Levítico 17:1-16
17 Jeová dehan tan ba Moisés:
2 “Koʼalia ba Arão no ninia oan-mane sira no ba ema Izraél hotu no hatete ba sira: ‘Jeová fó mandamentu tuirmai neʼe:
3 “‘“Se ema ida husi umakain Izraél oho karau-aman ka bibi-malae aman* ka bibi-timur iha povu nia hela-fatin ka se nia oho iha hela-fatin nia liʼur,
4 maibé nia la lori neʼe ba odamatan tenda reuniaun nian atu hasaʼe nuʼudar sakrifísiu ba Jeová iha Jeová nia tenda santu nia oin, ema neʼe sei hetan sala kona-ba raan. Nia fakar ona raan, no ema neʼe tenke mate hodi halakon husi povu nia leet.
5 Ho ida-neʼe, ema Izraél labele oho tan animál sakrifísiu nian iha rai-luan, maibé sira sei lori animál sira-neʼe ba Jeová iha odamatan tenda reuniaun nian ba amlulik. Sira tenke fó animál sira-neʼe nuʼudar sakrifísiu dame nian ba Jeová.+
6 Depois neʼe, amlulik tenke hisik raan ba Jeová nia altár leten iha odamatan tenda reuniaun nian no sunu animál nia bokur hodi halo suar no ninia morin halo Jeová kontente.*+
7 Hodi nuneʼe sira labele hasaʼe tan sakrifísiu ba maromak sira neʼebé halo hanesan bibi-timur,*+ neʼebé sira adora hodi la hatudu laran-metin.*+ Neʼe sei sai nuʼudar ukun-fuan ba nafatin iha imi-nia jerasaun hotu.”’
8 “Ó tenke dehan ba sira: ‘Se ema ida husi umakain Izraél ka ema estranjeiru ida neʼebé hela iha imi-nia leet fó sakrifísiu sunu nian ka sakrifísiu ida
9 no la lori neʼe ba odamatan tenda reuniaun nian atu hasaʼe ba Jeová, ema neʼe tenke mate hodi halakon husi povu nia leet.+
10 “‘Se ema ida husi umakain Izraél ka ema estranjeiru ida neʼebé hela iha imi-nia leet han raan husi kriatura ruma,+ haʼu sei la simu ema* neʼe tanba nia han raan, no haʼu sei oho nia husi povu nia leet.
11 Tanba kriatura hotu nia moris* mak iha ninia raan,+ no haʼu fó ona raan ba altár leten+ atu imi bele hamoos imi-nia sala rasik, tanba raan mak sei hamoos sala+ liuhusi moris neʼebé iha raan neʼe nia laran.
12 Tan neʼe mak haʼu dehan ba povu Izraél: “Imi* labele han raan, no ema estranjeiru neʼebé hela iha imi-nia leet+ mós labele han raan.”+
13 “‘Se ema Izraél ida ka ema estranjeiru ida neʼebé hela iha imi-nia leet kasa no kaer animál fuik ida ka manu ida neʼebé bele han, nia tenke fakar animál neʼe nia raan+ no taka ho rai-rahun.
14 Tanba kriatura hotu nia moris* mak iha ninia raan. Tan neʼe mak haʼu dehan ba ema Izraél: “Imi labele han raan husi kriatura hotu tanba kriatura hotu nia moris* mak iha ninia raan. Ema neʼebé han raan tenke hetan kastigu-mate.”+
15 Se ema* ida, maski rai-naʼin ka ema estranjeiru, han naʼan husi animál neʼebé mate mesak deʼit ka animál neʼebé animál fuik mak lees mate,+ entaun nia tenke fase ninia roupa no hariis. No nia sei sai la moos* toʼo kalan.+ Tuirmai nia sei sai moos* fali.
16 Maibé se nia la fase ninia roupa no hariis, nia sei hatán ba ninia sala.’”+
Nota-rodapé
^ Ka “bibi-malae oan neʼebé aman”.
^ Ka “sente kmaan”.
^ Orj., “hasaʼe sakrifísiu ba bibi-timur sira”. Karik ema neʼebé adora anju aat sira-neʼe hanoin katak anju aat sira-neʼe mak kriatura neʼebé iha fulun barak hanesan bibi-timur.
^ Ka “neʼebé sira halo prostituisaun hamutuk ho maromak sira-neʼe”.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “Nefes” iha Glosáriu.
^ Haree “La moos” iha Glosáriu.
