Izraél nia Maromak, tanbasá mak ida-neʼe akontese iha Izraél? Tanbasá mak ohin suku ida tenke lakon husi Izraél?”
4 Iha loron tuirmai povu neʼe hadeer sedu no harii altár ida iha neʼebá hodi hasaʼe sakrifísiu sunu nian no sakrifísiu dame nian.+
5 Tuirmai povu Izraél dehan: “Husi Izraél nia suku sira hotu, sé mak la bá atu halibur hamutuk iha Jeová nia oin?” Tanba sira halo ona juramentu espesiál ida katak ema neʼebé la bá iha Jeová nia oin iha Mizpa, ema neʼe tenke mate.
6 Povu Izraél sente triste kona-ba buat neʼebé akontese ba sira-nia alin Benjamim. Sira hatete: “Ohin suku ida lakon tiha ona husi Izraél.
7 Saida mak ita tenke halo atu fó feen ba ema Benjamim sira neʼebé sei moris hela, tanba ita jura ona hodi Jeová+ katak ita sei la fó ita-nia oan-feto ba sira nuʼudar feen?”+
8 Sira husu: “Iha Izraél nia suku sira-nia leet, sé mak la bá iha Jeová nia oin iha Mizpa?”+ Tuir loloos la iha ema Jabes-Gilead ida mak mai iha fatin neʼebé povu* halibur bá.
9 Bainhira sira sura povu neʼe, sira haree katak la iha ema ida husi Jabes-Gilead mak mai iha fatin neʼe.
10 Entaun povu neʼe haruka mane naʼin-12.000 neʼebé kbiit boot liu atu bá neʼebá. Sira fó mandamentu dehan: “Bá oho ema sira neʼebé hela iha Jabes-Gilead ho surik, inklui mós feto no labarik sira.+
11 Imi tenke halo buat tuirmai neʼe: Mane hotu, no mós feto hotu neʼebé halo ona relasaun seksuál, imi tenke halakon tiha.”
12 Entaun husi ema Jabes-Gilead, sira hetan deʼit feto virjen naʼin-400 neʼebé seidauk halo relasaun seksuál ho mane ida. Nuneʼe sira lori feto sira-neʼe ba tropa nia hela-fatin iha Silo,+ neʼebé iha rai-Kanaan.
13 Tuirmai povu hotu haruka lia-menon ba ema Benjamim neʼebé iha Fatuk Boot Rimon+ hodi halo dame ho sira.
14 Entaun iha tempu neʼe ema Benjamim fila fali. Ema Izraél fó sira feto neʼebé sira la oho husi Jabes-Gilead,+ maibé feto sira-neʼe la toʼo ba ema Benjamim.
15 No povu neʼe sente triste kona-ba buat neʼebé akontese ba ema Benjamim+ tanba Jeová hafahe ona Izraél nia suku sira.
16 Povu nia katuas hotu dehan: “Saida mak ita sei halo atu fó feen ba mane sira seluk neʼe, tanba feto hotu iha Benjamim mate ona?”
17 Sira hatán: “Ema Benjamim sira neʼebé la mate tenke simu liman-rohan, atu nuneʼe suku neʼe labele lakon husi Izraél.
18 Maibé ita labele fó ita-nia oan-feto ba sira nuʼudar feen, tanba povu Izraél jura ona dehan: ‘Malisan ba ema neʼebé fó feen ba ema Benjamim.’”+
19 Nuneʼe sira hatete: “Tinan-tinan iha festa ba Jeová iha Silo,+ neʼebé iha parte norte husi Betel no parte leste husi dalan boot neʼebé saʼe husi Betel toʼo Siquém no iha Lebona nia sorin parte súl.”
20 Entaun sira haruka mane Benjamim, hodi dehan: “Bá subar iha toʼos-uvas hodi hein.
21 No bainhira imi haree feto joven sira husi Silo sai mai hodi dansa, imi ida-idak tenke sai husi toʼos-uvas no hadau feto ida husi feto joven Silo nian nuʼudar feen, no imi tenke fila fali ba rai-Benjamim.
22 Se sira-nia aman ka sira-nia maun-alin sai mai hodi kesar ba ami, ami sei dehan ba sira: ‘Hatudu laran-diʼak ba ami kona-ba sira, tanba feto neʼebé ami lori mai liuhusi funu la toʼo ba sira+ no imi mós labele fó feen ba sira ho laran neʼebé moos tanba juramentu neʼe.’”+
23 Entaun ema Benjamim halo nuneʼe duni, sira ida-idak lori feen husi feto sira neʼebé dansa. Depois neʼe, sira fila fali ba sira-nia rai neʼebé sira simu ona nuʼudar liman-rohan, no harii fali sira-nia sidade sira+ no hela iha neʼebá.
24 Iha tempu neʼebá, ema Izraél sai husi fatin neʼe, sira ida-idak bá fali sira-nia suku no sira-nia umakain, no sira sai husi neʼebá hodi bá sira-nia rai neʼebé sira simu ona nuʼudar liman-rohan.
25 Iha tempu neʼebá, la iha liurai ida iha Izraél.+ Ema ida-idak halo tuir deʼit sira-nia hakarak rasik.*
