Juís 4:1-24
4 Maibé bainhira Ehud mate ona, ema Izraél halo fali buat neʼebé aat tuir Jeová nia haree.+
2 Tan neʼe, Jeová faʼan sira ba Jabin, liurai Kanaan,+ neʼebé ukun iha Hazor. No xefe ba ninia tropa mak Sísera, neʼebé hela iha Haroset.*+
3 Ema Izraél halerik ba Jeová+ tanba Jabin iha kuda-karreta funu nian 900 ho roda neʼebé iha surik,*+ no nia hanehan makaʼas ema Izraél+ ba tinan 20.
4 Iha tempu neʼebá profeta Débora,+ Lapidot nia feen, mak tesi-lia ba ema Izraél.
5 Débora iha toman atu tuur iha ninia ai-palmeira okos, entre Ramá+ no Betel+ iha Efraim nia área foho nian; no ema Izraél sira bá hasoru nia atu hetan tesi-lia.
6 Nia haruka lia-menon ba Abinoam nia oan-mane Barac+ atu sai husi Kedes-Naftali+ no dehan ba nia: “Jeová, Izraél nia Maromak, fó ona mandamentu neʼe: ‘Laʼo ba* Foho Tabor, no lori mós mane naʼin-10.000 husi Naftali no Zebulão hamutuk ho ó.
7 Haʼu sei lori ba ó Sísera, xefe ba Jabin nia tropa, hamutuk ho ninia kuda-karreta funu nian no ninia tropa sira toʼo Mota* Kison,+ no haʼu sei entrega nia ba ó-nia liman.’”+
8 Ho ida-neʼe, Barac dehan ba nia: “Se Ita bá hamutuk ho haʼu, haʼu sei bá, maibé se Ita la bá hamutuk ho haʼu, haʼu sei la bá.”
9 Nuneʼe Débora dehan: “Haʼu sei bá duni hamutuk ho ó. Maibé, funu neʼebé ó atu halo sei la lori glória ba ó, tanba Jeová sei entrega Sísera ba feto ida nia liman.”+ Tuirmai Débora hamriik no laʼo hamutuk ho Barac hodi bá Kedes.+
10 Barac bolu ema Zebulão no ema Naftali+ ba Kedes, no mane naʼin-10.000 laʼo tuir ninia ain-fatin. Débora mós bá hamutuk ho nia.
11 Iha tempu neʼebá, Heber, ema Keneu, haketak an husi ema Keneu sira seluk,+ no nia harii ninia tenda besik ai-hun boot iha Zaananim neʼebé iha Kedes. Ema Keneu mak Moisés nia banin-mane Hobab nia bei-oan.+
12 Depois neʼe, ema fó-hatene ba Sísera katak Abinoam nia oan-mane Barac saʼe ona ba Foho Tabor.+
13 Nuneʼe Sísera halibur kedas ninia kuda-karreta funu nian hotu, katak kuda-karreta 900 ho roda neʼebé iha surik,* no halibur mós tropa hotu neʼebé hamutuk ho nia hodi sai husi Haroset atu bá Mota* Kison.+
14 Débora hatete ba Barac: “Hamriik bá, tanba iha loron neʼe Jeová sei entrega Sísera ba ó-nia liman. Jeová mak laʼo iha ó-nia oin, loos ka lae?” Barac tun husi Foho Tabor hamutuk ho mane naʼin-10.000 neʼebé tuir nia.
15 Tuirmai Jeová halo Sísera no ninia kuda-karreta funu nian hotu no ninia tropa sira hotu sai runguranga+ iha Barac nia oin. Ikusmai Sísera tun husi ninia kuda-karreta no halai ho ain deʼit.
16 Barac duni tuir kuda-karreta funu nian sira no tropa sira toʼo Haroset. Nuneʼe, Sísera nia tropa hotu mate ho surik, la iha ida mak moris.+
17 Maibé Sísera halai toʼo Heber nia feen+ Jael nia tenda,+ tanba iha dame entre Liurai Jabin+ husi Hazor ho umakain Heber; Heber mak ema Keneu.
18 Tuirmai Jael sai mai hodi hasoru Sísera no dehan ba nia: “Tama mai, haʼu-nia naʼi, tama mai. Keta taʼuk.” Entaun Sísera tama ba Jael nia tenda, no Jael taka nia ho manta.
19 Tuirmai nia dehan ba Jael: “Favór ida, fó bee uitoan mai haʼu atu hemu tanba haʼu hamrook.” Entaun Jael loke fatin hemu nian neʼebé halo husi animál nia kulit no fó susubeen ba nia atu hemu,+ depois neʼe, Jael taka fali nia ho manta.
20 Sísera hatete ba Jael: “Hamriik iha tenda nia odamatan, no se ema ruma mai no husu ó: ‘Iha mane ruma iha neʼe ka lae?’ Ó tenke hatán: ‘La iha!’”
21 Maibé Jael, Heber nia feen, foti pregu tenda nian no martelu. Tuirmai bainhira Sísera toba-dukur loos tanba kole, ho nonook Jael hakbesik ba nia no baku pregu neʼe ba ninia reen-toos sorin no borus toʼo rai, no nia mate.+
22 Bainhira Barac bá neʼebá hodi duni tuir Sísera, Jael sai mai hodi hasoru nia no dehan: “Mai no haʼu sei hatudu ba Ita mane neʼebé Ita buka.” Entaun nia tama ba tenda laran ho Jael no haree Sísera latan hela ho pregu tenda nian borus iha ninia reen-toos sorin no nia mate ona.
23 Entaun iha loron neʼebá, Maromak manán Jabin, liurai Kanaan, iha ema Izraél nia oin.+
24 No ema Izraél nia liman kontinua sai forte no forte liután hasoru Jabin, liurai Kanaan,+ toʼo sira halakon tiha Jabin, liurai Kanaan.+
Nota-rodapé
^ Ka “Haroset nasaun sira-nian”.
^ Orj., “kuda-karreta funu nian neʼebé halo husi besi”.
^ Ka “Haruka imi-nia mane sira ba”.
^ Orj., “kuda-karreta funu nian neʼebé halo husi besi”.
